೧೪. ಅಧಿಟ್ಠಾನಹಾರಸಮ್ಪಾತೋ

೭೬. ತತ್ಥ ಕತಮೋ ಅಧಿಟ್ಠಾನೋ ಹಾರಸಮ್ಪಾತೋ?

ತಸ್ಮಾ ರಕ್ಖಿತಚಿತ್ತಸ್ಸ, ಸಮ್ಮಾಸಙ್ಕಪ್ಪಗೋಚರೋತಿ ಗಾಥಾ. ತಸ್ಮಾ ರಕ್ಖಿತಚಿತ್ತಸ್ಸಾತಿ ಏಕತ್ತತಾ. ಚಿತ್ತಂ ಮನೋ ವಿಞ್ಞಾಣಂ, ಅಯಂ ವೇಮತ್ತತಾ. ಸಮ್ಮಾಸಙ್ಕಪ್ಪಗೋಚರೋತಿ ಏಕತ್ತತಾ. ನೇಕ್ಖಮ್ಮಸಙ್ಕಪ್ಪೋ ಅಬ್ಯಾಪಾದಸಙ್ಕಪ್ಪೋ ಅವಿಹಿಂಸಾಸಙ್ಕಪ್ಪೋ ಅಯಂ ವೇಮತ್ತತಾ. ಸಮ್ಮಾದಿಟ್ಠಿಪುರೇಕ್ಖಾರೋತಿ ಏಕತ್ತತಾ. ಸಮ್ಮಾದಿಟ್ಠಿ ನಾಮ ಯಂ ದುಕ್ಖೇ ಞಾಣಂ ದುಕ್ಖಸಮುದಯೇ ಞಾಣಂ ದುಕ್ಖನಿರೋಧೇ ಞಾಣಂ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಞಾಣಂ ಮಗ್ಗೇ ಞಾಣಂ ಹೇತುಮ್ಹಿ ಞಾಣಂ ಹೇತುಸಮುಪ್ಪನ್ನೇಸು ಧಮ್ಮೇಸು ಞಾಣಂ ಪಚ್ಚಯೇ ಞಾಣಂ ಪಚ್ಚಯಸಮುಪ್ಪನ್ನೇಸು ಧಮ್ಮೇಸು ಞಾಣಂ, ಯಂ ತತ್ಥ ತತ್ಥ ಯಥಾಭೂತಂ ಞಾಣದಸ್ಸನಂ ಅಭಿಸಮಯೋ ಸಮ್ಪಟಿವೇಧೋ ಸಚ್ಚಾಗಮನಂ, ಅಯಂ ವೇಮತ್ತತಾ. ಞತ್ವಾನ ಉದಯಬ್ಬಯನ್ತಿ ಏಕತ್ತತಾ, ಉದಯೇನ ಅವಿಜ್ಜಾಪಚ್ಚಯಾ ಸಙ್ಖಾರಾ, ಸಙ್ಖಾರಪಚ್ಚಯಾ ವಿಞ್ಞಾಣಂ, ಏವಂ ಸಬ್ಬಂ ಸಮುದಯೋ ಭವತಿ. ವಯೇನ ಅವಿಜ್ಜಾನಿರೋಧಾ ಸಙ್ಖಾರನಿರೋಧೋ, ಏವಂ ಸಬ್ಬಂ ನಿರೋಧೋ ಹೋತಿ, ಅಯಂ ವೇಮತ್ತತಾ. ಥಿನಮಿದ್ಧಾಭಿಭೂ ಭಿಕ್ಖೂತಿ ಏಕತ್ತತಾ, ಥಿನಂ ನಾಮ ಯಾ ಚಿತ್ತಸ್ಸ ಅಕಲ್ಲತಾ ಅಕಮ್ಮನಿಯತಾ, ಮಿದ್ಧಂ ನಾಮ ಯಂ ಕಾಯಸ್ಸ ಲೀನತ್ತಂ, ಅಯಂ ವೇಮತ್ತತಾ. ಸಬ್ಬಾ ದುಗ್ಗತಿಯೋ ಜಹೇತಿ ಏಕತ್ತತಾ, ದೇವಮನುಸ್ಸೇ ವಾ ಉಪನಿಧಾಯ ಅಪಾಯಾ ದುಗ್ಗತಿ, ನಿಬ್ಬಾನಂ ವಾ ಉಪನಿಧಾಯ ಸಬ್ಬಾ ಉಪಪತ್ತಿಯೋ ದುಗ್ಗತಿ, ಅಯಂ ವೇಮತ್ತತಾ.

ನಿಯುತ್ತೋ ಅಧಿಟ್ಠಾನೋ ಹಾರಸಮ್ಪಾತೋ.