೧೨. ಭದ್ರಾವುಧಮಾಣವಪುಚ್ಛಾ

೧೨೬. ‘‘ಓಕಞ್ಜಹಂ ತಣ್ಹಚ್ಛಿದಂ ಅನೇಜಂ, [ಇಚ್ಚಾಯಸ್ಮಾ ಭದ್ರಾವುಧೋ]

ನನ್ದಿಞ್ಜಹಂ ಓಘತಿಣ್ಣಂ ವಿಮುತ್ತಂ;

ಕಪ್ಪಞ್ಜಹಂ ಅಭಿಯಾಚೇ ಸುಮೇಧಂ, ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ ಇತೋ.

೧೨೭. ‘‘ನಾನಾಜನಾ ಜನಪದೇಹಿ ಸಙ್ಗತಾ,

ತವ ವೀರ ವಾಕ್ಯಂ ಅಭಿಕಙ್ಖಮಾನಾ;

ತೇಸಂ ತುವಂ ಸಾಧು ವಿಯಾಕರೋಹಿ, ತಥಾ ಹಿ ತೇ ವಿದಿತೋ ಏಸ ಧಮ್ಮೋ’’.

೧೨೮. ‘‘ಆದಾನತಣ್ಹಂ ವಿನಯೇಥ ಸಬ್ಬಂ, [ಭದ್ರಾವುಧಾತಿ ಭಗವಾ]

ಉದ್ಧಂ ಅಧೋ ತಿರಿಯಞ್ಚಾಪಿ ಮಜ್ಝೇ;

ಯಂ ಯಞ್ಹಿ ಲೋಕಸ್ಮಿಮುಪಾದಿಯನ್ತಿ, ತೇನೇವ ಮಾರೋ ಅನ್ವೇತಿ ಜನ್ತುಂ.

೧೨೯. ‘‘ತಸ್ಮಾ ಪಜಾನಂ ನ ಉಪಾದಿಯೇಥ, ಭಿಕ್ಖು ಸತೋ ಕಿಞ್ಚನಂ ಸಬ್ಬಲೋಕೇ;

ಆದಾನಸತ್ತೇ ಇತಿ ಪೇಕ್ಖಮಾನೋ, ಪಜಂ ಇಮಂ ಮಚ್ಚುಧೇಯ್ಯೇ ವಿಸತ್ತ’’ನ್ತಿ.

ಭದ್ರಾವುಧಮಾಣವಪುಚ್ಛಾ ದ್ವಾದಸಮಾ.