೧೩. ಉದಯಮಾಣವಪುಚ್ಛಾ

೧೩೦. ‘‘ಝಾಯಿಂ ವಿರಜಮಾಸೀನಂ, [ಇಚ್ಚಾಯಸ್ಮಾ ಉದಯೋ]

ಕತಕಿಚ್ಚಂ ಅನಾಸವಂ;

ಪಾರಗುಂ ಸಬ್ಬಧಮ್ಮಾನಂ, ಅತ್ಥಿ ಪಞ್ಹೇನ ಆಗಮಂ;

ಅಞ್ಞಾವಿಮೋಕ್ಖಂ ಪಬ್ರೂಹಿ, ಅವಿಜ್ಜಾಯ ಪಭೇದನಂ’’.

೧೩೧. ‘‘ಪಹಾನಂ ಕಾಮಚ್ಛನ್ದಾನಂ, [ಉದಯಾತಿ ಭಗವಾ]

ದೋಮನಸ್ಸಾನ ಚೂಭಯಂ;

ಥಿನಸ್ಸ ಚ ಪನೂದನಂ, ಕುಕ್ಕುಚ್ಚಾನಂ ನಿವಾರಣಂ.

೧೩೨. ‘‘ಉಪೇಕ್ಖಾಸತಿಸಂಸುದ್ಧಂ, ಧಮ್ಮತಕ್ಕಪುರೇಜವಂ;

ಅಞ್ಞಾವಿಮೋಕ್ಖಂ ಪಬ್ರೂಮಿ, ಅವಿಜ್ಜಾಯ ಪಭೇದನಂ’’.

೧೩೩. ‘‘ಕಿಂಸು ಸಂಯೋಜನೋ ಲೋಕೋ, ಕಿಂಸು ತಸ್ಸ ವಿಚಾರಣಂ;

ಕಿಸ್ಸಸ್ಸ ವಿಪ್ಪಹಾನೇನ, ನಿಬ್ಬಾನಂ ಇತಿ ವುಚ್ಚತಿ’’.

೧೩೪. ‘‘ನನ್ದಿಸಂಯೋಜನೋ ಲೋಕೋ, ವಿತಕ್ಕಸ್ಸ ವಿಚಾರಣಂ;

ತಣ್ಹಾಯ ವಿಪ್ಪಹಾನೇನ, ನಿಬ್ಬಾನಂ ಇತಿ ವುಚ್ಚತಿ’’.

೧೩೫. ‘‘ಕಥಂ ಸತಸ್ಸ ಚರತೋ, ವಿಞ್ಞಾಣಂ ಉಪರುಜ್ಝತಿ;

ಭಗವನ್ತಂ ಪುಟ್ಠುಮಾಗಮ್ಮ, ತಂ ಸುಣೋಮ ವಚೋ ತವ’’.

೧೩೬. ‘‘ಅಜ್ಝತ್ತಞ್ಚ ಬಹಿದ್ಧಾ ಚ, ವೇದನಂ ನಾಭಿನನ್ದತೋ;

ಏವಂ ಸತಸ್ಸ ಚರತೋ, ವಿಞ್ಞಾಣಂ ಉಪರುಜ್ಝತೀ’’ತಿ.

ಉದಯಮಾಣವಪುಚ್ಛಾ ತೇರಸಮಾ.