೬. ಅಪುಞ್ಞಪಞ್ಹೋ

೬. ‘‘ಭನ್ತೇ ನಾಗಸೇನ, ತುಮ್ಹೇ ಭಣಥ ‘ಯೋ ಅಜಾನನ್ತೋ ಪಾಣಾತಿಪಾತಂ ಕರೋತಿ, ಸೋ ಬಲವತರಂ ಅಪುಞ್ಞಂ ಪಸವತೀ’ತಿ. ಪುನ ಚ ಭಗವತಾ ವಿನಯಪಞ್ಞತ್ತಿಯಾ ಭಣಿತಂ ‘ಅನಾಪತ್ತಿ ಅಜಾನನ್ತಸ್ಸಾ’ತಿ. ಯದಿ, ಭನ್ತೇ ನಾಗಸೇನ, ಅಜಾನಿತ್ವಾ ಪಾಣಾತಿಪಾತಂ ಕರೋನ್ತೋ ಬಲವತರಂ ಅಪುಞ್ಞಂ ಪಸವತಿ, ತೇನ ಹಿ ‘ಅನಾಪತ್ತಿ ಅಜಾನನ್ತಸ್ಸಾ’ತಿ ಯಂ ವಚನಂ, ತಂ ಮಿಚ್ಛಾ. ಯದಿ ಅನಾಪತ್ತಿ ಅಜಾನನ್ತಸ್ಸ, ತೇನ ಹಿ ‘ಅಜಾನಿತ್ವಾ ಪಾಣಾತಿಪಾತಂ ಕರೋನ್ತೋ ಬಲವತರಂ ಅಪುಞ್ಞಂ ಪಸವತೀ’ತಿ ತಮ್ಪಿ ವಚನಂ ಮಿಚ್ಛಾ. ಅಯಮ್ಪಿ ಉಭತೋ ಕೋಟಿಕೋ ಪಞ್ಹೋ ದುರುತ್ತರೋ ದುರತಿಕ್ಕಮೋ ತವಾನುಪ್ಪತ್ತೋ, ಸೋ ತಯಾ ನಿಬ್ಬಾಹಿತಬ್ಬೋ’’ತಿ.

‘‘ಭಾಸಿತಮ್ಪೇತಂ, ಮಹಾರಾಜ, ಭಗವತಾ ‘ಯೋ ಅಜಾನನ್ತೋ ಪಾಣಾತಿಪಾತಂ ಕರೋತಿ, ಸೋ ಬಲವತರಂ ಅಪುಞ್ಞಂ ಪಸವತೀ’ತಿ. ಪುನ ಚ ವಿನಯಪಞ್ಞತ್ತಿಯಾ ಭಗವತಾ ಭಣಿತಂ ‘ಅನಾಪತ್ತಿ ಅಜಾನನ್ತಸ್ಸಾ’ತಿ. ತತ್ಥ ಅತ್ಥನ್ತರಂ ಅತ್ಥಿ. ಕತಮಂ ಅತ್ಥನ್ತರಂ? ಅತ್ಥಿ, ಮಹಾರಾಜ, ಆಪತ್ತಿ ಸಞ್ಞಾವಿಮೋಕ್ಖಾ, ಅತ್ಥಿ ಆಪತ್ತಿ ನೋಸಞ್ಞಾವಿಮೋಕ್ಖಾ. ಯಾಯಂ, ಮಹಾರಾಜ, ಆಪತ್ತಿ ಸಞ್ಞಾವಿಮೋಕ್ಖಾ, ತಂ ಆಪತ್ತಿಂ ಆರಬ್ಭ ಭಗವತಾ ಭಣಿತಂ ‘ಅನಾಪತ್ತಿ ಅಜಾನನ್ತಸ್ಸಾ’’ತಿ. ‘‘ಸಾಧು, ಭನ್ತೇ ನಾಗಸೇನ, ಏವಮೇತಂ ತಥಾ ಸಮ್ಪಟಿಚ್ಛಾಮೀ’’ತಿ.

ಅಪುಞ್ಞಪಞ್ಹೋ ಛಟ್ಠೋ.