೮. ನಿಧಿಕಣ್ಡಸುತ್ತಂ

೧. ನಿಧಿಂ ನಿಧೇತಿ ಪುರಿಸೋ, ಗಮ್ಭೀರೇ ಓದಕನ್ತಿಕೇ;

ಅತ್ಥೇ ಕಿಚ್ಚೇ ಸಮುಪ್ಪನ್ನೇ, ಅತ್ಥಾಯ ಮೇ ಭವಿಸ್ಸತಿ.

೨. ರಾಜತೋ ವಾ ದುರುತ್ತಸ್ಸ, ಚೋರತೋ ಪೀಳಿತಸ್ಸ ವಾ;

ಇಣಸ್ಸ ವಾ ಪಮೋಕ್ಖಾಯ, ದುಬ್ಭಿಕ್ಖೇ ಆಪದಾಸು ವಾ;

ಏತದತ್ಥಾಯ ಲೋಕಸ್ಮಿಂ, ನಿಧಿ ನಾಮ ನಿಧೀಯತಿ.

೩. ತಾವಸ್ಸುನಿಹಿತೋ [ತಾವ ಸುನಿಹಿತೋ (ಸೀ.)] ಸನ್ತೋ, ಗಮ್ಭೀರೇ ಓದಕನ್ತಿಕೇ;

ನ ಸಬ್ಬೋ ಸಬ್ಬದಾ ಏವ, ತಸ್ಸ ತಂ ಉಪಕಪ್ಪತಿ.

೪. ನಿಧಿ ವಾ ಠಾನಾ ಚವತಿ, ಸಞ್ಞಾ ವಾಸ್ಸ ವಿಮುಯ್ಹತಿ;

ನಾಗಾ ವಾ ಅಪನಾಮೇನ್ತಿ, ಯಕ್ಖಾ ವಾಪಿ ಹರನ್ತಿ ನಂ.

೫. ಅಪ್ಪಿಯಾ ವಾಪಿ ದಾಯಾದಾ, ಉದ್ಧರನ್ತಿ ಅಪಸ್ಸತೋ;

ಯದಾ ಪುಞ್ಞಕ್ಖಯೋ ಹೋತಿ, ಸಬ್ಬಮೇತಂ ವಿನಸ್ಸತಿ.

೬. ಯಸ್ಸ ದಾನೇನ ಸೀಲೇನ, ಸಂಯಮೇನ ದಮೇನ ಚ;

ನಿಧೀ ಸುನಿಹಿತೋ ಹೋತಿ, ಇತ್ಥಿಯಾ ಪುರಿಸಸ್ಸ ವಾ.

೭. ಚೇತಿಯಮ್ಹಿ ಚ ಸಙ್ಘೇ ವಾ, ಪುಗ್ಗಲೇ ಅತಿಥೀಸು ವಾ;

ಮಾತರಿ ಪಿತರಿ ಚಾಪಿ [ವಾಪಿ (ಸ್ಯಾ. ಕಂ.)], ಅಥೋ ಜೇಟ್ಠಮ್ಹಿ ಭಾತರಿ.

೮. ಏಸೋ ನಿಧಿ ಸುನಿಹಿತೋ, ಅಜೇಯ್ಯೋ ಅನುಗಾಮಿಕೋ;

ಪಹಾಯ ಗಮನೀಯೇಸು, ಏತಂ ಆದಾಯ ಗಚ್ಛತಿ.

೯. ಅಸಾಧಾರಣಮಞ್ಞೇಸಂ, ಅಚೋರಾಹರಣೋ ನಿಧಿ;

ಕಯಿರಾಥ ಧೀರೋ ಪುಞ್ಞಾನಿ, ಯೋ ನಿಧಿ ಅನುಗಾಮಿಕೋ.

೧೦. ಏಸ ದೇವಮನುಸ್ಸಾನಂ, ಸಬ್ಬಕಾಮದದೋ ನಿಧಿ;

ಯಂ ಯದೇವಾಭಿಪತ್ಥೇನ್ತಿ, ಸಬ್ಬಮೇತೇನ ಲಬ್ಭತಿ.

೧೧. ಸುವಣ್ಣತಾ ಸುಸರತಾ, ಸುಸಣ್ಠಾನಾ ಸುರೂಪತಾ [ಸುಸಣ್ಠಾನಸುರೂಪತಾ (ಸೀ.), ಸುಸಣ್ಠಾನಂ ಸುರೂಪತಾ (ಸ್ಯಾ. ಕಂ.)];

ಆಧಿಪಚ್ಚಪರಿವಾರೋ, ಸಬ್ಬಮೇತೇನ ಲಬ್ಭತಿ.

೧೨. ಪದೇಸರಜ್ಜಂ ಇಸ್ಸರಿಯಂ, ಚಕ್ಕವತ್ತಿಸುಖಂ ಪಿಯಂ;

ದೇವರಜ್ಜಮ್ಪಿ ದಿಬ್ಬೇಸು, ಸಬ್ಬಮೇತೇನ ಲಬ್ಭತಿ.

೧೩. ಮಾನುಸ್ಸಿಕಾ ಚ ಸಮ್ಪತ್ತಿ, ದೇವಲೋಕೇ ಚ ಯಾ ರತಿ;

ಯಾ ಚ ನಿಬ್ಬಾನಸಮ್ಪತ್ತಿ, ಸಬ್ಬಮೇತೇನ ಲಬ್ಭತಿ.

೧೪. ಮಿತ್ತಸಮ್ಪದಮಾಗಮ್ಮ, ಯೋನಿಸೋವ [ಯೋನಿಸೋ ವೇ (ಸೀ.), ಯೋನಿಸೋ ಚೇ (ಸ್ಯಾ.), ಯೋನಿಸೋ ಚ (?)] ಪಯುಞ್ಜತೋ;

ವಿಜ್ಜಾ ವಿಮುತ್ತಿ ವಸೀಭಾವೋ, ಸಬ್ಬಮೇತೇನ ಲಬ್ಭತಿ.

೧೫. ಪಟಿಸಮ್ಭಿದಾ ವಿಮೋಕ್ಖಾ ಚ, ಯಾ ಚ ಸಾವಕಪಾರಮೀ;

ಪಚ್ಚೇಕಬೋಧಿ ಬುದ್ಧಭೂಮಿ, ಸಬ್ಬಮೇತೇನ ಲಬ್ಭತಿ.

೧೬. ಏವಂ ಮಹತ್ಥಿಕಾ ಏಸಾ, ಯದಿದಂ ಪುಞ್ಞಸಮ್ಪದಾ;

ತಸ್ಮಾ ಧೀರಾ ಪಸಂಸನ್ತಿ, ಪಣ್ಡಿತಾ ಕತಪುಞ್ಞತನ್ತಿ.

ನಿಧಿಕಣ್ಡಸುತ್ತಂ ನಿಟ್ಠಿತಂ.