೯. ಮೇತ್ತಸುತ್ತಂ

೧. ಕರಣೀಯಮತ್ಥಕುಸಲೇನ, ಯನ್ತಸನ್ತಂ ಪದಂ ಅಭಿಸಮೇಚ್ಚ;

ಸಕ್ಕೋ ಉಜೂ ಚ ಸುಹುಜೂ [ಸೂಜೂ (ಸೀ.)] ಚ, ಸುವಚೋ ಚಸ್ಸ ಮುದು ಅನತಿಮಾನೀ.

೨. ಸನ್ತುಸ್ಸಕೋ ಚ ಸುಭರೋ ಚ, ಅಪ್ಪಕಿಚ್ಚೋ ಚ ಸಲ್ಲಹುಕವುತ್ತಿ;

ಸನ್ತಿನ್ದ್ರಿಯೋ ಚ ನಿಪಕೋ ಚ, ಅಪ್ಪಗಬ್ಭೋ ಕುಲೇಸ್ವನನುಗಿದ್ಧೋ.

೩. ನ ಚ ಖುದ್ದಮಾಚರೇ ಕಿಞ್ಚಿ, ಯೇನ ವಿಞ್ಞೂ ಪರೇ ಉಪವದೇಯ್ಯುಂ;

ಸುಖಿನೋವ ಖೇಮಿನೋ ಹೋನ್ತು, ಸಬ್ಬಸತ್ತಾ [ಸಬ್ಬೇ ಸತ್ತಾ (ಸೀ. ಸ್ಯಾ.)] ಭವನ್ತು ಸುಖಿತತ್ತಾ.

೪. ಯೇ ಕೇಚಿ ಪಾಣಭೂತತ್ಥಿ, ತಸಾ ವಾ ಥಾವರಾ ವನವಸೇಸಾ;

ದೀಘಾ ವಾ ಯೇವ ಮಹನ್ತಾ [ಮಹನ್ತ (?)], ಮಜ್ಝಿಮಾ ರಸ್ಸಕಾ ಅಣುಕಥೂಲಾ.

೫. ದಿಟ್ಠಾ ವಾ ಯೇವ ಅದಿಟ್ಠಾ [ಅದಿಟ್ಠ (?)], ಯೇ ವ [ಯೇ ಚ (ಸೀ. ಸ್ಯಾ. ಕಂ. ಪೀ.)] ದೂರೇ ವಸನ್ತಿ ಅವಿದೂರೇ;

ಭೂತಾ ವ [ವಾ (ಸ್ಯಾ. ಕಂ. ಪೀ. ಕ.)] ಸಮ್ಭವೇಸೀ ವ [ವಾ (ಸೀ. ಸ್ಯಾ. ಕಂ. ಪೀ.)], ಸಬ್ಬಸತ್ತಾ ಭವನ್ತು ಸುಖಿತತ್ತಾ.

೬. ನ ಪರೋ ಪರಂ ನಿಕುಬ್ಬೇಥ, ನಾತಿಮಞ್ಞೇಥ ಕತ್ಥಚಿ ನ ಕಞ್ಚಿ [ನಂ ಕಞ್ಚಿ (ಸೀ. ಪೀ.), ನಂ ಕಿಞ್ಚಿ (ಸ್ಯಾ.), ನ ಕಿಞ್ಚಿ (ಕ.)];

ಬ್ಯಾರೋಸನಾ ಪಟಿಘಸಞ್ಞಾ, ನಾಞ್ಞಮಞ್ಞಸ್ಸ ದುಕ್ಖಮಿಚ್ಛೇಯ್ಯ.

೭. ಮಾತಾ ಯಥಾ ನಿಯಂ ಪುತ್ತಮಾಯುಸಾ ಏಕಪುತ್ತಮನುರಕ್ಖೇ;

ಏವಮ್ಪಿ ಸಬ್ಬಭೂತೇಸು, ಮಾನಸಂ ಭಾವಯೇ ಅಪರಿಮಾಣಂ.

೮. ಮೇತ್ತಞ್ಚ ಸಬ್ಬಲೋಕಸ್ಮಿ, ಮಾನಸಂ ಭಾವಯೇ ಅಪರಿಮಾಣಂ;

ಉದ್ಧಂ ಅಧೋ ಚ ತಿರಿಯಞ್ಚ, ಅಸಮ್ಬಾಧಂ ಅವೇರಮಸಪತ್ತಂ.

೯. ತಿಟ್ಠಂ ಚರಂ ನಿಸಿನ್ನೋ ವ [ವಾ (ಸೀ. ಸ್ಯಾ. ಕಂ. ಪೀ.)], ಸಯಾನೋ ಯಾವತಾಸ್ಸ ವಿತಮಿದ್ಧೋ [ವಿಗತಮಿದ್ಧೋ (ಬಹೂಸು)];

ಏತಂ ಸತಿಂ ಅಧಿಟ್ಠೇಯ್ಯ, ಬ್ರಹ್ಮಮೇತಂ ವಿಹಾರಮಿಧಮಾಹು.

೧೦. ದಿಟ್ಠಿಞ್ಚ ಅನುಪಗ್ಗಮ್ಮ, ಸೀಲವಾ ದಸ್ಸನೇನ ಸಮ್ಪನ್ನೋ;

ಕಾಮೇಸು ವಿನಯ [ವಿನೇಯ್ಯ (ಸೀ.)] ಗೇಧಂ, ನ ಹಿ ಜಾತುಗ್ಗಬ್ಭಸೇಯ್ಯ ಪುನ ರೇತೀತಿ.

ಮೇತ್ತಸುತ್ತಂ ನಿಟ್ಠಿತಂ.