೩೮೪. ಧಮ್ಮಧಜಜಾತಕಂ (೬-೧-೯)

೬೪. ಧಮ್ಮಂ ಚರಥ ಞಾತಯೋ, ಧಮ್ಮಂ ಚರಥ ಭದ್ದಂ ವೋ [ಭದ್ದ ವೋ (ಕ.)];

ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ.

೬೫. ಭದ್ದಕೋ ವತಯಂ ಪಕ್ಖೀ, ದಿಜೋ ಪರಮಧಮ್ಮಿಕೋ;

ಏಕಪಾದೇನ ತಿಟ್ಠನ್ತೋ, ಧಮ್ಮಮೇವಾನುಸಾಸತಿ.

೬೬. ನಾಸ್ಸ ಸೀಲಂ ವಿಜಾನಾಥ, ಅನಞ್ಞಾಯ ಪಸಂಸಥ;

ಭುತ್ವಾ ಅಣ್ಡಞ್ಚ ಪೋತಞ್ಚ [ಛಾಪೇ ಚ (ಸೀ. ಪೀ.)], ಧಮ್ಮೋ ಧಮ್ಮೋತಿ ಭಾಸತಿ.

೬೭. ಅಞ್ಞಂ ಭಣತಿ ವಾಚಾಯ, ಅಞ್ಞಂ ಕಾಯೇನ ಕುಬ್ಬತಿ;

ವಾಚಾಯ ನೋ ಚ ಕಾಯೇನ, ನ ತಂ ಧಮ್ಮಂ ಅಧಿಟ್ಠಿತೋ.

೬೮. ವಾಚಾಯ ಸಖಿಲೋ ಮನೋವಿದುಗ್ಗೋ, ಛನ್ನೋ ಕೂಪಸಯೋವ ಕಣ್ಹಸಪ್ಪೋ;

ಧಮ್ಮಧಜೋ ಗಾಮನಿಗಮಾಸುಸಾಧು [ಗಾಮನಿಗಮಾಸು ಸಾಧುಸಮ್ಮತೋ (ಸೀ.), ಗಾಮನಿಗಮಸಾಧು (ಪೀ.)], ದುಜ್ಜಾನೋ ಪುರಿಸೇನ ಬಾಲಿಸೇನ.

೬೯. ಇಮಂ ತುಣ್ಡೇಹಿ ಪಕ್ಖೇಹಿ, ಪಾದಾ ಚಿಮಂ ವಿಹೇಠಥ [ವಿಪೋಥಥ (ಪೀ.)];

ಛವಞ್ಹಿಮಂ ವಿನಾಸೇಥ, ನಾಯಂ ಸಂವಾಸನಾರಹೋತಿ.

ಧಮ್ಮಧಜಜಾತಕಂ ನವಮಂ.