೩೮೧. ಮಿಗಾಲೋಪಜಾತಕಂ (೬-೧-೬)

೩೪. ನ ಮೇ ರುಚ್ಚಿ ಮಿಗಾಲೋಪ, ಯಸ್ಸ ತೇ ತಾದಿಸೀ ಗತೀ;

ಅತುಚ್ಚಂ ತಾತ ಪತಸಿ, ಅಭೂಮಿಂ ತಾತ ಸೇವಸಿ.

೩೫. ಚತುಕ್ಕಣ್ಣಂವ ಕೇದಾರಂ, ಯದಾ ತೇ ಪಥವೀ ಸಿಯಾ;

ತತೋ ತಾತ ನಿವತ್ತಸ್ಸು, ಮಾಸ್ಸು ಏತ್ತೋ ಪರಂ ಗಮಿ.

೩೬. ಸನ್ತಿ ಅಞ್ಞೇಪಿ ಸಕುಣಾ, ಪತ್ತಯಾನಾ ವಿಹಙ್ಗಮಾ;

ಅಕ್ಖಿತ್ತಾ ವಾತವೇಗೇನ, ನಟ್ಠಾ ತೇ ಸಸ್ಸತೀಸಮಾ.

೩೭. ಅಕತ್ವಾ ಅಪನನ್ದಸ್ಸ [ಅಪರಣ್ಣಸ್ಸ (ಸೀ. ಸ್ಯಾ. ಪೀ.)], ಪಿತು ವುದ್ಧಸ್ಸ ಸಾಸನಂ;

ಕಾಲವಾತೇ ಅತಿಕ್ಕಮ್ಮ, ವೇರಮ್ಭಾನಂ ವಸಂ ಅಗಾ [ಗತೋ (ಸೀ.)].

೩೮. ತಸ್ಸ ಪುತ್ತಾ ಚ ದಾರಾ ಚ, ಯೇ ಚಞ್ಞೇ ಅನುಜೀವಿನೋ;

ಸಬ್ಬೇ ಬ್ಯಸನಮಾಪಾದುಂ, ಅನೋವಾದಕರೇ ದಿಜೇ.

೩೯. ಏವಮ್ಪಿ ಇಧ ವುದ್ಧಾನಂ, ಯೋ ವಾಕ್ಯಂ ನಾವಬುಜ್ಝತಿ;

ಅತಿಸೀಮಚರೋ [ಅತಿಸೀಮಂ ಚರೋ (ಸೀ. ಸ್ಯಾ. ಕ.)] ದಿತ್ತೋ, ಗಿಜ್ಝೋವಾತೀತಸಾಸನೋ;

ಸಬ್ಬೇ ಬ್ಯಸನಂ ಪಪ್ಪೋನ್ತಿ, ಅಕತ್ವಾ ಬುದ್ಧಸಾಸನನ್ತಿ.

ಮಿಗಾಲೋಪಜಾತಕಂ ಛಟ್ಠಂ.