೫೪೩. ಭೂರಿದತ್ತಜಾತಕಂ (೬)

೭೮೪. ‘‘ಯಂ ಕಿಞ್ಚಿ ರತನಂ ಅತ್ಥಿ, ಧತರಟ್ಠನಿವೇಸನೇ;

ಸಬ್ಬಾನಿ ತೇ ಉಪಯನ್ತು, ಧೀತರಂ ದೇಹಿ ರಾಜಿನೋ’’.

೭೮೫. ‘‘ನ ನೋ ವಿವಾಹೋ ನಾಗೇಹಿ, ಕತಪುಬ್ಬೋ ಕುದಾಚನಂ;

ತಂ ವಿವಾಹಂ ಅಸಂಯುತ್ತಂ, ಕಥಂ ಅಮ್ಹೇ ಕರೋಮಸೇ’’.

೭೮೬. ‘‘ಜೀವಿತಂ ನೂನ ತೇ ಚತ್ತಂ, ರಟ್ಠಂ ವಾ ಮನುಜಾಧಿಪ;

ನ ಹಿ ನಾಗೇ ಕುಪಿತಮ್ಹಿ, ಚಿರಂ ಜೀವನ್ತಿ ತಾದಿಸಾ.

೭೮೭. ‘‘ಯೋ ತ್ವಂ ದೇವ ಮನುಸ್ಸೋಸಿ, ಇದ್ಧಿಮನ್ತಂ ಅನಿದ್ಧಿಮಾ;

ವರುಣಸ್ಸ ನಿಯಂ ಪುತ್ತಂ, ಯಾಮುನಂ ಅತಿಮಞ್ಞಸಿ’’.

೭೮೮. ‘‘ನಾತಿಮಞ್ಞಾಮಿ ರಾಜಾನಂ, ಧತರಟ್ಠಂ ಯಸಸ್ಸಿನಂ;

ಧತರಟ್ಠೋ ಹಿ ನಾಗಾನಂ, ಬಹೂನಮಪಿ ಇಸ್ಸರೋ.

೭೮೯. ‘‘ಅಹಿ ಮಹಾನುಭಾವೋಪಿ, ನ ಮೇ ಧೀತರಮಾರಹೋ;

ಖತ್ತಿಯೋ ಚ ವಿದೇಹಾನಂ, ಅಭಿಜಾತಾ ಸಮುದ್ದಜಾ’’.

೭೯೦. ‘‘ಕಮ್ಬಲಸ್ಸತರಾ ಉಟ್ಠೇನ್ತು, ಸಬ್ಬೇ ನಾಗೇ ನಿವೇದಯ;

ಬಾರಾಣಸಿಂ ಪವಜ್ಜನ್ತು, ಮಾ ಚ ಕಞ್ಚಿ [ಕಿಞ್ಚಿ (ಸೀ. ಪೀ. ಕ.)] ವಿಹೇಠಯುಂ’’.

೭೯೧. ‘‘ನಿವೇಸನೇಸು ಸೋಬ್ಭೇಸು, ರಥಿಯಾ ಚಚ್ಚರೇಸು ಚ;

ರುಕ್ಖಗ್ಗೇಸು ಚ ಲಮ್ಬನ್ತು, ವಿತತಾ ತೋರಣೇಸು ಚ.

೭೯೨. ‘‘ಅಹಮ್ಪಿ ಸಬ್ಬಸೇತೇನ, ಮಹತಾ ಸುಮಹಂ ಪುರಂ;

ಪರಿಕ್ಖಿಪಿಸ್ಸಂ ಭೋಗೇಹಿ, ಕಾಸೀನಂ ಜನಯಂ ಭಯಂ’’.

೭೯೩. ತಸ್ಸ ತಂ ವಚನಂ ಸುತ್ವಾ, ಉರಗಾನೇಕವಣ್ಣಿನೋ;

ಬಾರಾಣಸಿಂ ಪವಜ್ಜಿಂಸು, ನ ಚ ಕಞ್ಚಿ ವಿಹೇಠಯುಂ.

೭೯೪. ನಿವೇಸನೇಸು ಸೋಬ್ಭೇಸು, ರಥಿಯಾ ಚಚ್ಚರೇಸು ಚ;

ರುಕ್ಖಗ್ಗೇಸು ಚ ಲಮ್ಬಿಂಸು, ವಿತತಾ ತೋರಣೇಸು ಚ.

೭೯೫. ತೇಸು ದಿಸ್ವಾನ ಲಮ್ಬನ್ತೇ, ಪುಥೂ ಕನ್ದಿಂಸು ನಾರಿಯೋ;

ನಾಗೇ ಸೋಣ್ಡಿಕತೇ ದಿಸ್ವಾ, ಪಸ್ಸಸನ್ತೇ ಮುಹುಂ ಮುಹುಂ.

೭೯೬. ಬಾರಾಣಸೀ ಪಬ್ಯಧಿತಾ, ಆತುರಾ ಸಮಪಜ್ಜಥ;

ಬಾಹಾ ಪಗ್ಗಯ್ಹ ಪಕ್ಕನ್ದುಂ, ‘‘ಧೀತರಂ ದೇಹಿ ರಾಜಿನೋ’’.

೭೯೭. ‘‘ಪುಪ್ಫಾಭಿಹಾರಸ್ಸ ವನಸ್ಸ ಮಜ್ಝೇ, ಕೋ ಲೋಹಿತಕ್ಖೋ ವಿತತನ್ತರಂಸೋ;

ಕಾ ಕಮ್ಬುಕಾಯೂರಧರಾ ಸುವತ್ಥಾ, ತಿಟ್ಠನ್ತಿ ನಾರಿಯೋ ದಸ ವನ್ದಮಾನಾ.

೭೯೮. ‘‘ಕೋ ತ್ವಂ ಬ್ರಹಾಬಾಹು ವನಸ್ಸ ಮಜ್ಝೇ, ವಿರೋಚಸಿ ಘತಸಿತ್ತೋವ ಅಗ್ಗಿ;

ಮಹೇಸಕ್ಖೋ ಅಞ್ಞತರೋಸಿ ಯಕ್ಖೋ, ಉದಾಹು ನಾಗೋಸಿ ಮಹಾನುಭಾವೋ’’.

೭೯೯. ‘‘ನಾಗೋಹಮಸ್ಮಿ ಇದ್ಧಿಮಾ, ತೇಜಸ್ಸೀ [ತೇಜಸೀ (ಸೀ. ಸ್ಯಾ. ಪೀ. ಕ.)] ದುರತಿಕ್ಕಮೋ;

ಡಂಸೇಯ್ಯಂ ತೇಜಸಾ ಕುದ್ಧೋ, ಫೀತಂ ಜನಪದಂ ಅಪಿ.

೮೦೦. ‘‘ಸಮುದ್ದಜಾ ಹಿ ಮೇ ಮಾತಾ, ಧತರಟ್ಠೋ ಚ ಮೇ ಪಿತಾ;

ಸುದಸ್ಸನಕನಿಟ್ಠೋಸ್ಮಿ, ಭೂರಿದತ್ತೋತಿ ಮಂ ವಿದೂ’’.

೮೦೧. ‘‘ಯಂ ಗಮ್ಭೀರಂ ಸದಾವಟ್ಟಂ, ರಹದಂ ಭಿಸ್ಮಂ ಪೇಕ್ಖಸಿ;

ಏಸ ದಿಬ್ಯೋ ಮಮಾವಾಸೋ, ಅನೇಕಸತಪೋರಿಸೋ.

೮೦೨. ‘‘ಮಯೂರಕೋಞ್ಚಾಭಿರುದಂ, ನೀಲೋದಂ ವನಮಜ್ಝತೋ;

ಯಮುನಂ ಪವಿಸ ಮಾ ಭೀತೋ, ಖೇಮಂ ವತ್ತವತಂ [ವತ್ತವತಿಂ (ಸ್ಯಾ. ಕ.)] ಸಿವಂ’’.

೮೦೩. ‘‘ತತ್ಥ ಪತ್ತೋ ಸಾನುಚರೋ, ಸಹ ಪುತ್ತೇನ ಬ್ರಾಹ್ಮಣ;

ಪೂಜಿತೋ ಮಯ್ಹಂ ಕಾಮೇಹಿ, ಸುಖಂ ಬ್ರಾಹ್ಮಣ ವಚ್ಛಸಿ’’.

೮೦೪. ‘‘ಸಮಾ ಸಮನ್ತಪರಿತೋ, ಪಹೂತತಗರಾ [ಬಹುಕಾ ತಗ್ಗರಾ (ಸೀ. ಸ್ಯಾ. ಪೀ.)] ಮಹೀ;

ಇನ್ದಗೋಪಕಸಞ್ಛನ್ನಾ, ಸೋಭತಿ ಹರಿತುತ್ತಮಾ.

೮೦೫. ‘‘ರಮ್ಮಾನಿ ವನಚೇತ್ಯಾನಿ, ರಮ್ಮಾ ಹಂಸೂಪಕೂಜಿತಾ;

ಓಪುಪ್ಫಾಪದ್ಮಾ ತಿಟ್ಠನ್ತಿ, ಪೋಕ್ಖರಞ್ಞೋ [ಪೋಕ್ಖರಞ್ಞಾ (ಸ್ಯಾ. ಪೀ.)] ಸುನಿಮ್ಮಿತಾ.

೮೦೬. ‘‘ಅಟ್ಠಂಸಾ ಸುಕತಾ ಥಮ್ಭಾ, ಸಬ್ಬೇ ವೇಳುರಿಯಾಮಯಾ;

ಸಹಸ್ಸಥಮ್ಭಾ ಪಾಸಾದಾ, ಪೂರಾ ಕಞ್ಞಾಹಿ ಜೋತರೇ.

೮೦೭. ‘‘ವಿಮಾನಂ ಉಪಪನ್ನೋಸಿ, ದಿಬ್ಯಂ ಪುಞ್ಞೇಹಿ ಅತ್ತನೋ;

ಅಸಮ್ಬಾಧಂ ಸಿವಂ ರಮ್ಮಂ, ಅಚ್ಚನ್ತಸುಖಸಂಹಿತಂ.

೮೦೮. ‘‘ಮಞ್ಞೇ ಸಹಸ್ಸನೇತ್ತಸ್ಸ, ವಿಮಾನಂ ನಾಭಿಕಙ್ಖಸಿ;

ಇದ್ಧೀ ಹಿ ತ್ಯಾಯಂ ವಿಪುಲಾ, ಸಕ್ಕಸ್ಸೇವ ಜುತೀಮತೋ’’.

೮೦೯. ‘‘ಮನಸಾಪಿ ನ ಪತ್ತಬ್ಬೋ, ಆನುಭಾವೋ ಜುತೀಮತೋ;

ಪರಿಚಾರಯಮಾನಾನಂ, ಸಇನ್ದಾನಂ [ಇನ್ದಾನಂ (ಸ್ಯಾ. ಕ.)] ವಸವತ್ತಿನಂ’’.

೮೧೦. ‘‘ತಂ ವಿಮಾನಂ ಅಭಿಜ್ಝಾಯ, ಅಮರಾನಂ ಸುಖೇಸಿನಂ;

ಉಪೋಸಥಂ ಉಪವಸನ್ತೋ, ಸೇಮಿ ವಮ್ಮಿಕಮುದ್ಧನಿ’’.

೮೧೧. ‘‘ಅಹಞ್ಚ ಮಿಗಮೇಸಾನೋ, ಸಪುತ್ತೋ ಪಾವಿಸಿಂ ವನಂ;

ತಂ ಮಂ ಮತಂ ವಾ ಜೀವಂ ವಾ, ನಾಭಿವೇದೇನ್ತಿ ಞಾತಕಾ.

೮೧೨. ‘‘ಆಮನ್ತಯೇ ಭೂರಿದತ್ತಂ, ಕಾಸಿಪುತ್ತಂ ಯಸಸ್ಸಿನಂ;

ತಯಾ ನೋ ಸಮನುಞ್ಞಾತಾ, ಅಪಿ ಪಸ್ಸೇಮು ಞಾತಕೇ’’.

೮೧೩. ‘‘ಏಸೋ ಹಿ ವತ ಮೇ ಛನ್ದೋ, ಯಂ ವಸೇಸಿ ಮಮನ್ತಿಕೇ;

ನ ಹಿ ಏತಾದಿಸಾ ಕಾಮಾ, ಸುಲಭಾ ಹೋನ್ತಿ ಮಾನುಸೇ.

೮೧೪. ‘‘ಸಚೇ ತ್ವಂ ನಿಚ್ಛಸೇ ವತ್ಥುಂ, ಮಮ ಕಾಮೇಹಿ ಪೂಜಿತೋ;

ಮಯಾ ತ್ವಂ ಸಮನುಞ್ಞಾತೋ, ಸೋತ್ಥಿಂ ಪಸ್ಸಾಹಿ ಞಾತಕೇ’’.

೮೧೫. ‘‘ಧಾರಯಿಮಂ ಮಣಿಂ ದಿಬ್ಯಂ, ಪಸುಂ ಪುತ್ತೇ ಚ ವಿನ್ದತಿ;

ಅರೋಗೋ ಸುಖಿತೋ ಹೋತಿ [ಹೋಹಿ (ಸ್ಯಾ.)], ಗಚ್ಛೇವಾದಾಯ ಬ್ರಾಹ್ಮಣ’’.

೮೧೬. ‘‘ಕುಸಲಂ ಪಟಿನನ್ದಾಮಿ, ಭೂರಿದತ್ತ ವಚೋ ತವ;

ಪಬ್ಬಜಿಸ್ಸಾಮಿ ಜಿಣ್ಣೋಸ್ಮಿ, ನ ಕಾಮೇ ಅಭಿಪತ್ಥಯೇ’’.

೮೧೭. ‘‘ಬ್ರಹ್ಮಚರಿಯಸ್ಸ ಚೇ ಭಙ್ಗೋ, ಹೋತಿ ಭೋಗೇಹಿ ಕಾರಿಯಂ;

ಅವಿಕಮ್ಪಮಾನೋ ಏಯ್ಯಾಸಿ, ಬಹುಂ ದಸ್ಸಾಮಿ ತೇ ಧನಂ’’.

೮೧೮. ‘‘ಕುಸಲಂ ಪಟಿನನ್ದಾಮಿ, ಭೂರಿದತ್ತ ವಚೋ ತವ;

ಪುನಪಿ ಆಗಮಿಸ್ಸಾಮಿ, ಸಚೇ ಅತ್ಥೋ ಭವಿಸ್ಸತಿ’’.

೮೧೯. ‘‘ಇದಂ ವತ್ವಾ ಭೂರಿದತ್ತೋ, ಪೇಸೇಸಿ ಚತುರೋ ಜನೇ;

ಏಥ ಗಚ್ಛಥ ಉಟ್ಠೇಥ, ಖಿಪ್ಪಂ ಪಾಪೇಥ ಬ್ರಾಹ್ಮಣಂ.

೮೨೦. ತಸ್ಸ ತಂ ವಚನಂ ಸುತ್ವಾ, ಉಟ್ಠಾಯ ಚತುರೋ ಜನಾ;

ಪೇಸಿತಾ ಭೂರಿದತ್ತೇನ, ಖಿಪ್ಪಂ ಪಾಪೇಸು ಬ್ರಾಹ್ಮಣಂ.

೮೨೧. ‘‘ಮಣಿಂ ಪಗ್ಗಯ್ಹ ಮಙ್ಗಲ್ಯಂ, ಸಾಧುವಿತ್ತಂ [ಸಾಧುಚಿತ್ತಂ (ಪೀ.)] ಮನೋರಮಂ;

ಸೇಲಂ ಬ್ಯಞ್ಜನಸಮ್ಪನ್ನಂ, ಕೋ ಇಮಂ ಮಣಿಮಜ್ಝಗಾ’’.

೮೨೨. ‘‘ಲೋಹಿತಕ್ಖಸಹಸ್ಸಾಹಿ, ಸಮನ್ತಾ ಪರಿವಾರಿತಂ;

ಅಜ್ಜ ಕಾಲಂ ಪಥಂ [ಪದಂ (ಸೀ. ಪೀ.)] ಗಚ್ಛಂ, ಅಜ್ಝಗಾಹಂ ಮಣಿಂ ಇಮಂ’’.

೮೨೩. ‘‘ಸುಪಚಿಣ್ಣೋ ಅಯಂ ಸೇಲೋ, ಅಚ್ಚಿತೋ ಮಹಿತೋ [ಮಾನಿತೋ (ಕ.)] ಸದಾ;

ಸುಧಾರಿತೋ ಸುನಿಕ್ಖಿತ್ತೋ, ಸಬ್ಬತ್ಥಮಭಿಸಾಧಯೇ.

೮೨೪. ‘‘ಉಪಚಾರವಿಪನ್ನಸ್ಸ, ನಿಕ್ಖೇಪೇ ಧಾರಣಾಯ ವಾ;

ಅಯಂ ಸೇಲೋ ವಿನಾಸಾಯ, ಪರಿಚಿಣ್ಣೋ ಅಯೋನಿಸೋ.

೮೨೫. ‘‘ನ ಇಮಂ ಅಕುಸಲೋ [ಕುಸಲಂ (ಕ.)] ದಿಬ್ಯಂ, ಮಣಿಂ ಧಾರೇತುಮಾರಹೋ;

ಪಟಿಪಜ್ಜ ಸತಂ ನಿಕ್ಖಂ, ದೇಹಿಮಂ ರತನಂ ಮಮ’’.

೮೨೬. ‘‘ನ ಚ ಮ್ಯಾಯಂ ಮಣೀ ಕೇಯ್ಯೋ, ಗೋಹಿ [ಕೇಹಿ (ಕ.)] ವಾ ರತನೇಹಿ ವಾ;

ಸೇಲೋ ಬ್ಯಞ್ಜನಸಮ್ಪನ್ನೋ, ನೇವ ಕೇಯ್ಯೋ ಮಣೀ ಮಮ’’.

೮೨೭. ‘‘ನೋ ಚೇ ತಯಾ ಮಣೀ ಕೇಯ್ಯೋ, ಗೋಹಿ [ಕೇಹಿ (ಕ.)] ವಾ ರತನೇಹಿ ವಾ;

ಅಥ ಕೇನ ಮಣೀ ಕೇಯ್ಯೋ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.

೮೨೮. ‘‘ಯೋ ಮೇ ಸಂಸೇ ಮಹಾನಾಗಂ, ತೇಜಸ್ಸಿಂ ದುರತಿಕ್ಕಮಂ;

ತಸ್ಸ ದಜ್ಜಂ ಇಮಂ ಸೇಲಂ, ಜಲನ್ತಮಿವ ತೇಜಸಾ’’.

೮೨೯. ‘‘ಕೋ ನು ಬ್ರಾಹ್ಮಣವಣ್ಣೇನ, ಸುಪಣ್ಣೋ ಪತತಂ ವರೋ;

ನಾಗಂ ಜಿಗೀಸಮನ್ವೇಸಿ, ಅನ್ವೇಸಂ ಭಕ್ಖಮತ್ತನೋ.

೮೩೦. ‘‘ನಾಹಂ ದಿಜಾಧಿಪೋ ಹೋಮಿ, ನ ದಿಟ್ಠೋ ಗರುಳೋ ಮಯಾ;

ಆಸೀವಿಸೇನ ವಿತ್ತೋತಿ [ವಿತ್ತೋಸ್ಮಿ (ಸ್ಯಾ. ಕ.)], ವಜ್ಜೋ ಬ್ರಾಹ್ಮಣ ಮಂ ವಿದೂ’’.

೮೩೧. ‘‘ಕಿಂ ನು ತುಯ್ಹಂ ಬಲಂ ಅತ್ಥಿ, ಕಿಂ ಸಿಪ್ಪಂ ವಿಜ್ಜತೇ ತವ;

ಕಿಸ್ಮಿಂ ವಾ ತ್ವಂ ಪರತ್ಥದ್ಧೋ, ಉರಗಂ ನಾಪಚಾಯಸಿ’’.

೮೩೨. ‘‘ಆರಞ್ಞಿಕಸ್ಸ ಇಸಿನೋ, ಚಿರರತ್ತಂ ತಪಸ್ಸಿನೋ;

ಸುಪಣ್ಣೋ ಕೋಸಿಯಸ್ಸಕ್ಖಾ, ವಿಸವಿಜ್ಜಂ ಅನುತ್ತರಂ.

೮೩೩. ‘‘ತಂ ಭಾವಿತತ್ತಞ್ಞತರಂ, ಸಮ್ಮನ್ತಂ ಪಬ್ಬತನ್ತರೇ;

ಸಕ್ಕಚ್ಚಂ ತಂ ಉಪಟ್ಠಾಸಿಂ, ರತ್ತಿನ್ದಿವಮತನ್ದಿತೋ.

೮೩೪. ‘‘ಸೋ ತದಾ ಪರಿಚಿಣ್ಣೋ ಮೇ, ವತ್ತವಾ ಬ್ರಹ್ಮಚರಿಯವಾ;

ದಿಬ್ಬಂ ಪಾತುಕರೀ ಮನ್ತಂ, ಕಾಮಸಾ ಭಗವಾ ಮಮ.

೮೩೫. ‘‘ತ್ಯಾಹಂ ಮನ್ತೇ ಪರತ್ಥದ್ಧೋ, ನಾಹಂ ಭಾಯಾಮಿ ಭೋಗಿನಂ;

ಆಚರಿಯೋ ವಿಸಘಾತಾನಂ, ಅಲಮ್ಪಾನೋತಿ [ಆಲಮ್ಬಾನೋತಿ (ಸೀ. ಪೀ.), ಆಲಮ್ಬಾಯನೋತಿ (ಸ್ಯಾ.)] ಮಂ ವಿದೂ’’.

೮೩೬. ‘‘ಗಣ್ಹಾಮಸೇ ಮಣಿಂ ತಾತ, ಸೋಮದತ್ತ ವಿಜಾನಹಿ;

ಮಾ ದಣ್ಡೇನ ಸಿರಿಂ ಪತ್ತಂ, ಕಾಮಸಾ ಪಜಹಿಮ್ಹಸೇ’’.

೮೩೭. ‘‘ಸಕಂ ನಿವೇಸನಂ ಪತ್ತಂ, ಯೋ ತಂ ಬ್ರಾಹ್ಮಣ ಪೂಜಯಿ;

ಏವಂ ಕಲ್ಯಾಣಕಾರಿಸ್ಸ, ಕಿಂ ಮೋಹಾ ದುಬ್ಭಿಮಿಚ್ಛಸಿ’’.

೮೩೮. ‘‘ಸಚೇ ತ್ವಂ [ಸಚೇ ಹಿ (ಸೀ. ಪೀ. ಕ.)] ಧನಕಾಮೋಸಿ, ಭೂರಿದತ್ತೋ ಪದಸ್ಸತಿ [ಭೂರಿದತ್ತಂ ಪದಿಸ್ಸಸಿ (ಕ.)];

ತಮೇವ ಗನ್ತ್ವಾ ಯಾಚಸ್ಸು, ಬಹುಂ ದಸ್ಸತಿ ತೇ ಧನಂ’’.

೮೩೯. ‘‘ಹತ್ಥಗತಂ ಪತ್ತಗತಂ, ನಿಕಿಣ್ಣಂ ಖಾದಿತುಂ ವರಂ;

ಮಾ ನೋ ಸನ್ದಿಟ್ಠಿಕೋ ಅತ್ಥೋ, ಸೋಮದತ್ತ ಉಪಚ್ಚಗಾ’’.

೮೪೦. ‘‘ಪಚ್ಚತಿ ನಿರಯೇ ಘೋರೇ, ಮಹಿಸ್ಸಮಪಿ ವಿವರತಿ [ಮಹಿಸ್ಸಮವ ದೀಯತಿ (ಸೀ. ಪೀ.), ಮಹಿಮಸ್ಸ ವಿನ್ದ್ರೀಯತಿ (ಸ್ಯಾ.)];

ಮಿತ್ತದುಬ್ಭೀ ಹಿತಚ್ಚಾಗೀ, ಜೀವರೇವಾಪಿ ಸುಸ್ಸತಿ [ಜೀವರೇ ಚಾಪಿ ಸುಸ್ಸರೇ (ಸೀ. ಪೀ.)].

೮೪೧. ‘‘ಸಚೇ ತ್ವಂ [ಸಚೇ ಹಿ (ಸೀ. ಪೀ. ಕ.)] ಧನಕಾಮೋಸಿ, ಭೂರಿದತ್ತೋ ಪದಸ್ಸತಿ;

ಮಞ್ಞೇ ಅತ್ತಕತಂ ವೇರಂ, ನಚಿರಂ ವೇದಯಿಸ್ಸಸಿ’’.

೮೪೨. ‘‘ಮಹಾಯಞ್ಞಂ ಯಜಿತ್ವಾನ, ಏವಂ ಸುಜ್ಝನ್ತಿ ಬ್ರಾಹ್ಮಣಾ;

ಮಹಾಯಞ್ಞಂ ಯಜಿಸ್ಸಾಮ, ಏವಂ ಮೋಕ್ಖಾಮ ಪಾಪಕಾ’’.

೮೪೩. ‘‘ಹನ್ದ ದಾನಿ ಅಪಾಯಾಮಿ, ನಾಹಂ ಅಜ್ಜ ತಯಾ ಸಹ;

ಪದಮ್ಪೇಕಂ [ಪದಮೇಕಂ (ಸ್ಯಾ. ಕ.)] ನ ಗಚ್ಛೇಯ್ಯಂ, ಏವಂ ಕಿಬ್ಬಿಸಕಾರಿನಾ’’.

೮೪೪. ‘‘ಇದಂ ವತ್ವಾನ ಪಿತರಂ, ಸೋಮದತ್ತೋ ಬಹುಸ್ಸುತೋ;

ಉಜ್ಝಾಪೇತ್ವಾನ ಭೂತಾನಿ, ತಮ್ಹಾ ಠಾನಾ ಅಪಕ್ಕಮಿ.

೮೪೫. ‘‘ಗಣ್ಹಾಹೇತಂ ಮಹಾನಾಗಂ, ಆಹರೇತಂ ಮಣಿಂ ಮಮ;

ಇನ್ದಗೋಪಕವಣ್ಣಾಭೋ, ಯಸ್ಸ ಲೋಹಿತಕೋ ಸಿರೋ.

೮೪೬. ‘‘ಕಪ್ಪಾಸಪಿಚುರಾಸೀವ, ಏಸೋ ಕಾಯೋ ಪದಿಸ್ಸತಿ [ಕಾಯ’ಸ್ಸ ದಿಸ್ಸತಿ (ಸೀ. ಪೀ.)];

ವಮ್ಮಿಕಗ್ಗಗತೋ ಸೇತಿ, ತಂ ತ್ವಂ ಗಣ್ಹಾಹಿ ಬ್ರಾಹ್ಮಣ’’.

೮೪೭. ‘‘ಅಥೋಸಧೇಹಿ ದಿಬ್ಬೇಹಿ, ಜಪ್ಪಂ ಮನ್ತಪದಾನಿ ಚ;

ಏವಂ ತಂ ಅಸಕ್ಖಿ ಸತ್ಥುಂ [ಸಟ್ಠುಂ (ಸೀ. ಪೀ.), ಯುಟ್ಠುಂ (ಸ್ಯಾ.), ಸುತ್ತುಂ (ಕ.)], ಕತ್ವಾ ಪರಿತ್ತಮತ್ತನೋ’’.

೮೪೮. ‘‘ಮಮಂ ದಿಸ್ವಾನ ಆಯನ್ತಂ, ಸಬ್ಬಕಾಮಸಮಿದ್ಧಿನಂ;

ಇನ್ದ್ರಿಯಾನಿ ಅಹಟ್ಠಾನಿ, ಸಾವಂ [ಸಾಮಂ (ಸೀ. ಪೀ.)] ಜಾತಂ ಮುಖಂ ತವ.

೮೪೯. ‘‘ಪದ್ಮಂ ಯಥಾ ಹತ್ಥಗತಂ, ಪಾಣಿನಾ ಪರಿಮದ್ದಿತಂ;

ಸಾವಂ ಜಾತಂ [ಯನ್ತಂ (ಕ.)] ಮುಖಂ ತುಯ್ಹಂ, ಮಮಂ ದಿಸ್ವಾನ ಏದಿಸಂ.

೮೫೦. ‘‘ಕಚ್ಚಿ ನು ತೇ ನಾಭಿಸಸಿ [ತೇ ನಾಭಿಸಯಿ (ಸೀ.), ತೇ ನಾಭಿಸ್ಸಸಿ (ಸ್ಯಾ.)], ಕಚ್ಚಿ ತೇ ಅತ್ಥಿ ವೇದನಾ;

ಯೇನ ಸಾವಂ ಮುಖಂ ತುಯ್ಹಂ, ಮಮಂ ದಿಸ್ವಾನ ಆಗತಂ’’.

೮೫೧. ‘‘ಸುಪಿನಂ ತಾತ ಅದ್ದಕ್ಖಿಂ, ಇತೋ ಮಾಸಂ ಅಧೋಗತಂ;

ದಕ್ಖಿಣಂ ವಿಯ ಮೇ ಬಾಹುಂ, ಛೇತ್ವಾ ರುಹಿರಮಕ್ಖಿತಂ;

ಪುರಿಸೋ ಆದಾಯ ಪಕ್ಕಾಮಿ, ಮಮ ರೋದನ್ತಿಯಾ ಸತಿ.

೮೫೨. ‘‘ಯತೋಹಂ [ಯತೋ ತಂ (ಸೀ.)] ಸುಪಿನಮದ್ದಕ್ಖಿಂ, ಸುದಸ್ಸನ ವಿಜಾನಹಿ;

ತತೋ ದಿವಾ ವಾ ರತ್ತಿಂ ವಾ, ಸುಖಂ ಮೇ ನೋಪಲಬ್ಭತಿ’’.

೮೫೩. ‘‘ಯಂ ಪುಬ್ಬೇ ಪರಿವಾರಿಂಸು [ಪರಿಚಾರಿಂಸು (ಸೀ. ಪೀ.)], ಕಞ್ಞಾ ರುಚಿರವಿಗ್ಗಹಾ;

ಹೇಮಜಾಲಪಟಿಚ್ಛನ್ನಾ, ಭೂರಿದತ್ತೋ ನ ದಿಸ್ಸತಿ.

೮೫೪. ‘‘ಯಂ ಪುಬ್ಬೇ ಪರಿವಾರಿಂಸು [ಪರಿಚಾರಿಂಸು (ಸೀ. ಪೀ.)], ನೇತ್ತಿಂಸವರಧಾರಿನೋ;

ಕಣಿಕಾರಾವ ಸಮ್ಫುಲ್ಲಾ, ಭೂರಿದತ್ತೋ ನ ದಿಸ್ಸತಿ.

೮೫೫. ‘‘ಹನ್ದ ದಾನಿ ಗಮಿಸ್ಸಾಮ, ಭೂರಿದತ್ತನಿವೇಸನಂ;

ಧಮ್ಮಟ್ಠಂ ಸೀಲಸಮ್ಪನ್ನಂ, ಪಸ್ಸಾಮ ತವ ಭಾತರಂ’’.

೮೫೬. ‘‘ತಞ್ಚ ದಿಸ್ವಾನ ಆಯನ್ತಿಂ, ಭೂರಿದತ್ತಸ್ಸ ಮಾತರಂ;

ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಭೂರಿದತ್ತಸ್ಸ ನಾರಿಯೋ.

೮೫೭. ‘‘ಪುತ್ತಂ ತೇಯ್ಯೇ ನ ಜಾನಾಮ, ಇತೋ ಮಾಸಂ ಅಧೋಗತಂ;

ಮತಂ ವಾ ಯದಿ ವಾ ಜೀವಂ, ಭೂರಿದತ್ತಂ ಯಸಸ್ಸಿನಂ’’.