೫೩೦. ಸಂಕಿಚ್ಚಜಾತಕಂ (೨)

೬೯. ‘‘ದಿಸ್ವಾ ನಿಸಿನ್ನಂ ರಾಜಾನಂ, ಬ್ರಹ್ಮದತ್ತಂ ರಥೇಸಭಂ;

ಅಥಸ್ಸ ಪಟಿವೇದೇಸಿ, ಯಸ್ಸಾಸಿ ಅನುಕಮ್ಪಕೋ.

೭೦. ‘‘ಸಂಕಿಚ್ಚಾಯಂ ಅನುಪ್ಪತ್ತೋ, ಇಸೀನಂ ಸಾಧುಸಮ್ಮತೋ;

ತರಮಾನರೂಪೋ ನಿಯ್ಯಾಹಿ, ಖಿಪ್ಪಂ ಪಸ್ಸ ಮಹೇಸಿನಂ.

೭೧. ‘‘ತತೋ ಚ ರಾಜಾ ತರಮಾನೋ, ಯುತ್ತಮಾರುಯ್ಹ ಸನ್ದನಂ;

ಮಿತ್ತಾಮಚ್ಚಪರಿಬ್ಯೂಳ್ಹೋ [ಪರಿಬ್ಬೂಳ್ಹೋ (ಸೀ. ಪೀ.)], ಅಗಮಾಸಿ ರಥೇಸಭೋ.

೭೨. ‘‘ನಿಕ್ಖಿಪ್ಪ ಪಞ್ಚ ಕಕುಧಾನಿ, ಕಾಸೀನಂ ರಟ್ಠವಡ್ಢನೋ;

ವಾಳಬೀಜನಿ [ವಾ ಳವೀಜನೀ (ಸೀ. ಪೀ.)] ಮುಣ್ಹೀಸಂ, ಖಗ್ಗಂ ಛತ್ತಞ್ಚುಪಾಹನಂ;

೭೩. ‘‘ಓರುಯ್ಹ ರಾಜಾ ಯಾನಮ್ಹಾ, ಠಪಯಿತ್ವಾ ಪಟಿಚ್ಛದಂ;

ಆಸೀನಂ ದಾಯಪಸ್ಸಸ್ಮಿಂ, ಸಂಕಿಚ್ಚಮುಪಸಙ್ಕಮಿ.

೭೪. ‘‘ಉಪಸಙ್ಕಮಿತ್ವಾ ಸೋ ರಾಜಾ, ಸಮ್ಮೋದಿ ಇಸಿನಾ ಸಹ;

ತಂ ಕಥಂ ವೀತಿಸಾರೇತ್ವಾ, ಏಕಮನ್ತಂ ಉಪಾವಿಸಿ.

೭೫. ‘‘ಏಕಮನ್ತಂ ನಿಸಿನ್ನೋವ, ಅಥ ಕಾಲಂ ಅಮಞ್ಞಥ;

ತತೋ ಪಾಪಾನಿ ಕಮ್ಮಾನಿ, ಪುಚ್ಛಿತುಂ ಪಟಿಪಜ್ಜಥ.

೭೬. ‘‘ಇಸಿಂ ಪುಚ್ಛಾಮ [ಪುಚ್ಛಾಮಿ (ಸೀ. ಪೀ.)] ಸಂಕಿಚ್ಚಂ, ಇಸೀನಂ ಸಾಧುಸಮ್ಮತಂ;

ಆಸೀನಂ ದಾಯಪಸ್ಸಸ್ಮಿಂ, ಇಸಿಸಙ್ಘಪುರಕ್ಖತಂ [ಪುರಕ್ಖಿತಂ (ಕ.)].

೭೭. ‘‘ಕಂ ಗತಿಂ ಪೇಚ್ಚ ಗಚ್ಛನ್ತಿ, ನರಾ ಧಮ್ಮಾತಿಚಾರಿನೋ;

ಅತಿಚಿಣ್ಣೋ ಮಯಾ ಧಮ್ಮೋ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೭೮. ‘‘ಇಸೀ ಅವಚ ಸಂಕಿಚ್ಚೋ, ಕಾಸೀನಂ ರಟ್ಠವಡ್ಢನಂ;

ಆಸೀನಂ ದಾಯಪಸ್ಸಸ್ಮಿಂ, ಮಹಾರಾಜ ಸುಣೋಹಿ ಮೇ.

೭೯. ‘‘ಉಪ್ಪಥೇನ ವಜನ್ತಸ್ಸ, ಯೋ ಮಗ್ಗಮನುಸಾಸತಿ;

ತಸ್ಸ ಚೇ ವಚನಂ ಕಯಿರಾ, ನಾಸ್ಸ ಮಗ್ಗೇಯ್ಯ ಕಣ್ಟಕೋ.

೮೦. ‘‘ಅಧಮ್ಮಂ ಪಟಿಪನ್ನಸ್ಸ, ಯೋ ಧಮ್ಮಮನುಸಾಸತಿ;

ತಸ್ಸ ಚೇ ವಚನಂ ಕಯಿರಾ, ನ ಸೋ ಗಚ್ಛೇಯ್ಯ ದುಗ್ಗತಿಂ.

೮೧. ‘‘ಧಮ್ಮೋ ಪಥೋ ಮಹಾರಾಜ, ಅಧಮ್ಮೋ ಪನ ಉಪ್ಪಥೋ;

ಅಧಮ್ಮೋ ನಿರಯಂ ನೇತಿ, ಧಮ್ಮೋ ಪಾಪೇತಿ ಸುಗ್ಗತಿಂ.

೮೨. ‘‘ಅಧಮ್ಮಚಾರಿನೋ ರಾಜ, ನರಾ ವಿಸಮಜೀವಿನೋ;

ಯಂ ಗತಿಂ ಪೇಚ್ಚ ಗಚ್ಛನ್ತಿ, ನಿರಯೇ ತೇ ಸುಣೋಹಿ ಮೇ.

೮೩. ‘‘ಸಞ್ಜೀವೋ ಕಾಳಸುತ್ತೋ ಚ, ಸಙ್ಘಾತೋ [ಸಙ್ಖಾಟೋ (ಸ್ಯಾ. ಕ.)] ದ್ವೇ ಚ ರೋರುವಾ;

ಅಥಾಪರೋ ಮಹಾವೀಚಿ, ತಾಪನೋ [ತಪನೋ (ಸೀ. ಪೀ.)] ಚ ಪತಾಪನೋ.

೮೪. ‘‘ಇಚ್ಚೇತೇ ಅಟ್ಠ ನಿರಯಾ, ಅಕ್ಖಾತಾ ದುರತಿಕ್ಕಮಾ;

ಆಕಿಣ್ಣಾ ಲುದ್ದಕಮ್ಮೇಹಿ, ಪಚ್ಚೇಕಾ ಸೋಳಸುಸ್ಸದಾ.

೮೫. ‘‘ಕದರಿಯತಾಪನಾ [ಕದರಿಯತಪನಾ (ಸೀ. ಪೀ.)] ಘೋರಾ, ಅಚ್ಚಿಮನ್ತೋ [ಅಚ್ಚಿಮನ್ತಾ (ಪೀ.)] ಮಹಬ್ಭಯಾ;

ಲೋಮಹಂಸನರೂಪಾ ಚ, ಭೇಸ್ಮಾ ಪಟಿಭಯಾ ದುಖಾ.

೮೬. ‘‘ಚತುಕ್ಕಣ್ಣಾ ಚತುದ್ವಾರಾ, ವಿಭತ್ತಾ ಭಾಗಸೋ ಮಿತಾ;

ಅಯೋಪಾಕಾರಪರಿಯನ್ತಾ, ಅಯಸಾ ಪಟಿಕುಜ್ಜಿತಾ.

೮೭. ‘‘ತೇಸಂ ಅಯೋಮಯಾ ಭೂಮಿ, ಜಲಿತಾ ತೇಜಸಾ ಯುತಾ;

ಸಮನ್ತಾ ಯೋಜನಸತಂ, ಫುಟಾ [ಫರಿತ್ವಾ (ಅ. ನಿ. ೩.೩೬; ಪೇ. ವ. ೭೧)] ತಿಟ್ಠನ್ತಿ ಸಬ್ಬದಾ.

೮೮. ‘‘ಏತೇ ಪತನ್ತಿ ನಿರಯೇ, ಉದ್ಧಂಪಾದಾ ಅವಂಸಿರಾ;

ಇಸೀನಂ ಅತಿವತ್ತಾರೋ, ಸಞ್ಞತಾನಂ ತಪಸ್ಸಿನಂ.

೮೯. ‘‘ತೇ ಭೂನಹುನೋ ಪಚ್ಚನ್ತಿ, ಮಚ್ಛಾ ಬಿಲಕತಾ ಯಥಾ;

ಸಂವಚ್ಛರೇ ಅಸಙ್ಖೇಯ್ಯೇ, ನರಾ ಕಿಬ್ಬಿಸಕಾರಿನೋ.

೯೦. ‘‘ಡಯ್ಹಮಾನೇನ ಗತ್ತೇನ, ನಿಚ್ಚಂ ಸನ್ತರಬಾಹಿರಂ;

ನಿರಯಾ ನಾಧಿಗಚ್ಛನ್ತಿ, ದ್ವಾರಂ ನಿಕ್ಖಮನೇಸಿನೋ.

೯೧. ‘‘ಪುರತ್ಥಿಮೇನ ಧಾವನ್ತಿ, ತತೋ ಧಾವನ್ತಿ ಪಚ್ಛತೋ;

ಉತ್ತರೇನಪಿ ಧಾವನ್ತಿ, ತತೋ ಧಾವನ್ತಿ ದಕ್ಖಿಣಂ;

ಯಂ ಯಞ್ಹಿ ದ್ವಾರಂ ಗಚ್ಛನ್ತಿ, ತಂ ತದೇವ ಪಿಧೀಯರೇ [ಪಿಥಿಯ್ಯತಿ (ಸೀ.), ಪಿಥಿಯ್ಯರೇ (ಸ್ಯಾ.), ಪಿಥೀಯರೇ (ಪೀ.)].

೯೨. ‘‘ಬಹೂನಿ ವಸ್ಸಸಹಸ್ಸಾನಿ, ಜನಾ ನಿರಯಗಾಮಿನೋ;

ಬಾಹಾ ಪಗ್ಗಯ್ಹ ಕನ್ದನ್ತಿ, ಪತ್ವಾ ದುಕ್ಖಂ ಅನಪ್ಪಕಂ.

೯೩. ‘‘ಆಸೀವಿಸಂವ ಕುಪಿತಂ, ತೇಜಸ್ಸಿಂ ದುರತಿಕ್ಕಮಂ;

ನ ಸಾಧುರೂಪೇ ಆಸೀದೇ, ಸಞ್ಞತಾನಂ ತಪಸ್ಸಿನಂ.

೯೪. ‘‘ಅತಿಕಾಯೋ ಮಹಿಸ್ಸಾಸೋ, ಅಜ್ಜುನೋ ಕೇಕಕಾಧಿಪೋ;

ಸಹಸ್ಸಬಾಹು ಉಚ್ಛಿನ್ನೋ, ಇಸಿಮಾಸಜ್ಜ ಗೋತಮಂ.

೯೫. ‘‘ಅರಜಂ ರಜಸಾ ವಚ್ಛಂ, ಕಿಸಂ ಅವಕಿರಿಯ ದಣ್ಡಕೀ;

ತಾಲೋವ ಮೂಲತೋ [ಸಮೂಲೋ (ಕ.)] ಛಿನ್ನೋ, ಸ ರಾಜಾ ವಿಭವಙ್ಗತೋ.

೯೬. ‘‘ಉಪಹಚ್ಚ ಮನಂ ಮಜ್ಝೋ [ಮೇಜ್ಝೋ (ಕ.)], ಮಾತಙ್ಗಸ್ಮಿಂ ಯಸಸ್ಸಿನೇ;

ಸಪಾರಿಸಜ್ಜೋ ಉಚ್ಛಿನ್ನೋ, ಮಜ್ಝಾರಞ್ಞಂ ತದಾ ಅಹು.

೯೭. ‘‘ಕಣ್ಹದೀಪಾಯನಾಸಜ್ಜ, ಇಸಿಂ ಅನ್ಧಕವೇಣ್ಡಯೋ [ವೇಣ್ಹುಯೋ (ಸೀ. ಪೀ.), ಪಿಣ್ಹಯೋ (?)];

ಅಞ್ಞೋಞ್ಞಂ [ಅಞ್ಞಮಞ್ಞಂ (ಸೀ. ಪೀ.)] ಮುಸಲಾ [ಮುಸಲೇ (ಸೀ. ಸ್ಯಾ. ಪೀ.)] ಹನ್ತ್ವಾ, ಸಮ್ಪತ್ತಾ ಯಮಸಾಧನಂ [ಯಮಸಾದನಂ (ಪೀ.)].

೯೮. ‘‘ಅಥಾಯಂ ಇಸಿನಾ ಸತ್ತೋ, ಅನ್ತಲಿಕ್ಖಚರೋ ಪುರೇ;

ಪಾವೇಕ್ಖಿ ಪಥವಿಂ [ಪಠವಿಂ (ಸೀ. ಸ್ಯಾ. ಪೀ.)] ಚೇಚ್ಚೋ, ಹೀನತ್ತೋ ಪತ್ತಪರಿಯಾಯಂ.

೯೯. ‘‘ತಸ್ಮಾ ಹಿ ಛನ್ದಾಗಮನಂ, ನಪ್ಪಸಂಸನ್ತಿ ಪಣ್ಡಿತಾ;

ಅದುಟ್ಠಚಿತ್ತೋ ಭಾಸೇಯ್ಯ, ಗಿರಂ ಸಚ್ಚೂಪಸಂಹಿತಂ.

೧೦೦. ‘‘ಮನಸಾ ಚೇ ಪದುಟ್ಠೇನ, ಯೋ ನರೋ ಪೇಕ್ಖತೇ ಮುನಿಂ;

ವಿಜ್ಜಾಚರಣಸಮ್ಪನ್ನಂ, ಗನ್ತಾ ಸೋ ನಿರಯಂ ಅಧೋ.

೧೦೧. ‘‘ಯೇ ವುಡ್ಢೇ [ವದ್ಧೇ (ಕ.)] ಪರಿಭಾಸನ್ತಿ, ಫರುಸೂಪಕ್ಕಮಾ ಜನಾ;

ಅನಪಚ್ಚಾ ಅದಾಯಾದಾ, ತಾಲವತ್ಥು [ತಾಲವತ್ಥೂ (ಸ್ಯಾ.), ತಾಲಾವತ್ಥು (ಪೀ.)] ಭವನ್ತಿ ತೇ.

೧೦೨. ‘‘ಯೋ ಚ ಪಬ್ಬಜಿತಂ ಹನ್ತಿ, ಕತಕಿಚ್ಚಂ ಮಹೇಸಿನಂ;

ಸ ಕಾಳಸುತ್ತೇ ನಿರಯೇ, ಚಿರರತ್ತಾಯ ಪಚ್ಚತಿ.

೧೦೩. ‘‘ಯೋ ಚ ರಾಜಾ ಅಧಮ್ಮಟ್ಠೋ, ರಟ್ಠವಿದ್ಧಂಸನೋ ಮಗೋ [ಚುತೋ (ಸೀ.)];

ತಾಪಯಿತ್ವಾ ಜನಪದಂ, ತಾಪನೇ ಪೇಚ್ಚ ಪಚ್ಚತಿ.

೧೦೪. ‘‘ಸೋ ಚ ವಸ್ಸಸಹಸ್ಸಾನಿ [ವಸ್ಸಸಹಸ್ಸಾನಂ (ಸೀ. ಸ್ಯಾ.)], ಸತಂ ದಿಬ್ಬಾನಿ ಪಚ್ಚತಿ;

ಅಚ್ಚಿಸಙ್ಘಪರೇತೋ ಸೋ, ದುಕ್ಖಂ ವೇದೇತಿ ವೇದನಂ.

೧೦೫. ‘‘ತಸ್ಸ ಅಗ್ಗಿಸಿಖಾ ಕಾಯಾ, ನಿಚ್ಛರನ್ತಿ ಪಭಸ್ಸರಾ;

ತೇಜೋಭಕ್ಖಸ್ಸ ಗತ್ತಾನಿ, ಲೋಮೇಹಿ ಚ [ಲೋಮಗ್ಗೇಹಿ ಚ (ಸೀ. ಸ್ಯಾ. ಪೀ.)] ನಖೇಹಿ ಚ.

೧೦೬. ‘‘ಡಯ್ಹಮಾನೇನ ಗತ್ತೇನ, ನಿಚ್ಚಂ ಸನ್ತರಬಾಹಿರಂ;

ದುಕ್ಖಾಭಿತುನ್ನೋ ನದತಿ, ನಾಗೋ ತುತ್ತಟ್ಟಿತೋ [ತುತ್ತದ್ದಿತೋ (ಸೀ.)] ಯಥಾ.

೧೦೭. ‘‘ಯೋ ಲೋಭಾ ಪಿತರಂ ಹನ್ತಿ, ದೋಸಾ ವಾ ಪುರಿಸಾಧಮೋ;

ಸ ಕಾಳಸುತ್ತೇ ನಿರಯೇ, ಚಿರರತ್ತಾಯ ಪಚ್ಚತಿ.

೧೦೮. ‘‘ಸ ತಾದಿಸೋ ಪಚ್ಚತಿ ಲೋಹಕುಮ್ಭಿಯಂ, ಪಕ್ಕಞ್ಚ ಸತ್ತೀಹಿ ಹನನ್ತಿ ನಿತ್ತಚಂ;

ಅನ್ಧಂ ಕರಿತ್ವಾ ಮುತ್ತಕರೀಸಭಕ್ಖಂ, ಖಾರೇ ನಿಮುಜ್ಜನ್ತಿ ತಥಾವಿಧಂ ನರಂ.

೧೦೯. ‘‘ತತ್ತಂ ಪಕ್ಕುಥಿತಮಯೋಗುಳಞ್ಚ [ಪಕ್ಕುಧಿತಮಯೋಗುಳಞ್ಚ (ಕ.)], ದೀಘೇ ಚ ಫಾಲೇ ಚಿರರತ್ತತಾಪಿತೇ;

ವಿಕ್ಖಮ್ಭಮಾದಾಯ ವಿಬನ್ಧ [ವಿಬದ್ಧ (ಸೀ.), ವಿಭಜ್ಜ (ಸ್ಯಾ. ಪೀ.)] ರಜ್ಜುಭಿ, ವಿವಟೇ ಮುಖೇ ಸಮ್ಪವಿಸನ್ತಿ [ಸಂಚವನ್ತಿ (ಸೀ. ಸ್ಯಾ. ಪೀ.)] ರಕ್ಖಸಾ.

೧೧೦. ‘‘ಸಾಮಾ ಚ ಸೋಣಾ ಸಬಲಾ ಚ ಗಿಜ್ಝಾ, ಕಾಕೋಳಸಙ್ಘಾ ಚ ದಿಜಾ ಅಯೋಮುಖಾ;

ಸಙ್ಗಮ್ಮ ಖಾದನ್ತಿ ವಿಪ್ಫನ್ದಮಾನಂ, ಜಿವ್ಹಂ ವಿಭಜ್ಜ ವಿಘಾಸಂ ಸಲೋಹಿತಂ.

೧೧೧. ‘‘ತಂ ದಡ್ಢತಾಲಂ ಪರಿಭಿನ್ನಗತ್ತಂ, ನಿಪ್ಪೋಥಯನ್ತಾ ಅನುವಿಚರನ್ತಿ ರಕ್ಖಸಾ;

ರತೀ ಹಿ ನೇಸಂ ದುಖಿನೋ ಪನೀತರೇ, ಏತಾದಿಸಸ್ಮಿಂ ನಿರಯೇ ವಸನ್ತಿ;

ಯೇ ಕೇಚಿ ಲೋಕೇ ಇಧ ಪೇತ್ತಿಘಾತಿನೋ.

೧೧೨. ‘‘ಪುತ್ತೋ ಚ ಮಾತರಂ ಹನ್ತ್ವಾ, ಇತೋ ಗನ್ತ್ವಾ ಯಮಕ್ಖಯಂ;

ಭುಸಮಾಪಜ್ಜತೇ ದುಕ್ಖಂ, ಅತ್ತಕಮ್ಮಫಲೂಪಗೋ.

೧೧೩. ‘‘ಅಮನುಸ್ಸಾ ಅತಿಬಲಾ, ಹನ್ತಾರಂ ಜನಯನ್ತಿಯಾ;

ಅಯೋಮಯೇಹಿ ವಾಳೇಹಿ [ಫಾಲೇಹಿ (ಪೀ.)], ಪೀಳಯನ್ತಿ ಪುನಪ್ಪುನಂ.

೧೧೪. ‘‘ತಮಸ್ಸವಂ [ತಂ ಪಸ್ಸವಂ (ಸೀ. ಸ್ಯಾ.), ತಂ ಪಸ್ಸುತಂ (ಪೀ.)] ಸಕಾ ಗತ್ತಾ, ರುಹಿರಂ [ರುಧಿರಂ (ಸೀ. ಸ್ಯಾ.)] ಅತ್ತಸಮ್ಭವಂ;

ತಮ್ಬಲೋಹವಿಲೀನಂವ, ತತ್ತಂ ಪಾಯೇನ್ತಿ ಮತ್ತಿಘಂ [ಮತ್ತಿಯಂ (ಸೀ.)].

೧೧೫. ‘‘ಜಿಗುಚ್ಛಂ ಕುಣಪಂ ಪೂತಿಂ, ದುಗ್ಗನ್ಧಂ ಗೂಥಕದ್ದಮಂ;

ಪುಬ್ಬಲೋಹಿತಸಙ್ಕಾಸಂ, ರಹದಮೋಗಯ್ಹ [ರಹದೋಗ್ಗಯ್ಹ (ಕ.)] ತಿಟ್ಠತಿ.

೧೧೬. ‘‘ತಮೇನಂ ಕಿಮಯೋ ತತ್ಥ, ಅತಿಕಾಯಾ ಅಯೋಮುಖಾ;

ಛವಿಂ ಭೇತ್ವಾನ [ಛೇತ್ವಾನ (ಸೀ. ಪೀ.)] ಖಾದನ್ತಿ, ಸಂಗಿದ್ಧಾ [ಪಗಿದ್ಧಾ (ಸೀ. ಸ್ಯಾ. ಪೀ.)] ಮಂಸಲೋಹಿತೇ.

೧೧೭. ‘‘ಸೋ ಚ ತಂ ನಿರಯಂ ಪತ್ತೋ, ನಿಮುಗ್ಗೋ ಸತಪೋರಿಸಂ;

ಪೂತಿಕಂ ಕುಣಪಂ ವಾತಿ, ಸಮನ್ತಾ ಸತಯೋಜನಂ.

೧೧೮. ‘‘ಚಕ್ಖುಮಾಪಿ ಹಿ ಚಕ್ಖೂಹಿ, ತೇನ ಗನ್ಧೇನ ಜೀಯತಿ;

ಏತಾದಿಸಂ ಬ್ರಹ್ಮದತ್ತ, ಮಾತುಘೋ ಲಭತೇ ದುಖಂ.

೧೧೯. ‘‘ಖುರಧಾರಮನುಕ್ಕಮ್ಮ, ತಿಕ್ಖಂ ದುರಭಿಸಮ್ಭವಂ;

ಪತನ್ತಿ ಗಬ್ಭಪಾತಿಯೋ [ಗಬ್ಭಪಾತಿನಿಯೋ (ಸೀ. ಸ್ಯಾ. ಪೀ.)], ದುಗ್ಗಂ ವೇತರಣಿಂ [ವೇತ್ತರಣಿಂ (ಸ್ಯಾ. ಕ.)] ನದಿಂ.

೧೨೦. ‘‘ಅಯೋಮಯಾ ಸಿಮ್ಬಲಿಯೋ, ಸೋಳಸಙ್ಗುಲಕಣ್ಟಕಾ;

ಉಭತೋ ಅಭಿಲಮ್ಬನ್ತಿ, ದುಗ್ಗಂ ವೇತರಣಿಂ [ವೇತ್ತರಣಿಂ (ಸ್ಯಾ. ಕ.)] ನದಿಂ.

೧೨೧. ‘‘ತೇ ಅಚ್ಚಿಮನ್ತೋ ತಿಟ್ಠನ್ತಿ, ಅಗ್ಗಿಕ್ಖನ್ಧಾವ ಆರಕಾ;

ಆದಿತ್ತಾ ಜಾತವೇದೇನ, ಉದ್ಧಂ ಯೋಜನಮುಗ್ಗತಾ.

೧೨೨. ‘‘ಏತೇ ವಜನ್ತಿ [ಸಜನ್ತಿ (ಸೀ. ಪೀ.), ಪಜ್ಜನ್ತಿ (ಸ್ಯಾ.)] ನಿರಯೇ, ತತ್ತೇ ತಿಖಿಣಕಣ್ಟಕೇ;

ನಾರಿಯೋ ಚ ಅತಿಚಾರಾ [ಅತಿಚಾರಿನಿಯೋ (ಸೀ. ಸ್ಯಾ. ಪೀ.)], ನರಾ ಚ ಪರದಾರಗೂ.

೧೨೩. ‘‘ತೇ ಪತನ್ತಿ ಅಧೋಕ್ಖನ್ಧಾ, ವಿವತ್ತಾ ವಿಹತಾ ಪುಥೂ;

ಸಯನ್ತಿ ವಿನಿವಿದ್ಧಙ್ಗಾ, ದೀಘಂ ಜಗ್ಗನ್ತಿ ಸಬ್ಬದಾ [ಸಂವರಿಂ (ಸೀ. ಪೀ.)].

೧೨೪. ‘‘ತತೋ ರತ್ಯಾ ವಿವಸಾನೇ [ವಿವಸನೇ (ಸೀ. ಸ್ಯಾ. ಪೀ.)], ಮಹತಿಂ ಪಬ್ಬತೂಪಮಂ;

ಲೋಹಕುಮ್ಭಿಂ ಪವಜ್ಜನ್ತಿ, ತತ್ತಂ ಅಗ್ಗಿಸಮೂದಕಂ.

೧೨೫. ‘‘ಏವಂ ದಿವಾ ಚ ರತ್ತೋ ಚ, ದುಸ್ಸೀಲಾ ಮೋಹಪಾರುತಾ;

ಅನುಭೋನ್ತಿ ಸಕಂ ಕಮ್ಮಂ, ಪುಬ್ಬೇ ದುಕ್ಕಟಮತ್ತನೋ.

೧೨೬. ‘‘ಯಾ ಚ ಭರಿಯಾ ಧನಕ್ಕೀತಾ, ಸಾಮಿಕಂ ಅತಿಮಞ್ಞತಿ;

ಸಸ್ಸುಂ ವಾ ಸಸುರಂ ವಾಪಿ, ಜೇಟ್ಠಂ ವಾಪಿ ನನನ್ದರಂ [ನನನ್ದನಂ (ಸ್ಯಾ. ಕ.)].

೧೨೭. ‘‘ತಸ್ಸಾ ವಙ್ಕೇನ ಜಿವ್ಹಗ್ಗಂ, ನಿಬ್ಬಹನ್ತಿ ಸಬನ್ಧನಂ;

ಸ ಬ್ಯಾಮಮತ್ತಂ ಕಿಮಿನಂ, ಜಿವ್ಹಂ ಪಸ್ಸತಿ ಅತ್ತನಿ [ಅತ್ತನೋ (ಸೀ. ಸ್ಯಾ.)];

ವಿಞ್ಞಾಪೇತುಂ ನ ಸಕ್ಕೋತಿ, ತಾಪನೇ ಪೇಚ್ಚ ಪಚ್ಚತಿ.

೧೨೮. ‘‘ಓರಬ್ಭಿಕಾ ಸೂಕರಿಕಾ, ಮಚ್ಛಿಕಾ ಮಿಗಬನ್ಧಕಾ;

ಚೋರಾ ಗೋಘಾತಕಾ ಲುದ್ದಾ, ಅವಣ್ಣೇ ವಣ್ಣಕಾರಕಾ.

೧೨೯. ‘‘ಸತ್ತೀಹಿ ಲೋಹಕೂಟೇಹಿ, ನೇತ್ತಿಂಸೇಹಿ ಉಸೂಹಿ ಚ;

ಹಞ್ಞಮಾನಾ ಖಾರನದಿಂ, ಪಪತನ್ತಿ [ಸಮ್ಪತನ್ತಿ (ಕ.)] ಅವಂಸಿರಾ.

೧೩೦. ‘‘ಸಾಯಂ ಪಾತೋ ಕೂಟಕಾರೀ, ಅಯೋಕೂಟೇಹಿ ಹಞ್ಞತಿ;

ತತೋ ವನ್ತಂ ದುರತ್ತಾನಂ, ಪರೇಸಂ ಭುಞ್ಜರೇ [ಭುಞ್ಜತೇ (ಸೀ. ಸ್ಯಾ. ಪೀ.)] ಸದಾ.

೧೩೧. ‘‘ಧಙ್ಕಾ ಭೇರಣ್ಡಕಾ [ಭೇದಣ್ಡಕಾ (ಕ.)] ಗಿಜ್ಝಾ, ಕಾಕೋಳಾ ಚ ಅಯೋಮುಖಾ;

ವಿಪ್ಫನ್ದಮಾನಂ ಖಾದನ್ತಿ, ನರಂ ಕಿಬ್ಬಿಸಕಾರಕಂ [ಕಿಬ್ಬಿಸಕಾರಿನಂ (ಪೀ.)].

೧೩೨. ‘‘ಯೇ ಮಿಗೇನ ಮಿಗಂ ಹನ್ತಿ, ಪಕ್ಖಿಂ ವಾ ಪನ ಪಕ್ಖಿನಾ;

ಅಸನ್ತೋ ರಜಸಾ ಛನ್ನಾ, ಗನ್ತಾ [ಗತಾ (ಕ.)] ತೇ ನಿರಯುಸ್ಸದಂ [ನಿರಯಂ ಅಧೋ (ಪೀ.)].

೧೩೩. ‘‘ಸನ್ತೋ ಚ [ಸನ್ತೋವ (ಸ್ಯಾ.)] ಉದ್ಧಂ ಗಚ್ಛನ್ತಿ, ಸುಚಿಣ್ಣೇನಿಧ ಕಮ್ಮುನಾ;

ಸುಚಿಣ್ಣಸ್ಸ ಫಲಂ ಪಸ್ಸ, ಸಇನ್ದಾ [ಸಹಿನ್ದಾ (ಸೀ.)] ದೇವಾ ಸಬ್ರಹ್ಮಕಾ.

೧೩೪. ‘‘ತಂ ತಂ ಬ್ರೂಮಿ ಮಹಾರಾಜ, ಧಮ್ಮಂ ರಟ್ಠಪತೀ ಚರ;

ತಥಾ [ತಥಾ ತಥಾ (ಸೀ. ಸ್ಯಾ. ಪೀ.)] ರಾಜ ಚರಾಹಿ ಧಮ್ಮಂ, ಯಥಾ ತಂ ಸುಚಿಣ್ಣಂ ನಾನುತಪ್ಪೇಯ್ಯ ಪಚ್ಛಾ’’ತಿ.

ಸಂಕಿಚ್ಚಜಾತಕಂ ದುತಿಯಂ.

ಸಟ್ಠಿನಿಪಾತಂ ನಿಟ್ಠಿತಂ.