೫೨೦. ಗನ್ಧತಿನ್ದುಕಜಾತಕಂ (೧೦)

೩೩೨. ಅಪ್ಪಮಾದೋ ಅಮತಂ ಪದಂ [ಅಮತಪದಂ (ಸೀ. ಪೀ.)], ಪಮಾದೋ ಮಚ್ಚುನೋ ಪದಂ;

ಅಪ್ಪಮತ್ತಾ ನ ಮೀಯನ್ತಿ, ಯೇ ಪಮತ್ತಾ ಯಥಾ ಮತಾ.

೩೩೩. ಮದಾ ಪಮಾದೋ ಜಾಯೇಥ, ಪಮಾದಾ ಜಾಯತೇ ಖಯೋ;

ಖಯಾ ಪದೋಸಾ [ಖಯಾ ಚ ದೋಸಾ (ಸೀ.)] ಜಾಯನ್ತಿ, ಮಾ ಪಮಾದೋ [ಮಾ ಮದೋ (ಸೀ. ಸ್ಯಾ. ಪೀ.)] ಭರತೂಸಭ [ಭಾರಧೂಸಭ (ಕ.)].

೩೩೪. ಬಹೂ ಹಿ ಖತ್ತಿಯಾ ಜೀನಾ, ಅತ್ಥಂ ರಟ್ಠಂ ಪಮಾದಿನೋ;

ಅಥೋಪಿ ಗಾಮಿನೋ ಗಾಮಾ, ಅನಗಾರಾ ಅಗಾರಿನೋ.

೩೩೫. ಖತ್ತಿಯಸ್ಸ ಪಮತ್ತಸ್ಸ, ರಟ್ಠಸ್ಮಿಂ ರಟ್ಠವಡ್ಢನ;

ಸಬ್ಬೇ ಭೋಗಾ ವಿನಸ್ಸನ್ತಿ, ರಞ್ಞೋ ತಂ ವುಚ್ಚತೇ ಅಘಂ.

೩೩೬. ನೇಸ ಧಮ್ಮೋ ಮಹಾರಾಜ, ಅತಿವೇಲಂ ಪಮಜ್ಜಸಿ;

ಇದ್ಧಂ ಫೀತಂ ಜನಪದಂ, ಚೋರಾ ವಿದ್ಧಂಸಯನ್ತಿ ನಂ.

೩೩೭. ನ ತೇ ಪುತ್ತಾ ಭವಿಸ್ಸನ್ತಿ, ನ ಹಿರಞ್ಞಂ ನ ಧಾನಿಯಂ [ನ ಹಿರಞ್ಞನಿಧಾನಿಯಾ (ಕ.)];

ರಟ್ಠೇ ವಿಲುಪ್ಪಮಾನಮ್ಹಿ, ಸಬ್ಬಭೋಗೇಹಿ ಜಿಯ್ಯಸಿ.

೩೩೮. ಸಬ್ಬಭೋಗಾ ಪರಿಜಿಣ್ಣಂ, ರಾಜಾನಂ ವಾಪಿ ಖತ್ತಿಯಂ [ಖತ್ತಿಯ (ಕ.)];

ಞಾತಿಮಿತ್ತಾ ಸುಹಜ್ಜಾ ಚ, ನ ತಂ ಮಞ್ಞನ್ತಿ ಮಾನಿಯಂ [ಮನ್ತಿಯಂ (ಸ್ಯಾ.)].

೩೩೯. ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;

ತಮೇವಮುಪಜೀವನ್ತಾ, ನ ತಂ ಮಞ್ಞನ್ತಿ ಮಾನಿಯಂ.

೩೪೦. ಅಸಂವಿಹಿತಕಮ್ಮನ್ತಂ, ಬಾಲಂ ದುಮ್ಮನ್ತಿಮನ್ತಿನಂ;

ಸಿರೀ ಜಹತಿ ದುಮ್ಮೇಧಂ, ಜಿಣ್ಣಂವ ಉರಗೋ ತಚಂ.

೩೪೧. ಸುಸಂವಿಹಿತಕಮ್ಮನ್ತಂ, ಕಾಲುಟ್ಠಾಯಿಂ ಅತನ್ದಿತಂ;

ಸಬ್ಬೇ ಭೋಗಾಭಿವಡ್ಢನ್ತಿ, ಗಾವೋ ಸಉಸಭಾಮಿವ.

೩೪೨. ಉಪಸ್ಸುತಿಂ ಮಹಾರಾಜ, ರಟ್ಠೇ ಜನಪದೇ ಚರ;

ತತ್ಥ ದಿಸ್ವಾ ಚ ಸುತ್ವಾ ಚ, ತತೋ ತಂ [ತ್ವಂ (ಕ.)] ಪಟಿಪಜ್ಜಸಿ.

೩೪೩. ಏವಂ ವೇದೇತು ಪಞ್ಚಾಲೋ, ಸಙ್ಗಾಮೇ ಸರಮಪ್ಪಿತೋ [ಸಮಪ್ಪಿತೋ (ಸೀ. ಪೀ.)];

ಯಥಾಹಮಜ್ಜ ವೇದೇಮಿ, ಕಣ್ಟಕೇನ ಸಮಪ್ಪಿತೋ.

೩೪೪. ಜಿಣ್ಣೋ ದುಬ್ಬಲಚಕ್ಖೂಸಿ, ನ ರೂಪಂ ಸಾಧು ಪಸ್ಸಸಿ;

ಕಿಂ ತತ್ಥ ಬ್ರಹ್ಮದತ್ತಸ್ಸ, ಯಂ ತಂ ಮಗ್ಗೇಯ್ಯ [ಮಗ್ಘೇಯ್ಯ (ಪೀ.)] ಕಣ್ಟಕೋ [ಕಣ್ಡಕೋ (ಸೀ. ಸ್ಯಾ. ಪೀ.)].

೩೪೫. ಬಹ್ವೇತ್ಥ ಬ್ರಹ್ಮದತ್ತಸ್ಸ, ಸೋಹಂ [ಯೋಹಂ (ಸೀ. ಸ್ಯಾ. ಪೀ.)] ಮಗ್ಗಸ್ಮಿ [ಮಗ್ಗೋಸ್ಮಿ (ಪೀ.)] ಬ್ರಾಹ್ಮಣ;

ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ.

೩೪೬. ರತ್ತಿಞ್ಹಿ [ರತ್ತಿಞ್ಚ (ಸೀ.)] ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ;

ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ.

೩೪೭. ಏತಾದಿಸೇ ಭಯೇ ಜಾತೇ [ತಾತ (ಸೀ. ಪೀ.)], ಭಯಟ್ಟಾ ತಾತ [ತಾವ (ಸೀ. ಪೀ.)] ಮಾಣವಾ;

ನಿಲ್ಲೇನಕಾನಿ ಕುಬ್ಬನ್ತಿ, ವನೇ ಆಹತ್ವ ಕಣ್ಟಕಂ.

೩೪೮. ಕದಾಸ್ಸು ನಾಮಯಂ ರಾಜಾ, ಬ್ರಹ್ಮದತ್ತೋ ಮರಿಸ್ಸತಿ;

ಯಸ್ಸ ರಟ್ಠಮ್ಹಿ ಜಿಯ್ಯನ್ತಿ, ಅಪ್ಪತಿಕಾ ಕುಮಾರಿಕಾ.

೩೪೯. ದುಬ್ಭಾಸಿತಞ್ಹಿ ತೇ ಜಮ್ಮಿ, ಅನತ್ಥಪದಕೋವಿದೇ;

ಕುಹಿಂ ರಾಜಾ ಕುಮಾರೀನಂ, ಭತ್ತಾರಂ ಪರಿಯೇಸತಿ.

೩೫೦. ನ ಮೇ ದುಬ್ಭಾಸಿತಂ ಬ್ರಹ್ಮೇ, ಕೋವಿದತ್ಥಪದಾ ಅಹಂ;

ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ.

೩೫೧. ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ;

ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ;

ದುಜ್ಜೀವೇ ದುಬ್ಭರೇ ದಾರೇ, ಕುತೋ ಭತ್ತಾ ಕುಮಾರಿಯೋ.

೩೫೨. ಏವಂ ಸಯತು ಪಞ್ಚಾಲೋ, ಸಙ್ಗಾಮೇ ಸತ್ತಿಯಾ ಹತೋ;

ಯಥಾಯಂ ಕಪಣೋ ಸೇತಿ, ಹತೋ ಫಾಲೇನ ಸಾಲಿಯೋ.

೩೫೩. ಅಧಮ್ಮೇನ ತುವಂ ಜಮ್ಮ, ಬ್ರಹ್ಮದತ್ತಸ್ಸ ಕುಜ್ಝಸಿ;

ಯೋ ತ್ವಂ ಸಪಸಿ ರಾಜಾನಂ, ಅಪರಜ್ಝಿತ್ವಾನ ಅತ್ತನೋ [ಅತ್ತನಾ (ಪೀ.)].

೩೫೪. ಧಮ್ಮೇನ ಬ್ರಹ್ಮದತ್ತಸ್ಸ, ಅಹಂ ಕುಜ್ಝಾಮಿ ಬ್ರಾಹ್ಮಣ;

ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ.

೩೫೫. ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ;

ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ.

೩೫೬. ಸಾ ನೂನ ಪುನ ರೇ ಪಕ್ಕಾ, ವಿಕಾಲೇ ಭತ್ತಮಾಹರಿ;

ಭತ್ತಹಾರಿಂ ಅಪೇಕ್ಖನ್ತೋ, ಹತೋ ಫಾಲೇನ ಸಾಲಿಯೋ.

೩೫೭. ಏವಂ ಹಞ್ಞತು ಪಞ್ಚಾಲೋ, ಸಙ್ಗಾಮೇ ಅಸಿನಾ ಹತೋ [ದಳ್ಹಂ (ಪೀ.)];

ಯಥಾಹಮಜ್ಜ ಪಹತೋ, ಖೀರಞ್ಚ ಮೇ ಪವಟ್ಟಿತಂ.

೩೫೮. ಯಂ ಪಸು ಖೀರಂ ಛಡ್ಡೇತಿ, ಪಸುಪಾಲಂ ವಿಹಿಂಸತಿ [ಪಸುಪಾಲಞ್ಚ ಹಿಂಸತಿ (ಸೀ.), ಪಸು ಫಾಲಞ್ಚ ಹಿಂಸತಿ (ಪೀ.)];

ಕಿಂ ತತ್ಥ ಬ್ರಹ್ಮದತ್ತಸ್ಸ, ಯಂ ನೋ ಗರಹತೇ [ಗರಹತೋ (ಪೀ.)] ಭವಂ.

೩೫೯. ಗಾರಯ್ಹೋ ಬ್ರಹ್ಮೇ ಪಞ್ಚಾಲೋ, ಬ್ರಹ್ಮದತ್ತಸ್ಸ ರಾಜಿನೋ;

ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ.

೩೬೦. ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ;

ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ.

೩೬೧. ಚಣ್ಡಾ ಅಟನಕಾ [ಅಟನಕ (ಪೀ.), ಅಕಟನಾ (ಕ.)] ಗಾವೀ, ಯಂ ಪುರೇ ನ ದುಹಾಮಸೇ;

ತಂ ದಾನಿ ಅಜ್ಜ ದೋಹಾಮ, ಖೀರಕಾಮೇಹುಪದ್ದುತಾ.

೩೬೨. ಏವಂ ಕನ್ದತು ಪಞ್ಚಾಲೋ, ವಿಪುತ್ತೋ ವಿಪ್ಪಸುಕ್ಖತು;

ಯಥಾಯಂ ಕಪಣಾ ಗಾವೀ, ವಿಪುತ್ತಾ ಪರಿಧಾವತಿ.

೩೬೩. ಯಂ ಪಸು ಪಸುಪಾಲಸ್ಸ, ಸಮ್ಭಮೇಯ್ಯ [ಪಬ್ಭಮೇಯ್ಯ (ಸೀ. ಪೀ.)] ರವೇಯ್ಯ ವಾ;

ಕೋ ನೀಧ ಅಪರಾಧತ್ಥಿ, ಬ್ರಹ್ಮದತ್ತಸ್ಸ ರಾಜಿನೋ.

೩೬೪. ಅಪರಾಧೋ ಮಹಾಬ್ರಹ್ಮೇ, ಬ್ರಹ್ಮದತ್ತಸ್ಸ ರಾಜಿನೋ;

ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ.

೩೬೫. ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ;

ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ;

ಕಥಂ ನೋ ಅಸಿಕೋಸತ್ಥಾ, ಖೀರಪಾ ಹಞ್ಞತೇ ಪಜಾ.

೩೬೬. ಏವಂ ಖಜ್ಜತು ಪಞ್ಚಾಲೋ, ಹತೋ ಯುದ್ಧೇ ಸಪುತ್ತಕೋ;

ಯಥಾಹಮಜ್ಜ ಖಜ್ಜಾಮಿ, ಗಾಮಿಕೇಹಿ [ಗಾಮಕೇಹಿ (ಸೀ. ಪೀ.)] ಅರಞ್ಞಜೋ.

೩೬೭. ನ ಸಬ್ಬಭೂತೇಸು ವಿಧೇನ್ತಿ [ವಿಧನ್ತಿ (ಕ.)] ರಕ್ಖಂ, ರಾಜಾನೋ ಮಣ್ಡೂಕ ಮನುಸ್ಸಲೋಕೇ;

ನೇತ್ತಾವತಾ ರಾಜಾ ಅಧಮ್ಮಚಾರೀ, ಯಂ ತಾದಿಸಂ ಜೀವಮದೇಯ್ಯು ಧಙ್ಕಾ.

೩೬೮. ಅಧಮ್ಮರೂಪೋ ವತ ಬ್ರಹ್ಮಚಾರೀ, ಅನುಪ್ಪಿಯಂ ಭಾಸಸಿ ಖತ್ತಿಯಸ್ಸ;

ವಿಲುಪ್ಪಮಾನಾಯ ಪುಥುಪ್ಪಜಾಯ, ಪೂಜೇಸಿ ರಾಜಂ ಪರಮಪ್ಪಮಾದಂ [ರಾಜಂ ಪರಮಪ್ಪವಾದಂ (ಸೀ.), ರಾಜಾ ಪರಮಪ್ಪವಾದಿಂ (ಸ್ಯಾ.)].

೩೬೯. ಸಚೇ ಇಮಂ ಬ್ರಹ್ಮೇ ಸುರಜ್ಜಕಂ ಸಿಯಾ, ಫೀತಂ ರಟ್ಠಂ ಮುದಿತಂ [ಪೂರಿತಂ (ಕ.)] ವಿಪ್ಪಸನ್ನಂ;

ಭುತ್ವಾ ಬಲಿಂ ಅಗ್ಗಪಿಣ್ಡಞ್ಚ ಕಾಕಾ, ನ ಮಾದಿಸಂ ಜೀವಮದೇಯ್ಯು ಧಙ್ಕಾತಿ.

ಗನ್ಧತಿನ್ದುಕಜಾತಕಂ ದಸಮಂ.

ತಸ್ಸುದ್ದಾನಂ –

ಕಿಂಛನ್ದ ಕುಮ್ಭ ಜಯದ್ದಿಸ ಛದ್ದನ್ತ, ಅಥ ಪಣ್ಡಿತಸಮ್ಭವ ಸಿರಕಪಿ;

ದಕರಕ್ಖಸ ಪಣ್ಡರನಾಗವರೋ, ಅಥ ಸಮ್ಬುಲ ತಿನ್ದುಕದೇವಸುತೋತಿ.

ತಿಂಸನಿಪಾತಂ ನಿಟ್ಠಿತಂ.