೪೫೫. ಮಾತುಪೋಸಕಜಾತಕಂ (೧)

೧. ತಸ್ಸ ನಾಗಸ್ಸ ವಿಪ್ಪವಾಸೇನ, ವಿರೂಳ್ಹಾ ಸಲ್ಲಕೀ ಚ ಕುಟಜಾ ಚ;

ಕುರುವಿನ್ದಕರವೀರಾ [ಕರವರಾ (ಸೀ. ಸ್ಯಾ.)] ತಿಸಸಾಮಾ ಚ, ನಿವಾತೇ ಪುಪ್ಫಿತಾ ಚ ಕಣಿಕಾರಾ.

೨. ಕೋಚಿದೇವ ಸುವಣ್ಣಕಾಯುರಾ, ನಾಗರಾಜಂ ಭರನ್ತಿ ಪಿಣ್ಡೇನ;

ಯತ್ಥ ರಾಜಾ ರಾಜಕುಮಾರೋ ವಾ, ಕವಚಮಭಿಹೇಸ್ಸತಿ ಅಛಮ್ಭಿತೋ [ಅಸಮ್ಭೀತೋ (ಸೀ. ಸ್ಯಾ. ಪೀ.)].

೩. ಗಣ್ಹಾಹಿ ನಾಗ ಕಬಳಂ, ಮಾ ನಾಗ ಕಿಸಕೋ ಭವ;

ಬಹೂನಿ ರಾಜಕಿಚ್ಚಾನಿ, ತಾನಿ [ಯಾನಿ (ಸೀ. ಪೀ.)] ನಾಗ ಕರಿಸ್ಸಸಿ.

೪. ಸಾ ನೂನಸಾ ಕಪಣಿಕಾ, ಅನ್ಧಾ ಅಪರಿಣಾಯಿಕಾ;

ಖಾಣುಂ ಪಾದೇನ ಘಟ್ಟೇತಿ, ಗಿರಿಂ ಚಣ್ಡೋರಣಂ ಪತಿ.

೫. ಕಾ ನು ತೇ ಸಾ ಮಹಾನಾಗ, ಅನ್ಧಾ ಅಪರಿಣಾಯಿಕಾ;

ಖಾಣುಂ ಪಾದೇನ ಘಟ್ಟೇತಿ, ಗಿರಿಂ ಚಣ್ಡೋರಣಂ ಪತಿ.

೬. ಮಾತಾ ಮೇ ಸಾ ಮಹಾರಾಜ, ಅನ್ಧಾ ಅಪರಿಣಾಯಿಕಾ;

ಖಾಣುಂ ಪಾದೇನ ಘಟ್ಟೇತಿ, ಗಿರಿಂ ಚಣ್ಡೋರಣಂ ಪತಿ.

೭. ಮುಞ್ಚಥೇತಂ ಮಹಾನಾಗಂ, ಯೋಯಂ ಭರತಿ ಮಾತರಂ;

ಸಮೇತು ಮಾತರಾ ನಾಗೋ, ಸಹ ಸಬ್ಬೇಹಿ ಞಾತಿಭಿ.

೮. ಮುತ್ತೋ ಚ ಬನ್ಧನಾ ನಾಗೋ, ಮುತ್ತಮಾದಾಯ ಕುಞ್ಜರೋ [ಕಾಸಿರಾಜೇನ ಪೇಸಿತೋ (ಸೀ. ಸ್ಯಾ.), ಮುತ್ತೋ ದಾಮಾತೋ ಕುಞ್ಜರೋ (ಪೀ. ಸೀ. ನಿಯ್ಯ)];

ಮುಹುತ್ತಂ ಅಸ್ಸಾಸಯಿತ್ವಾ [ವಿಸ್ಸಮಿತ್ವಾನ (ಸೀ.)], ಅಗಮಾ ಯೇನ ಪಬ್ಬತೋ.

೯. ತತೋ ಸೋ ನಳಿನಿಂ [ನಿಲಿನಂ (ಸ್ಯಾ.)] ಗನ್ತ್ವಾ, ಸೀತಂ ಕುಞ್ಜರಸೇವಿತಂ;

ಸೋಣ್ಡಾಯೂದಕಮಾಹತ್ವಾ [ಮಾಹಿತ್ವಾ (ಸ್ಯಾ. ಕ.)], ಮಾತರಂ ಅಭಿಸಿಞ್ಚಥ.

೧೦. ಕೋಯ ಅನರಿಯೋ ದೇವೋ, ಅಕಾಲೇನಪಿ ವಸ್ಸತಿ [ಅಕಾಲೇನ ಪವಸ್ಸತಿ (ಸೀ. ಸ್ಯಾ.), ಅಕಾಲೇನ’ತಿವಸ್ಸತಿ (ಪೀ.)];

ಗತೋ ಮೇ ಅತ್ರಜೋ ಪುತ್ತೋ, ಯೋ ಮಯ್ಹಂ ಪರಿಚಾರಕೋ.

೧೧. ಉಟ್ಠೇಹಿ ಅಮ್ಮ ಕಿಂ ಸೇಸಿ, ಆಗತೋ ತ್ಯಾಹಮತ್ರಜೋ;

ಮುತ್ತೋಮ್ಹಿ ಕಾಸಿರಾಜೇನ, ವೇದೇಹೇನ ಯಸಸ್ಸಿನಾ.

೧೨. ಚಿರಂ ಜೀವತು ಸೋ ರಾಜಾ, ಕಾಸೀನಂ ರಟ್ಠವಡ್ಢನೋ;

ಯೋ ಮೇ ಪುತ್ತಂ ಪಮೋಚೇಸಿ, ಸದಾ ವುದ್ಧಾಪಚಾಯಿಕನ್ತಿ.

ಮಾತುಪೋಸಕಜಾತಕಂ ಪಠಮಂ.