೧. ವಿತಕ್ಕಸುತ್ತಂ

೮೦. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –

‘‘ತಯೋಮೇ, ಭಿಕ್ಖವೇ, ಅಕುಸಲವಿತಕ್ಕಾ. ಕತಮೇ ತಯೋ? ಅನವಞ್ಞತ್ತಿಪಟಿಸಂಯುತ್ತೋ ವಿತಕ್ಕೋ, ಲಾಭಸಕ್ಕಾರಸಿಲೋಕಪಟಿಸಂಯುತ್ತೋ ವಿತಕ್ಕೋ, ಪರಾನುದ್ದಯತಾಪಟಿಸಂಯುತ್ತೋ ವಿತಕ್ಕೋ. ಇಮೇ ಖೋ, ಭಿಕ್ಖವೇ, ತಯೋ ಅಕುಸಲವಿತಕ್ಕಾ’’ತಿ. ಏತಮತ್ಥಂ ಭಗವಾ ಅವೋಚ. ತತ್ಥೇತಂ ಇತಿ ವುಚ್ಚತಿ –

‘‘ಅನವಞ್ಞತ್ತಿಸಂಯುತ್ತೋ, ಲಾಭಸಕ್ಕಾರಗಾರವೋ;

ಸಹನನ್ದೀ ಅಮಚ್ಚೇಹಿ, ಆರಾ ಸಂಯೋಜನಕ್ಖಯಾ.

‘‘ಯೋ ಚ ಪುತ್ತಪಸುಂ ಹಿತ್ವಾ, ವಿವಾಹೇ ಸಂಹರಾನಿ [ಸಙ್ಗಹಾನಿ (ಕ. ಸೀ. ಸ್ಯಾ. ಪೀ.)] ಚ;

ಭಬ್ಬೋ ಸೋ ತಾದಿಸೋ ಭಿಕ್ಖು, ಫುಟ್ಠುಂ ಸಮ್ಬೋಧಿಮುತ್ತಮ’’ನ್ತಿ.

ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ. ಪಠಮಂ.