೮. ಭಿದುರಸುತ್ತಂ

೭೭. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –

‘‘ಭಿದುರಾಯಂ [ಭಿನ್ದನ್ತಾಯಂ (ಸ್ಯಾ. ಪೀ. ಕ.)], ಭಿಕ್ಖವೇ, ಕಾಯೋ, ವಿಞ್ಞಾಣಂ ವಿರಾಗಧಮ್ಮಂ, ಸಬ್ಬೇ ಉಪಧೀ ಅನಿಚ್ಚಾ ದುಕ್ಖಾ ವಿಪರಿಣಾಮಧಮ್ಮಾ’’ತಿ. ಏತಮತ್ಥಂ ಭಗವಾ ಅವೋಚ. ತತ್ಥೇತಂ ಇತಿ ವುಚ್ಚತಿ –

‘‘ಕಾಯಞ್ಚ ಭಿದುರಂ [ಭಿನ್ದನ್ತಂ (ಸ್ಯಾ. ಪೀ. ಕ.)] ಞತ್ವಾ, ವಿಞ್ಞಾಣಞ್ಚ ವಿರಾಗುನಂ [ವಿರಾಗಿಕಂ (ಕ. ಸೀ.), ಪಭಙ್ಗುಣಂ (ಸ್ಯಾ.)];

ಉಪಧೀಸು ಭಯಂ ದಿಸ್ವಾ, ಜಾತಿಮರಣಮಚ್ಚಗಾ;

ಸಮ್ಪತ್ವಾ ಪರಮಂ ಸನ್ತಿಂ, ಕಾಲಂ ಕಙ್ಖತಿ ಭಾವಿತತ್ತೋ’’ತಿ.

ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ. ಅಟ್ಠಮಂ.