೫. ಸೋಣಪಣ್ಡಿತಚರಿಯಾ

೪೨. ‘‘ಪುನಾಪರಂ ಯದಾ ಹೋಮಿ, ನಗರೇ ಬ್ರಹ್ಮವಡ್ಢನೇ;

ತತ್ಥ ಕುಲವರೇ ಸೇಟ್ಠೇ, ಮಹಾಸಾಲೇ ಅಜಾಯಹಂ.

೪೩. ‘‘ತದಾಪಿ ಲೋಕಂ ದಿಸ್ವಾನ, ಅನ್ಧೀಭೂತಂ ತಮೋತ್ಥಟಂ;

ಚಿತ್ತಂ ಭವತೋ ಪತಿಕುಟತಿ, ತುತ್ತವೇಗಹತಂ ವಿಯ.

೪೪. ‘‘ದಿಸ್ವಾನ ವಿವಿಧಂ ಪಾಪಂ, ಏವಂ ಚಿನ್ತೇಸಹಂ ತದಾ;

‘ಕದಾಹಂ ಗೇಹಾ ನಿಕ್ಖಮ್ಮ, ಪವಿಸಿಸ್ಸಾಮಿ ಕಾನನಂ’.

೪೫. ‘‘ತದಾಪಿ ಮಂ ನಿಮನ್ತೇಸುಂ, ಕಾಮಭೋಗೇಹಿ ಞಾತಯೋ;

ತೇಸಮ್ಪಿ ಛನ್ದಮಾಚಿಕ್ಖಿಂ, ‘ಮಾ ನಿಮನ್ತೇಥ ತೇಹಿ ಮಂ’.

೪೬. ‘‘ಯೋ ಮೇ ಕನಿಟ್ಠಕೋ ಭಾತಾ, ನನ್ದೋ ನಾಮಾಸಿ ಪಣ್ಡಿತೋ;

ಸೋಪಿ ಮಂ ಅನುಸಿಕ್ಖನ್ತೋ, ಪಬ್ಬಜ್ಜಂ ಸಮರೋಚಯಿ.

೪೭. ‘‘ಅಹಂ ಸೋಣೋ ಚ ನನ್ದೋ ಚ, ಉಭೋ ಮಾತಾಪಿತಾ ಮಮ;

ತದಾಪಿ ಭೋಗೇ ಛಡ್ಡೇತ್ವಾ, ಪಾವಿಸಿಮ್ಹಾ ಮಹಾವನ’’ನ್ತಿ.

ಸೋಣಪಣ್ಡಿತಚರಿಯಂ ಪಞ್ಚಮಂ.