೬. ತೇಮಿಯಚರಿಯಾ

೪೮. ‘‘ಪುನಾಪರಂ ಯದಾ ಹೋಮಿ, ಕಾಸಿರಾಜಸ್ಸ ಅತ್ರಜೋ;

ಮೂಗಪಕ್ಖೋತಿ ನಾಮೇನ, ತೇಮಿಯೋತಿ ವದನ್ತಿ ಮಂ.

೪೯. ‘‘ಸೋಳಸಿತ್ಥಿಸಹಸ್ಸಾನಂ, ನ ವಿಜ್ಜತಿ ಪುಮೋ ತದಾ [ಸದಾ (ಸೀ.)];

ಅಹೋರತ್ತಾನಂ ಅಚ್ಚಯೇನ, ನಿಬ್ಬತ್ತೋ ಅಹಮೇಕಕೋ.

೫೦. ‘‘ಕಿಚ್ಛಾ ಲದ್ಧಂ ಪಿಯಂ ಪುತ್ತಂ, ಅಭಿಜಾತಂ ಜುತಿನ್ಧರಂ;

ಸೇತಚ್ಛತ್ತಂ ಧಾರಯಿತ್ವಾನ, ಸಯನೇ ಪೋಸೇತಿ ಮಂ ಪಿತಾ.

೫೧. ‘‘ನಿದ್ದಾಯಮಾನೋ ಸಯನವರೇ, ಪಬುಜ್ಝಿತ್ವಾನಹಂ ತದಾ;

ಅದ್ದಸಂ ಪಣ್ಡರಂ ಛತ್ತಂ, ಯೇನಾಹಂ ನಿರಯಂ ಗತೋ.

೫೨. ‘‘ಸಹ ದಿಟ್ಠಸ್ಸ ಮೇ ಛತ್ತಂ, ತಾಸೋ ಉಪ್ಪಜ್ಜಿ ಭೇರವೋ;

ವಿನಿಚ್ಛಯಂ ಸಮಾಪನ್ನೋ, ‘ಕಥಾಹಂ ಇಮಂ ಮುಞ್ಚಿಸ್ಸಂ’.

೫೩. ‘‘ಪುಬ್ಬಸಾಲೋಹಿತಾ ಮಯ್ಹಂ, ದೇವತಾ ಅತ್ಥಕಾಮಿನೀ;

ಸಾ ಮಂ ದಿಸ್ವಾನ ದುಕ್ಖಿತಂ, ತೀಸು ಠಾನೇಸು ಯೋಜಯಿ.

೫೪. ‘‘‘ಮಾ ಪಣ್ಡಿಚ್ಚಯಂ ವಿಭಾವಯ, ಬಾಲಮತೋ ಭವ ಸಬ್ಬಪಾಣಿನಂ;

ಸಬ್ಬೋ ತಂ ಜನೋ ಓಚಿನಾಯತು, ಏವಂ ತವ ಅತ್ಥೋ ಭವಿಸ್ಸತಿ’.

೫೫. ‘‘ಏವಂ ವುತ್ತಾಯಹಂ ತಸ್ಸಾ, ಇದಂ ವಚನಮಬ್ರವಿಂ;

‘ಕರೋಮಿ ತೇ ತಂ ವಚನಂ, ಯಂ ತ್ವಂ ಭಣಸಿ ದೇವತೇ;

ಅತ್ಥಕಾಮಾಸಿ ಮೇ ಅಮ್ಮ, ಹಿತಕಾಮಾಸಿ ದೇವತೇ’.

೫೬. ‘‘ತಸ್ಸಾಹಂ ವಚನಂ ಸುತ್ವಾ, ಸಾಗರೇವ ಥಲಂ ಲಭಿಂ;

ಹಟ್ಠೋ ಸಂವಿಗ್ಗಮಾನಸೋ, ತಯೋ ಅಙ್ಗೇ ಅಧಿಟ್ಠಹಿಂ.

೫೭. ‘‘ಮೂಗೋ ಅಹೋಸಿಂ ಬಧಿರೋ, ಪಕ್ಖೋ ಗತಿವಿವಜ್ಜಿತೋ;

ಏತೇ ಅಙ್ಗೇ ಅಧಿಟ್ಠಾಯ, ವಸ್ಸಾನಿ ಸೋಳಸಂ ವಸಿಂ.

೫೮. ‘‘ತತೋ ಮೇ ಹತ್ಥಪಾದೇ ಚ, ಜಿವ್ಹಂ ಸೋತಞ್ಚ ಮದ್ದಿಯ;

ಅನೂನತಂ ಮೇ ಪಸ್ಸಿತ್ವಾ, ‘ಕಾಳಕಣ್ಣೀ’ತಿ ನಿನ್ದಿಸುಂ.

೫೯. ‘‘ತತೋ ಜಾನಪದಾ ಸಬ್ಬೇ, ಸೇನಾಪತಿಪುರೋಹಿತಾ;

ಸಬ್ಬೇ ಏಕಮನಾ ಹುತ್ವಾ, ಛಡ್ಡನಂ ಅನುಮೋದಿಸುಂ.

೬೦. ‘‘ಸೋಹಂ ತೇಸಂ ಮತಿಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ;

ಯಸ್ಸತ್ಥಾಯ ತಪೋಚಿಣ್ಣೋ, ಸೋ ಮೇ ಅತ್ಥೋ ಸಮಿಜ್ಝಥ.

೬೧. ‘‘ನ್ಹಾಪೇತ್ವಾ ಅನುಲಿಮ್ಪಿತ್ವಾ, ವೇಠೇತ್ವಾ ರಾಜವೇಠನಂ;

ಛತ್ತೇನ ಅಭಿಸಿಞ್ಚಿತ್ವಾ, ಕಾರೇಸುಂ ಪುರಂ ಪದಕ್ಖಿಣಂ.

೬೨. ‘‘ಸತ್ತಾಹಂ ಧಾರಯಿತ್ವಾನ, ಉಗ್ಗತೇ ರವಿಮಣ್ಡಲೇ;

ರಥೇನ ಮಂ ನೀಹರಿತ್ವಾ, ಸಾರಥೀ ವನಮುಪಾಗಮಿ.

೬೩. ‘‘ಏಕೋಕಾಸೇ ರಥಂ ಕತ್ವಾ, ಸಜ್ಜಸ್ಸಂ ಹತ್ಥಮುಚ್ಚಿತೋ [ಹತ್ಥಮುಞ್ಚಿತೋ (ಸೀ. ಸ್ಯಾ.)];

ಸಾರಥೀ ಖಣತೀ ಕಾಸುಂ, ನಿಖಾತುಂ ಪಥವಿಯಾ ಮಮಂ.

೬೪. ‘‘ಅಧಿಟ್ಠಿತಮಧಿಟ್ಠಾನಂ, ತಜ್ಜೇನ್ತೋ ವಿವಿಧಕಾರಣಾ;

ನ ಭಿನ್ದಿಂ ತಮಧಿಟ್ಠಾನಂ, ಬೋಧಿಯಾಯೇವ ಕಾರಣಾ.

೬೫. ‘‘ಮಾತಾಪಿತಾ ನ ಮೇ ದೇಸ್ಸಾ, ಅತ್ತಾ ಮೇ ನ ಚ ದೇಸ್ಸಿಯೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ವತಮಧಿಟ್ಠಹಿಂ.

೬೬. ‘‘ಏತೇ ಅಙ್ಗೇ ಅಧಿಟ್ಠಾಯ, ವಸ್ಸಾನಿ ಸೋಳಸಂ ವಸಿಂ;

ಅಧಿಟ್ಠಾನೇನ ಮೇ ಸಮೋ ನತ್ಥಿ, ಏಸಾ ಮೇ ಅಧಿಟ್ಠಾನಪಾರಮೀ’’ತಿ.

ತೇಮಿಯಚರಿಯಂ ಛಟ್ಠಂ.