೪. ಭಿಸಚರಿಯಾ

೩೪. ‘‘ಪುನಾಪರಂ ಯದಾ ಹೋಮಿ, ಕಾಸೀನಂ ಪುರವರುತ್ತಮೇ;

ಭಗಿನೀ ಚ ಭಾತರೋ ಸತ್ತ, ನಿಬ್ಬತ್ತಾ ಸೋತ್ಥಿಯೇ ಕುಲೇ.

೩೫. ‘‘ಏತೇಸಂ ಪುಬ್ಬಜೋ ಆಸಿಂ, ಹಿರೀಸುಕ್ಕಮುಪಾಗತೋ;

ಭವಂ ದಿಸ್ವಾನ ಭಯತೋ, ನೇಕ್ಖಮ್ಮಾಭಿರತೋ ಅಹಂ.

೩೬. ‘‘ಮಾತಾಪಿತೂಹಿ ಪಹಿತಾ, ಸಹಾಯಾ ಏಕಮಾನಸಾ;

ಕಾಮೇಹಿ ಮಂ ನಿಮನ್ತೇನ್ತಿ, ‘ಕುಲವಂಸಂ ಧರೇಹಿ’ತಿ.

೩೭. ‘‘ಯಂ ತೇಸಂ ವಚನಂ ವುತ್ತಂ, ಗಿಹೀಧಮ್ಮೇ ಸುಖಾವಹಂ;

ತಂ ಮೇ ಅಹೋಸಿ ಕಠಿನಂ, ತತ್ತ [ಸನ್ತತ್ತ (ಕ.)] ಫಾಲಸಮಂ ವಿಯ.

೩೮. ‘‘ತೇ ಮಂ ತದಾ ಉಕ್ಖಿಪನ್ತಂ, ಪುಚ್ಛಿಂಸು ಪತ್ಥಿತಂ ಮಮ;

‘ಕಿಂ ತ್ವಂ ಪತ್ಥಯಸೇ ಸಮ್ಮ, ಯದಿ ಕಾಮೇ ನ ಭುಞ್ಜಸಿ’.

೩೯. ‘‘ತೇಸಾಹಂ ಏವಮವಚಂ, ಅತ್ಥಕಾಮೋ ಹಿತೇಸಿನಂ;

‘ನಾಹಂ ಪತ್ಥೇಮಿ ಗಿಹೀಭಾವಂ, ನೇಕ್ಖಮ್ಮಾಭಿರತೋ ಅಹಂ’.

೪೦. ‘‘ತೇ ಮಯ್ಹಂ ವಚನಂ ಸುತ್ವಾ, ಪಿತುಮಾತು ಚ ಸಾವಯುಂ;

ಮಾತಾಪಿತಾ ಏವಮಾಹು, ‘ಸಬ್ಬೇವ ಪಬ್ಬಜಾಮ ಭೋ’.

೪೧. ‘‘ಉಭೋ ಮಾತಾಪಿತಾ ಮಯ್ಹಂ, ಭಗಿನೀ ಚ ಸತ್ತ ಭಾತರೋ;

ಅಮಿತಧನಂ ಛಡ್ಡಯಿತ್ವಾ, ಪಾವಿಸಿಮ್ಹಾ ಮಹಾವನ’’ನ್ತಿ.

ಭಿಸಚರಿಯಂ ಚತುತ್ಥಂ.