೩. ಅಯೋಘರಚರಿಯಾ

೨೪. ‘‘ಪುನಾಪರಂ ಯದಾ ಹೋಮಿ, ಕಾಸಿರಾಜಸ್ಸ ಅತ್ರಜೋ;

ಅಯೋಘರಮ್ಹಿ ಸಂವಡ್ಢೋ, ನಾಮೇನಾಸಿ ಅಯೋಘರೋ.

೨೫. ‘‘ದುಕ್ಖೇನ ಜೀವಿತೋ ಲದ್ಧೋ, ಸಂಪೀಳೇ ಪತಿಪೋಸಿತೋ;

ಅಜ್ಜೇವ ಪುತ್ತ ಪಟಿಪಜ್ಜ, ಕೇವಲಂ ವಸುಧಂ ಇಮಂ.

೨೬. ‘‘ಸರಟ್ಠಕಂ ಸನಿಗಮಂ, ಸಜನಂ ವನ್ದಿತ್ವ ಖತ್ತಿಯಂ;

ಅಞ್ಜಲಿಂ ಪಗ್ಗಹೇತ್ವಾನ, ಇದಂ ವಚನಮಬ್ರವಿಂ.

೨೭. ‘‘‘ಯೇ ಕೇಚಿ ಮಹಿಯಾ ಸತ್ತಾ, ಹೀನಮುಕ್ಕಟ್ಠಮಜ್ಝಿಮಾ;

ನಿರಾರಕ್ಖಾ ಸಕೇ ಗೇಹೇ, ವಡ್ಢನ್ತಿ ಸಕಞಾತಿಭಿ.

೨೮. ‘‘‘ಇದಂ ಲೋಕೇ ಉತ್ತರಿಯಂ, ಸಂಪೀಳೇ ಮಮ ಪೋಸನಂ;

ಅಯೋಘರಮ್ಹಿ ಸಂವಡ್ಢೋ, ಅಪ್ಪಭೇ ಚನ್ದಸೂರಿಯೇ.

೨೯. ‘‘‘ಪೂತಿಕುಣಪಸಮ್ಪುಣ್ಣಾ, ಮುಚ್ಚಿತ್ವಾ ಮಾತು ಕುಚ್ಛಿತೋ;

ತತೋ ಘೋರತರೇ ದುಕ್ಖೇ, ಪುನ ಪಕ್ಖಿತ್ತಯೋಘರೇ.

೩೦. ‘‘‘ಯದಿಹಂ ತಾದಿಸಂ ಪತ್ವಾ, ದುಕ್ಖಂ ಪರಮದಾರುಣಂ;

ರಜ್ಜೇಸು ಯದಿ ರಜ್ಜಾಮಿ [ರಞ್ಜಾಮಿ (ಸೀ.)], ಪಾಪಾನಂ ಉತ್ತಮೋ ಸಿಯಂ.

೩೧. ‘‘‘ಉಕ್ಕಣ್ಠಿತೋಮ್ಹಿ ಕಾಯೇನ, ರಜ್ಜೇನಮ್ಹಿ ಅನತ್ಥಿಕೋ;

ನಿಬ್ಬುತಿಂ ಪರಿಯೇಸಿಸ್ಸಂ, ಯತ್ಥ ಮಂ ಮಚ್ಚು ನ ಮದ್ದಿಯೇ’.

೩೨. ‘‘ಏವಾಹಂ ಚಿನ್ತಯಿತ್ವಾನ, ವಿರವನ್ತೇ ಮಹಾಜನೇ;

ನಾಗೋವ ಬನ್ಧನಂ ಛೇತ್ವಾ, ಪಾವಿಸಿಂ ಕಾನನಂ ವನಂ.

೩೩. ‘‘ಮಾತಾಪಿತಾ ನ ಮೇ ದೇಸ್ಸಾ, ನಪಿ ಮೇ ದೇಸ್ಸಂ ಮಹಾಯಸಂ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ.

ಅಯೋಘರಚರಿಯಂ ತತಿಯಂ.