೨. ಸೋಮನಸ್ಸಚರಿಯಾ

೭. ‘‘ಪುನಾಪರಂ ಯದಾ ಹೋಮಿ, ಇನ್ದಪತ್ಥೇ ಪುರುತ್ತಮೇ;

ಕಾಮಿತೋ ದಯಿತೋ ಪುತ್ತೋ, ಸೋಮನಸ್ಸೋತಿ ವಿಸ್ಸುತೋ.

೮. ‘‘ಸೀಲವಾ ಗುಣಸಮ್ಪನ್ನೋ, ಕಲ್ಯಾಣಪಟಿಭಾನವಾ;

ವುಡ್ಢಾಪಚಾಯೀ ಹಿರೀಮಾ, ಸಙ್ಗಹೇಸು ಚ ಕೋವಿದೋ.

೯. ‘‘ತಸ್ಸ ರಞ್ಞೋ ಪತಿಕರೋ, ಅಹೋಸಿ ಕುಹಕತಾಪಸೋ;

ಆರಾಮಂ ಮಾಲಾವಚ್ಛಞ್ಚ, ರೋಪಯಿತ್ವಾನ ಜೀವತಿ.

೧೦. ‘‘ತಮಹಂ ದಿಸ್ವಾನ ಕುಹಕಂ, ಥುಸರಾಸಿಂವ ಅತಣ್ಡುಲಂ;

ದುಮಂವ ಅನ್ತೋ ಸುಸಿರಂ, ಕದಲಿಂವ ಅಸಾರಕಂ.

೧೧. ‘‘ನತ್ಥಿಮಸ್ಸ ಸತಂ ಧಮ್ಮೋ, ಸಾಮಞ್ಞಾಪಗತೋ ಅಯಂ;

ಹಿರೀಸುಕ್ಕಧಮ್ಮಜಹಿತೋ, ಜೀವಿತವುತ್ತಿಕಾರಣಾ.

೧೨. ‘‘ಕುಪಿತೋ ಅಹು [ಅಹೋಸಿ (ಸೀ.), ಆಸಿ (ಸ್ಯಾ.)] ಪಚ್ಚನ್ತೋ, ಅಟವೀಹಿ ಪರನ್ತಿಹಿ;

ತಂ ನಿಸೇಧೇತುಂ ಗಚ್ಛನ್ತೋ, ಅನುಸಾಸಿ ಪಿತಾ ಮಮಂ.

೧೩. ‘‘‘ಮಾ ಪಮಜ್ಜಿ ತುವಂ ತಾತ, ಜಟಿಲಂ ಉಗ್ಗತಾಪನಂ;

ಯದಿಚ್ಛಕಂ ಪವತ್ತೇಹಿ, ಸಬ್ಬಕಾಮದದೋ ಹಿ ಸೋ’.

೧೪. ‘‘ತಮಹಂ ಗನ್ತ್ವಾನುಪಟ್ಠಾನಂ, ಇದಂ ವಚನಮಬ್ರವಿಂ;

‘ಕಚ್ಚಿ ತೇ ಗಹಪತಿ ಕುಸಲಂ, ಕಿಂ ವಾ ತೇ ಆಹರೀಯತು’.

೧೫. ‘‘ತೇನ ಸೋ ಕುಪಿತೋ ಆಸಿ, ಕುಹಕೋ ಮಾನನಿಸ್ಸಿತೋ;

‘ಘಾತಾಪೇಮಿ ತುವಂ ಅಜ್ಜ, ರಟ್ಠಾ ಪಬ್ಬಾಜಯಾಮಿ ವಾ’.

೧೬. ‘‘ನಿಸೇಧಯಿತ್ವಾ ಪಚ್ಚನ್ತಂ, ರಾಜಾ ಕುಹಕಮಬ್ರವಿ;

‘ಕಚ್ಚಿ ತೇ ಭನ್ತೇ ಖಮನೀಯಂ, ಸಮ್ಮಾನೋ ತೇ ಪವತ್ತಿತೋ’.

೧೭. ‘‘ತಸ್ಸ ಆಚಿಕ್ಖತೀ ಪಾಪೋ, ಕುಮಾರೋ ಯಥಾ ನಾಸಿಯೋ;

ತಸ್ಸ ತಂ ವಚನಂ ಸುತ್ವಾ, ಆಣಾಪೇಸಿ ಮಹೀಪತಿ.

೧೮. ‘‘‘ಸೀಸಂ ತತ್ಥೇವ ಛಿನ್ದಿತ್ವಾ, ಕತ್ವಾನ ಚತುಖಣ್ಡಿಕಂ;

ರಥಿಯಾ ರಥಿಯಂ ದಸ್ಸೇಥ, ಸಾ ಗತಿ ಜಟಿಲಹೀಳಿತಾ’.

೧೯. ‘‘ತತ್ಥ ಕಾರಣಿಕಾ ಗನ್ತ್ವಾ, ಚಣ್ಡಾ ಲುದ್ದಾ ಅಕಾರುಣಾ;

ಮಾತುಅಙ್ಕೇ ನಿಸಿನ್ನಸ್ಸ, ಆಕಡ್ಢಿತ್ವಾ ನಯನ್ತಿ ಮಂ.

೨೦. ‘‘ತೇಸಾಹಂ ಏವಮವಚಂ, ಬನ್ಧತಂ ಗಾಳ್ಹಬನ್ಧನಂ;

‘ರಞ್ಞೋ ದಸ್ಸೇಥ ಮಂ ಖಿಪ್ಪಂ, ರಾಜಕಿರಿಯಾನಿ ಅತ್ಥಿ ಮೇ’.

೨೧. ‘‘ತೇ ಮಂ ರಞ್ಞೋ ದಸ್ಸಯಿಂಸು, ಪಾಪಸ್ಸ ಪಾಪಸೇವಿನೋ;

ದಿಸ್ವಾನ ತಂ ಸಞ್ಞಾಪೇಸಿಂ, ಮಮಞ್ಚ ವಸಮಾನಯಿಂ.

೨೨. ‘‘ಸೋ ಮಂ ತತ್ಥ ಖಮಾಪೇಸಿ, ಮಹಾರಜ್ಜಮದಾಸಿ ಮೇ;

ಸೋಹಂ ತಮಂ ದಾಲಯಿತ್ವಾ, ಪಬ್ಬಜಿಂ ಅನಗಾರಿಯಂ.

೨೩. ‘‘ನ ಮೇ ದೇಸ್ಸಂ ಮಹಾರಜ್ಜಂ, ಕಾಮಭೋಗೋ ನ ದೇಸ್ಸಿಯೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ.

ಸೋಮನಸ್ಸಚರಿಯಂ ದುತಿಯಂ.