೧. ಯುಧಞ್ಜಯಚರಿಯಾ

೧. ‘‘ಯದಾಹಂ ಅಮಿತಯಸೋ, ರಾಜಪುತ್ತೋ ಯುಧಞ್ಜಯೋ;

ಉಸ್ಸಾವಬಿನ್ದುಂ ಸೂರಿಯಾತಪೇ, ಪತಿತಂ ದಿಸ್ವಾನ ಸಂವಿಜಿಂ.

೨. ‘‘ತಞ್ಞೇವಾಧಿಪತಿಂ ಕತ್ವಾ, ಸಂವೇಗಮನುಬ್ರೂಹಯಿಂ;

ಮಾತಾಪಿತೂ ಚ ವನ್ದಿತ್ವಾ, ಪಬ್ಬಜ್ಜಮನುಯಾಚಹಂ.

೩. ‘‘ಯಾಚನ್ತಿ ಮಂ ಪಞ್ಜಲಿಕಾ, ಸನೇಗಮಾ ಸರಟ್ಠಕಾ;

‘ಅಜ್ಜೇವ ಪುತ್ತ ಪಟಿಪಜ್ಜ, ಇದ್ಧಂ ಫೀತಂ ಮಹಾಮಹಿಂ’.

೪. ‘‘ಸರಾಜಕೇ ಸಹೋರೋಧೇ, ಸನೇಗಮೇ ಸರಟ್ಠಕೇ;

ಕರುಣಂ ಪರಿದೇವನ್ತೇ, ಅನಪೇಕ್ಖೋವ ಪರಿಚ್ಚಜಿಂ.

೫. ‘‘ಕೇವಲಂ ಪಥವಿಂ ರಜ್ಜಂ, ಞಾತಿಪರಿಜನಂ ಯಸಂ;

ಚಜಮಾನೋ ನ ಚಿನ್ತೇಸಿಂ, ಬೋಧಿಯಾಯೇವ ಕಾರಣಾ.

೬. ‘‘ಮಾತಾಪಿತಾ ನ ಮೇ ದೇಸ್ಸಾ, ನಪಿ ಮೇ ದೇಸ್ಸಂ ಮಹಾಯಸಂ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ.

ಯುಧಞ್ಜಯಚರಿಯಂ ಪಠಮಂ.