೯. ಅಲೀನಸತ್ತುಚರಿಯಾ

೭೪. ‘‘ಪಞ್ಚಾಲರಟ್ಠೇ ನಗರವರೇ, ಕಪಿಲಾಯಂ [ಕಮ್ಪಿಲಾಯಂ (ಸೀ.), ಕಪ್ಪಿಲಾಯಂ (ಸ್ಯಾ.)] ಪುರುತ್ತಮೇ;

ರಾಜಾ ಜಯದ್ದಿಸೋ ನಾಮ, ಸೀಲಗುಣಮುಪಾಗತೋ.

೭೫. ‘‘ತಸ್ಸ ರಞ್ಞೋ ಅಹಂ ಪುತ್ತೋ, ಸುತಧಮ್ಮೋ ಸುಸೀಲವಾ;

ಅಲೀನಸತ್ತೋ ಗುಣವಾ, ಅನುರಕ್ಖಪರಿಜನೋ ಸದಾ.

೭೬. ‘‘ಪಿತಾ ಮೇ ಮಿಗವಂ ಗನ್ತ್ವಾ, ಪೋರಿಸಾದಂ ಉಪಾಗಮಿ;

ಸೋ ಮೇ ಪಿತುಮಗ್ಗಹೇಸಿ, ‘ಭಕ್ಖೋಸಿ ಮಮ ಮಾ ಚಲಿ’.

೭೭. ‘‘ತಸ್ಸ ತಂ ವಚನಂ ಸುತ್ವಾ, ಭೀತೋ ತಸಿತವೇಧಿತೋ;

ಊರುಕ್ಖಮ್ಭೋ ಅಹು ತಸ್ಸ, ದಿಸ್ವಾನ ಪೋರಿಸಾದಕಂ.

೭೮. ‘‘ಮಿಗವಂ ಗಹೇತ್ವಾ ಮುಞ್ಚಸ್ಸು, ಕತ್ವಾ ಆಗಮನಂ ಪುನ;

ಬ್ರಾಹ್ಮಣಸ್ಸ ಧನಂ ದತ್ವಾ, ಪಿತಾ ಆಮನ್ತಯೀ ಮಮಂ.

೭೯. ‘‘‘ರಜ್ಜಂ ಪುತ್ತ ಪಟಿಪಜ್ಜ, ಮಾ ಪಮಜ್ಜಿ ಪುರಂ ಇದಂ;

ಕತಂ ಮೇ ಪೋರಿಸಾದೇನ, ಮಮ ಆಗಮನಂ ಪುನ’.

೮೦. ‘‘ಮಾತಾಪಿತೂ ಚ ವನ್ದಿತ್ವಾ, ನಿಮ್ಮಿನಿತ್ವಾನ ಅತ್ತನಾ;

ನಿಕ್ಖಿಪಿತ್ವಾ ಧನುಂ ಖಗ್ಗಂ, ಪೋರಿಸಾದಂ ಉಪಾಗಮಿಂ.

೮೧. ‘‘ಸಸತ್ಥಹತ್ಥೂಪಗತಂ, ಕದಾಚಿ ಸೋ ತಸಿಸ್ಸತಿ;

ತೇನ ಭಿಜ್ಜಿಸ್ಸತಿ ಸೀಲಂ, ಪರಿತ್ತಾಸಂ [ಪರಿತಾಸಂ (ಸೀ.)] ಕತೇ ಮಯಿ.

೮೨. ‘‘ಸೀಲಖಣ್ಡಭಯಾ ಮಯ್ಹಂ, ತಸ್ಸ ದೇಸ್ಸಂ ನ ಬ್ಯಾಹರಿಂ;

ಮೇತ್ತಚಿತ್ತೋ ಹಿತವಾದೀ, ಇದಂ ವಚನಮಬ್ರವಿಂ.

೮೩. ‘‘‘ಉಜ್ಜಾಲೇಹಿ ಮಹಾಅಗ್ಗಿಂ, ಪಪತಿಸ್ಸಾಮಿ ರುಕ್ಖತೋ;

ತ್ವಂ ಪಕ್ಕಕಾಲಮಞ್ಞಾಯ [ಸುಪಕ್ಕಕಾಲಮಞ್ಞಾಯ (ಪೀ.)], ಭಕ್ಖಯ ಮಂ ಪಿತಾಮಹ’.

೮೪. ‘‘ಇತಿ ಸೀಲವತಂ ಹೇತು, ನಾರಕ್ಖಿಂ ಮಮ ಜೀವಿತಂ;

ಪಬ್ಬಾಜೇಸಿಂ ಚಹಂ ತಸ್ಸ, ಸದಾ ಪಾಣಾತಿಪಾತಿಕ’’ನ್ತಿ.

ಅಲೀನಸತ್ತುಚರಿಯಂ ನವಮಂ.