೧೦. ಸಙ್ಖಪಾಲಚರಿಯಾ

೮೫. ‘‘ಪುನಾಪರಂ ಯದಾ ಹೋಮಿ, ಸಙ್ಖಪಾಲೋ ಮಹಿದ್ಧಿಕೋ;

ದಾಠಾವುಧೋ ಘೋರವಿಸೋ, ದ್ವಿಜಿವ್ಹೋ ಉರಗಾಧಿಭೂ.

೮೬. ‘‘ಚತುಪ್ಪಥೇ ಮಹಾಮಗ್ಗೇ, ನಾನಾಜನಸಮಾಕುಲೇ;

ಚತುರೋ ಅಙ್ಗೇ ಅಧಿಟ್ಠಾಯ, ತತ್ಥ ವಾಸಮಕಪ್ಪಯಿಂ.

೮೭. ‘‘ಛವಿಯಾ ಚಮ್ಮೇನ ಮಂಸೇನ, ನಹಾರುಅಟ್ಠಿಕೇಹಿ ವಾ;

ಯಸ್ಸ ಏತೇನ ಕರಣೀಯಂ, ದಿನ್ನಂಯೇವ ಹರಾತು ಸೋ.

೮೮. ‘‘ಅದ್ದಸಂಸು ಭೋಜಪುತ್ತಾ, ಖರಾ ಲುದ್ದಾ ಅಕಾರುಣಾ;

ಉಪಗಞ್ಛುಂ ಮಮಂ ತತ್ಥ, ದಣ್ಡಮುಗ್ಗರಪಾಣಿನೋ.

೮೯. ‘‘ನಾಸಾಯ ವಿನಿವಿಜ್ಝಿತ್ವಾ, ನಙ್ಗುಟ್ಠೇ ಪಿಟ್ಠಿಕಣ್ಟಕೇ;

ಕಾಜೇ ಆರೋಪಯಿತ್ವಾನ, ಭೋಜಪುತ್ತಾ ಹರಿಂಸು ಮಂ.

೯೦. ‘‘ಸಸಾಗರನ್ತಂ ಪಥವಿಂ, ಸಕಾನನಂ ಸಪಬ್ಬತಂ;

ಇಚ್ಛಮಾನೋ ಚಹಂ ತತ್ಥ, ನಾಸಾವಾತೇನ ಝಾಪಯೇ.

೯೧. ‘‘ಸೂಲೇಹಿ ವಿನಿವಿಜ್ಝನ್ತೇ, ಕೋಟ್ಟಯನ್ತೇಪಿ ಸತ್ತಿಭಿ;

ಭೋಜಪುತ್ತೇ ನ ಕುಪ್ಪಾಮಿ, ಏಸಾ ಮೇ ಸೀಲಪಾರಮೀ’’ತಿ.

ಸಙ್ಖಪಾಲಚರಿಯಂ ದಸಮಂ.

ಹತ್ಥಿನಾಗವಗ್ಗೋ ದುತಿಯೋ.

ತಸ್ಸುದ್ದಾನಂ –

ಹತ್ಥಿನಾಗೋ ಭೂರಿದತ್ತೋ, ಚಮ್ಪೇಯ್ಯೋ ಬೋಧಿ ಮಹಿಂಸೋ;

ರುರು ಮಾತಙ್ಗೋ ಧಮ್ಮೋ ಚ, ಅತ್ರಜೋ ಚ ಜಯದ್ದಿಸೋ.

ಏತೇ ನವ ಸೀಲಬಲಾ, ಪರಿಕ್ಖಾರಾ ಪದೇಸಿಕಾ;

ಜೀವಿತಂ ಪರಿರಕ್ಖಿತ್ವಾ, ಸೀಲಾನಿ ಅನುರಕ್ಖಿಸಂ.

ಸಙ್ಖಪಾಲಸ್ಸ ಮೇ ಸತೋ, ಸಬ್ಬಕಾಲಮ್ಪಿ ಜೀವಿತಂ;

ಯಸ್ಸ ಕಸ್ಸಚಿ ನಿಯ್ಯತ್ತಂ, ತಸ್ಮಾ ಸಾ ಸೀಲಪಾರಮೀತಿ.

ಸೀಲಪಾರಮಿನಿದ್ದೇಸೋ ನಿಟ್ಠಿತೋ.