೩. ಚಮ್ಪೇಯ್ಯನಾಗಚರಿಯಾ

೨೦. ‘‘ಪುನಾಪರಂ ಯದಾ ಹೋಮಿ, ಚಮ್ಪೇಯ್ಯಕೋ ಮಹಿದ್ಧಿಕೋ;

ತದಾಪಿ ಧಮ್ಮಿಕೋ ಆಸಿಂ, ಸೀಲಬ್ಬತಸಮಪ್ಪಿತೋ.

೨೧. ‘‘ತದಾಪಿ ಮಂ ಧಮ್ಮಚಾರಿಂ, ಉಪವುತ್ಥಂ ಉಪೋಸಥಂ;

ಅಹಿತುಣ್ಡಿಕೋ ಗಹೇತ್ವಾನ, ರಾಜದ್ವಾರಮ್ಹಿ ಕೀಳತಿ.

೨೨. ‘‘ಯಂ ಯಂ ಸೋ ವಣ್ಣಂ ಚಿನ್ತಯಿ, ನೀಲಂವ ಪೀತಲೋಹಿತಂ;

ತಸ್ಸ ಚಿತ್ತಾನುವತ್ತನ್ತೋ, ಹೋಮಿ ಚಿನ್ತಿತಸನ್ನಿಭೋ.

೨೩. ‘‘ಥಲಂ ಕರೇಯ್ಯಮುದಕಂ, ಉದಕಮ್ಪಿ ಥಲಂ ಕರೇ;

ಯದಿಹಂ ತಸ್ಸ ಪಕುಪ್ಪೇಯ್ಯಂ, ಖಣೇನ ಛಾರಿಕಂ ಕರೇ.

೨೪. ‘‘ಯದಿ ಚಿತ್ತವಸೀ ಹೇಸ್ಸಂ, ಪರಿಹಾಯಿಸ್ಸಾಮಿ ಸೀಲತೋ;

ಸೀಲೇನ ಪರಿಹೀನಸ್ಸ, ಉತ್ತಮತ್ಥೋ ನ ಸಿಜ್ಝತಿ.

೨೫. ‘‘ಕಾಮಂ ಭಿಜ್ಜತುಯಂ ಕಾಯೋ, ಇಧೇವ ವಿಕಿರೀಯತು;

ನೇವ ಸೀಲಂ ಪಭಿನ್ದೇಯ್ಯಂ, ವಿಕಿರನ್ತೇ ಭುಸಂ ವಿಯಾ’’ತಿ.

ಚಮ್ಪೇಯ್ಯನಾಗಚರಿಯಂ ತತಿಯಂ.