೪. ಚೂಳಬೋಧಿಚರಿಯಾ

೨೬. ‘‘ಪುನಾಪರಂ ಯದಾ ಹೋಮಿ, ಚೂಳಬೋಧಿ ಸುಸೀಲವಾ;

ಭವಂ ದಿಸ್ವಾನ ಭಯತೋ, ನೇಕ್ಖಮ್ಮಂ ಅಭಿನಿಕ್ಖಮಿಂ.

೨೭. ‘‘ಯಾ ಮೇ ದುತಿಯಿಕಾ ಆಸಿ, ಬ್ರಾಹ್ಮಣೀ ಕನಕಸನ್ನಿಭಾ;

ಸಾಪಿ ವಟ್ಟೇ ಅನಪೇಕ್ಖಾ, ನೇಕ್ಖಮ್ಮಂ ಅಭಿನಿಕ್ಖಮಿ.

೨೮. ‘‘ನಿರಾಲಯಾ ಛಿನ್ನಬನ್ಧೂ, ಅನಪೇಕ್ಖಾ ಕುಲೇ ಗಣೇ;

ಚರನ್ತಾ ಗಾಮನಿಗಮಂ, ಬಾರಾಣಸಿಮುಪಾಗಮುಂ.

೨೯. ‘‘ತತ್ಥ ವಸಾಮ ನಿಪಕಾ, ಅಸಂಸಟ್ಠಾ ಕುಲೇ ಗಣೇ;

ನಿರಾಕುಲೇ ಅಪ್ಪಸದ್ದೇ, ರಾಜುಯ್ಯಾನೇ ವಸಾಮುಭೋ.

೩೦. ‘‘ಉಯ್ಯಾನದಸ್ಸನಂ ಗನ್ತ್ವಾ, ರಾಜಾ ಅದ್ದಸ ಬ್ರಾಹ್ಮಣಿಂ;

ಉಪಗಮ್ಮ ಮಮಂ ಪುಚ್ಛಿ, ‘ತುಯ್ಹೇಸಾ ಕಾ ಕಸ್ಸ ಭರಿಯಾ’.

೩೧. ‘‘ಏವಂ ವುತ್ತೇ ಅಹಂ ತಸ್ಸ, ಇದಂ ವಚನಮಬ್ರವಿಂ;

‘ನ ಮಯ್ಹಂ ಭರಿಯಾ ಏಸಾ, ಸಹಧಮ್ಮಾ ಏಕಸಾಸನೀ’.

೩೨. ‘‘ತಿಸ್ಸಾ [ತಸ್ಸಾ (ಸೀ.)] ಸಾರತ್ತಗಧಿತೋ, ಗಾಹಾಪೇತ್ವಾನ ಚೇಟಕೇ;

ನಿಪ್ಪೀಳಯನ್ತೋ ಬಲಸಾ, ಅನ್ತೇಪುರಂ ಪವೇಸಯಿ.

೩೩. ‘‘ಓದಪತ್ತಕಿಯಾ ಮಯ್ಹಂ, ಸಹಜಾ ಏಕಸಾಸನೀ;

ಆಕಡ್ಢಿತ್ವಾ ನಯನ್ತಿಯಾ, ಕೋಪೋ ಮೇ ಉಪಪಜ್ಜಥ.

೩೪. ‘‘ಸಹ ಕೋಪೇ ಸಮುಪ್ಪನ್ನೇ, ಸೀಲಬ್ಬತಮನುಸ್ಸರಿಂ;

ತತ್ಥೇವ ಕೋಪಂ ನಿಗ್ಗಣ್ಹಿಂ, ನಾದಾಸಿಂ ವಡ್ಢಿತೂಪರಿ.

೩೫. ‘‘ಯದಿ ನಂ ಬ್ರಾಹ್ಮಣಿಂ ಕೋಚಿ, ಕೋಟ್ಟೇಯ್ಯ ತಿಣ್ಹಸತ್ತಿಯಾ;

ನೇವ ಸೀಲಂ ಪಭಿನ್ದೇಯ್ಯಂ, ಬೋಧಿಯಾಯೇವ ಕಾರಣಾ.

೩೬. ‘‘ನ ಮೇಸಾ ಬ್ರಾಹ್ಮಣೀ ದೇಸ್ಸಾ, ನಪಿ ಮೇ ಬಲಂ ನ ವಿಜ್ಜತಿ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ಸೀಲಾನುರಕ್ಖಿಸ’’ನ್ತಿ.

ಚೂಳಬೋಧಿಚರಿಯಂ ಚತುತ್ಥಂ.