೨. ಭೂರಿದತ್ತಚರಿಯಾ

೧೧. ‘‘ಪುನಾಪರಂ ಯದಾ ಹೋಮಿ, ಭೂರಿದತ್ತೋ ಮಹಿದ್ಧಿಕೋ;

ವಿರೂಪಕ್ಖೇನ ಮಹಾರಞ್ಞಾ, ದೇವಲೋಕಮಗಞ್ಛಹಂ.

೧೨. ‘‘ತತ್ಥ ಪಸ್ಸಿತ್ವಾಹಂ ದೇವೇ, ಏಕನ್ತಂ ಸುಖಸಮಪ್ಪಿತೇ;

ತಂ ಸಗ್ಗಗಮನತ್ಥಾಯ, ಸೀಲಬ್ಬತಂ ಸಮಾದಿಯಿಂ.

೧೩. ‘‘ಸರೀರಕಿಚ್ಚಂ ಕತ್ವಾನ, ಭುತ್ವಾ ಯಾಪನಮತ್ತಕಂ;

ಚತುರೋ ಅಙ್ಗೇ ಅಧಿಟ್ಠಾಯ, ಸೇಮಿ ವಮ್ಮಿಕಮುದ್ಧನಿ.

೧೪. ‘‘ಛವಿಯಾ ಚಮ್ಮೇನ ಮಂಸೇನ, ನಹಾರುಅಟ್ಠಿಕೇಹಿ ವಾ;

ಯಸ್ಸ ಏತೇನ ಕರಣೀಯಂ, ದಿನ್ನಂಯೇವ ಹರಾತು ಸೋ.

೧೫. ‘‘ಸಂಸಿತೋ ಅಕತಞ್ಞುನಾ, ಆಲಮ್ಪಾಯನೋ [ಆಲಮ್ಬಣೋ (ಸೀ.)] ಮಮಗ್ಗಹಿ;

ಪೇಳಾಯ ಪಕ್ಖಿಪಿತ್ವಾನ, ಕೀಳೇತಿ ಮಂ ತಹಿಂ ತಹಿಂ.

೧೬. ‘‘ಪೇಳಾಯ ಪಕ್ಖಿಪನ್ತೇಪಿ, ಸಮ್ಮದ್ದನ್ತೇಪಿ ಪಾಣಿನಾ;

ಆಲಮ್ಪಾಯನೇ [ಆಲಮ್ಬಣೇ (ಸೀ.)] ನ ಕುಪ್ಪಾಮಿ, ಸೀಲಖಣ್ಡಭಯಾ ಮಮ.

೧೭. ‘‘ಸಕಜೀವಿತಪರಿಚ್ಚಾಗೋ, ತಿಣತೋ ಲಹುಕೋ ಮಮ;

ಸೀಲವೀತಿಕ್ಕಮೋ ಮಯ್ಹಂ, ಪಥವೀಉಪ್ಪತನಂ ವಿಯ.

೧೮. ‘‘ನಿರನ್ತರಂ ಜಾತಿಸತಂ, ಚಜೇಯ್ಯಂ ಮಮ ಜೀವಿತಂ;

ನೇವ ಸೀಲಂ ಪಭಿನ್ದೇಯ್ಯಂ, ಚತುದ್ದೀಪಾನ ಹೇತುಪಿ.

೧೯. ‘‘ಅಪಿ ಚಾಹಂ ಸೀಲರಕ್ಖಾಯ, ಸೀಲಪಾರಮಿಪೂರಿಯಾ;

ನ ಕರೋಮಿ ಚಿತ್ತೇ ಅಞ್ಞಥತ್ತಂ, ಪಕ್ಖಿಪನ್ತಮ್ಪಿ ಪೇಳಕೇ’’ತಿ.

ಭೂರಿದತ್ತಚರಿಯಂ ದುತಿಯಂ.