೬. ನಿಮಿರಾಜಚರಿಯಾ

೪೦. ‘‘ಪುನಾಪರಂ ಯದಾ ಹೋಮಿ, ಮಿಥಿಲಾಯಂ ಪುರುತ್ತಮೇ;

ನಿಮಿ ನಾಮ ಮಹಾರಾಜಾ, ಪಣ್ಡಿತೋ ಕುಸಲತ್ಥಿಕೋ.

೪೧. ‘‘ತದಾಹಂ ಮಾಪಯಿತ್ವಾನ, ಚತುಸ್ಸಾಲಂ ಚತುಮ್ಮುಖಂ;

ತತ್ಥ ದಾನಂ ಪವತ್ತೇಸಿಂ, ಮಿಗಪಕ್ಖಿನರಾದಿನಂ.

೪೨. ‘‘ಅಚ್ಛಾದನಞ್ಚ ಸಯನಂ, ಅನ್ನಂ ಪಾನಞ್ಚ ಭೋಜನಂ;

ಅಬ್ಬೋಚ್ಛಿನ್ನಂ ಕರಿತ್ವಾನ, ಮಹಾದಾನಂ ಪವತ್ತಯಿಂ.

೪೩. ‘‘ಯಥಾಪಿ ಸೇವಕೋ ಸಾಮಿಂ, ಧನಹೇತುಮುಪಾಗತೋ;

ಕಾಯೇನ ವಾಚಾ ಮನಸಾ, ಆರಾಧನೀಯಮೇಸತಿ.

೪೪. ‘‘ತಥೇವಾಹಂ ಸಬ್ಬಭವೇ, ಪರಿಯೇಸಿಸ್ಸಾಮಿ ಬೋಧಿಜಂ;

ದಾನೇನ ಸತ್ತೇ ತಪ್ಪೇತ್ವಾ, ಇಚ್ಛಾಮಿ ಬೋಧಿಮುತ್ತಮ’’ನ್ತಿ.

ನಿಮಿರಾಜಚರಿಯಂ ಛಟ್ಠಂ.