೭. ರೇವತಬುದ್ಧವಂಸೋ

೧. ಸುಮನಸ್ಸ ಅಪರೇನ, ರೇವತೋ ನಾಮ ನಾಯಕೋ;

ಅನೂಪಮೋ ಅಸದಿಸೋ, ಅತುಲೋ ಉತ್ತಮೋ ಜಿನೋ.

೨. ಸೋಪಿ ಧಮ್ಮಂ ಪಕಾಸೇಸಿ, ಬ್ರಹ್ಮುನಾ ಅಭಿಯಾಚಿತೋ;

ಖನ್ಧಧಾತುವವತ್ಥಾನಂ, ಅಪ್ಪವತ್ತಂ ಭವಾಭವೇ.

೩. ತಸ್ಸಾಭಿಸಮಯಾ ತೀಣಿ, ಅಹೇಸುಂ ಧಮ್ಮದೇಸನೇ;

ಗಣನಾಯ ನ ವತ್ತಬ್ಬೋ, ಪಠಮಾಭಿಸಮಯೋ ಅಹು.

೪. ಯದಾ ಅರಿನ್ದಮಂ ರಾಜಂ [ರಾಜಾನಂ (ಕ.)], ವಿನೇಸಿ ರೇವತೋ ಮುನಿ;

ತದಾ ಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೫. ಸತ್ತಾಹಂ ಪಟಿಸಲ್ಲಾನಾ, ವುಟ್ಠಹಿತ್ವಾ ನರಾಸಭೋ;

ಕೋಟಿಸತಂ ನರಮರೂನಂ, ವಿನೇಸಿ ಉತ್ತಮೇ ಫಲೇ.

೬. ಸನ್ನಿಪಾತಾ ತಯೋ ಆಸುಂ, ರೇವತಸ್ಸ ಮಹೇಸಿನೋ;

ಖೀಣಾಸವಾನಂ ವಿಮಲಾನಂ, ಸುವಿಮುತ್ತಾನ ತಾದಿನಂ.

೭. ಅತಿಕ್ಕನ್ತಾ ಗಣನಪಥಂ, ಪಠಮಂ ಯೇ ಸಮಾಗತಾ;

ಕೋಟಿಸತಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ.

೮. ಯೋಪಿ [ಯೋ ಸೋ (ಸ್ಯಾ. ಕಂ. ಕ.)] ಪಞ್ಞಾಯ ಅಸಮೋ, ತಸ್ಸ ಚಕ್ಕಾನುವತ್ತಕೋ;

ಸೋ ತದಾ ಬ್ಯಾಧಿತೋ ಆಸಿ, ಪತ್ತೋ ಜೀವಿತಸಂಸಯಂ.

೯. ತಸ್ಸ ಗಿಲಾನಪುಚ್ಛಾಯ, ಯೇ ತದಾ ಉಪಗತಾ ಮುನೀ;

ಕೋಟಿಸಹಸ್ಸಾ ಅರಹನ್ತೋ, ತತಿಯೋ ಆಸಿ ಸಮಾಗಮೋ.

೧೦. ಅಹಂ ತೇನ ಸಮಯೇನ, ಅತಿದೇವೋ ನಾಮ ಬ್ರಾಹ್ಮಣೋ;

ಉಪಗನ್ತ್ವಾ ರೇವತಂ ಬುದ್ಧಂ, ಸರಣಂ ತಸ್ಸ ಗಞ್ಛಹಂ.

೧೧. ತಸ್ಸ ಸೀಲಂ ಸಮಾಧಿಞ್ಚ, ಪಞ್ಞಾಗುಣಮನುತ್ತಮಂ;

ಥೋಮಯಿತ್ವಾ ಯಥಾಥಾಮಂ, ಉತ್ತರೀಯಮದಾಸಹಂ.

೧೨. ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ರೇವತೋ ಲೋಕನಾಯಕೋ;

‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೩. ‘‘ಪಧಾನಂ ಪದಹಿತ್ವಾನ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೪. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೧೫. ತದಾಪಿ ತಂ ಬುದ್ಧಧಮ್ಮಂ, ಸರಿತ್ವಾ ಅನುಬ್ರೂಹಯಿಂ;

ಆಹರಿಸ್ಸಾಮಿ ತಂ ಧಮ್ಮಂ, ಯಂ ಮಯ್ಹಂ ಅಭಿಪತ್ಥಿತಂ.

೧೬. ನಗರಂ ಸುಧಞ್ಞವತೀ ನಾಮ [ಸುಧಮ್ಮಕಂ ನಾಮ (ಸೀ.), ಸುಧಞ್ಞಕಂ ನಾಮ (ಸ್ಯಾ.)], ವಿಪುಲೋ ನಾಮ ಖತ್ತಿಯೋ;

ವಿಪುಲಾ ನಾಮ ಜನಿಕಾ, ರೇವತಸ್ಸ ಮಹೇಸಿನೋ.

೧೭. ಛ ಚ ವಸ್ಸಸಹಸ್ಸಾನಿ [ಛಬ್ಬಸ್ಸಸಹಸ್ಸಾನಿ (ಸೀ. ಸ್ಯಾ.)], ಅಗಾರಂ ಅಜ್ಝ ಸೋ ವಸಿ;

ಸುದಸ್ಸನೋ ರತನಗ್ಘಿ, ಆವೇಳೋ ಚ ವಿಭೂಸಿತೋ;

ಪುಞ್ಞಕಮ್ಮಾಭಿನಿಬ್ಬತ್ತಾ, ತಯೋ ಪಾಸಾದಮುತ್ತಮಾ.

೧೮. ತೇತ್ತಿಂಸ ಚ ಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಸುದಸ್ಸನಾ ನಾಮ ನಾರೀ, ವರುಣೋ ನಾಮ ಅತ್ರಜೋ.

೧೯. ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ;

ಅನೂನಸತ್ತಮಾಸಾನಿ, ಪಧಾನಂ ಪದಹೀ ಜಿನೋ.

೨೦. ಬ್ರಹ್ಮುನಾ ಯಾಚಿತೋ ಸನ್ತೋ, ರೇವತೋ ಲೋಕನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ವರುಣಾರಾಮೇ ಸಿರೀಘರೇ.

೨೧. ವರುಣೋ ಬ್ರಹ್ಮದೇವೋ ಚ, ಅಹೇಸುಂ ಅಗ್ಗಸಾವಕಾ;

ಸಮ್ಭವೋ ನಾಮುಪಟ್ಠಾಕೋ, ರೇವತಸ್ಸ ಮಹೇಸಿನೋ.

೨೨. ಭದ್ದಾ ಚೇವ ಸುಭದ್ದಾ ಚ, ಅಹೇಸುಂ ಅಗ್ಗಸಾವಿಕಾ;

ಸೋಪಿ ಬುದ್ಧೋ ಅಸಮಸಮೋ, ನಾಗಮೂಲೇ ಅಬುಜ್ಝಥ.

೨೩. ಪದುಮೋ ಕುಞ್ಜರೋ ಚೇವ, ಅಹೇಸುಂ ಅಗ್ಗುಪಟ್ಠಿಕಾ;

ಸಿರೀಮಾ ಚೇವ ಯಸವತೀ, ಅಹೇಸುಂ ಅಗ್ಗುಪಟ್ಠಿಕಾ.

೨೪. ಉಚ್ಚತ್ತನೇನ ಸೋ ಬುದ್ಧೋ, ಅಸೀತಿಹತ್ಥಮುಗ್ಗತೋ;

ಓಭಾಸೇತಿ ದಿಸಾ ಸಬ್ಬಾ, ಇನ್ದಕೇತುವ ಉಗ್ಗತೋ.

೨೫. ತಸ್ಸ ಸರೀರೇ ನಿಬ್ಬತ್ತಾ, ಪಭಾಮಾಲಾ ಅನುತ್ತರಾ;

ದಿವಾ ವಾ ಯದಿ ವಾ ರತ್ತಿಂ, ಸಮನ್ತಾ ಫರತಿ ಯೋಜನಂ.

೨೬. ಸಟ್ಠಿವಸ್ಸಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೨೭. ದಸ್ಸಯಿತ್ವಾ ಬುದ್ಧಬಲಂ, ಅಮತಂ ಲೋಕೇ ಪಕಾಸಯಂ;

ನಿಬ್ಬಾಯಿ ಅನುಪಾದಾನೋ, ಯಥಗ್ಗುಪಾದಾನಸಙ್ಖಯಾ.

೨೮. ಸೋ ಚ ಕಾಯೋ ರತನನಿಭೋ, ಸೋ ಚ ಧಮ್ಮೋ ಅಸಾದಿಸೋ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೨೯. ರೇವತೋ ಯಸಧರೋ ಬುದ್ಧೋ, ನಿಬ್ಬುತೋ ಸೋ ಮಹಾಪುರೇ;

ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ.

ರೇವತಸ್ಸ ಭಗವತೋ ವಂಸೋ ಪಞ್ಚಮೋ.