೮. ಸೋಭಿತಬುದ್ಧವಂಸೋ

೧. ರೇವತಸ್ಸ ಅಪರೇನ, ಸೋಭಿತೋ ನಾಮ ನಾಯಕೋ;

ಸಮಾಹಿತೋ ಸನ್ತಚಿತ್ತೋ, ಅಸಮೋ ಅಪ್ಪಟಿಪುಗ್ಗಲೋ.

೨. ಸೋ ಜಿನೋ ಸಕಗೇಹಮ್ಹಿ, ಮಾನಸಂ ವಿನಿವತ್ತಯಿ;

ಪತ್ವಾನ ಕೇವಲಂ ಬೋಧಿಂ, ಧಮ್ಮಚಕ್ಕಂ ಪವತ್ತಯಿ.

೩. ಯಾವ ಹೇಟ್ಠಾ ಅವೀಚಿತೋ, ಭವಗ್ಗಾ ಚಾಪಿ ಉದ್ಧತೋ;

ಏತ್ಥನ್ತರೇ ಏಕಪರಿಸಾ, ಅಹೋಸಿ ಧಮ್ಮದೇಸನೇ.

೪. ತಾಯ ಪರಿಸಾಯ ಸಮ್ಬುದ್ಧೋ, ಧಮ್ಮಚಕ್ಕಂ ಪವತ್ತಯಿ;

ಗಣನಾಯ ನ ವತ್ತಬ್ಬೋ, ಪಠಮಾಭಿಸಮಯೋ ಅಹು.

೫. ತತೋ ಪರಮ್ಪಿ ದೇಸೇನ್ತೇ, ಮರೂನಞ್ಚ ಸಮಾಗಮೇ;

ನವುತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೬. ಪುನಾಪರಂ ರಾಜಪುತ್ತೋ, ಜಯಸೇನೋ ನಾಮ ಖತ್ತಿಯೋ;

ಆರಾಮಂ ರೋಪಯಿತ್ವಾನ, ಬುದ್ಧೇ ನಿಯ್ಯಾದಯೀ ತದಾ.

೭. ತಸ್ಸ ಯಾಗಂ ಪಕಿತ್ತೇನ್ತೋ, ಧಮ್ಮಂ ದೇಸೇಸಿ ಚಕ್ಖುಮಾ;

ತದಾ ಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು.

೮. ಸನ್ನಿಪಾತಾ ತಯೋ ಆಸುಂ, ಸೋಭಿತಸ್ಸ ಮಹೇಸಿನೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೯. ಉಗ್ಗತೋ ನಾಮ ಸೋ ರಾಜಾ, ದಾನಂ ದೇತಿ ನರುತ್ತಮೇ;

ತಮ್ಹಿ ದಾನೇ ಸಮಾಗಞ್ಛುಂ, ಅರಹನ್ತಾ [ಅರಹತಂ (ಕ.)] ಸತಕೋಟಿಯೋ.

೧೦. ಪುನಾಪರಂ ಪುರಗಣೋ [ಪುಗಗಣೋ (ಕ.)], ದೇತಿ ದಾನಂ ನರುತ್ತಮೇ;

ತದಾ ನವುತಿಕೋಟೀನಂ, ದುತಿಯೋ ಆಸಿ ಸಮಾಗಮೋ.

೧೧. ದೇವಲೋಕೇ ವಸಿತ್ವಾನ, ಯದಾ ಓರೋಹತೀ ಜಿನೋ;

ತದಾ ಅಸೀತಿಕೋಟೀನಂ, ತತಿಯೋ ಆಸಿ ಸಮಾಗಮೋ.

೧೨. ಅಹಂ ತೇನ ಸಮಯೇನ, ಸುಜಾತೋ ನಾಮ ಬ್ರಾಹ್ಮಣೋ;

ತದಾ ಸಸಾವಕಂ ಬುದ್ಧಂ, ಅನ್ನಪಾನೇನ ತಪ್ಪಯಿಂ.

೧೩. ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸೋಭಿತೋ ಲೋಕನಾಯಕೋ;

‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೪. ‘‘ಪಧಾನಂ ಪದಹಿತ್ವಾನ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೫. ತಸ್ಸಾಪಿ ವಚನಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ;

ತಮೇವತ್ಥಮನುಪ್ಪತ್ತಿಯಾ, ಉಗ್ಗಂ ಧಿತಿಮಕಾಸಹಂ.

೧೬. ಸುಧಮ್ಮಂ ನಾಮ ನಗರಂ, ಸುಧಮ್ಮೋ ನಾಮ ಖತ್ತಿಯೋ;

ಸುಧಮ್ಮಾ ನಾಮ ಜನಿಕಾ, ಸೋಭಿತಸ್ಸ ಮಹೇಸಿನೋ.

೧೭. ನವವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ಕುಮುದೋ ನಾಳಿನೋ ಪದುಮೋ, ತಯೋ ಪಾಸಾದಮುತ್ತಮಾ.

೧೮. ಸತ್ತತಿಂಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಮಣಿಲಾ [ಮಖಿಲಾ (ಅಟ್ಠ.), ಸಮಙ್ಗೀ (ಸೀ.), ಮಕಿಲಾ (ಸ್ಯಾ. ಕಂ.)] ನಾಮ ಸಾ ನಾರೀ, ಸೀಹೋ ನಾಮಾಸಿ ಅತ್ರಜೋ.

೧೯. ನಿಮಿತ್ತೇ ಚತುರೋ ದಿಸ್ವಾ, ಪಾಸಾದೇನಾಭಿನಿಕ್ಖಮಿ;

ಸತ್ತಾಹಂ ಪಧಾನಚಾರಂ, ಚರಿತ್ವಾ ಪುರಿಸುತ್ತಮೋ.

೨೦. ಬ್ರಹ್ಮುನಾ ಯಾಚಿತೋ ಸನ್ತೋ, ಸೋಭಿತೋ ಲೋಕನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಸುಧಮ್ಮುಯ್ಯಾನಮುತ್ತಮೇ.

೨೧. ಅಸಮೋ ಚ ಸುನೇತ್ತೋ ಚ, ಅಹೇಸುಂ ಅಗ್ಗಸಾವಕಾ;

ಅನೋಮೋ ನಾಮುಪಟ್ಠಾಕೋ, ಸೋಭಿತಸ್ಸ ಮಹೇಸಿನೋ.

೨೨. ನಕುಲಾ ಚ ಸುಜಾತಾ ಚ, ಅಹೇಸುಂ ಅಗ್ಗಸಾವಿಕಾ;

ಬುಜ್ಝಮಾನೋ ಚ ಸೋ ಬುದ್ಧೋ, ನಾಗಮೂಲೇ ಅಬುಜ್ಝಥ.

೨೩. ರಮ್ಮೋ ಚೇವ ಸುದತ್ತೋ ಚ, ಅಹೇಸುಂ ಅಗ್ಗುಪಟ್ಠಕಾ;

ನಕುಲಾ ಚೇವ ಚಿತ್ತಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೨೪. ಅಟ್ಠಪಣ್ಣಾಸರತನಂ, ಅಚ್ಚುಗ್ಗತೋ ಮಹಾಮುನಿ;

ಓಭಾಸೇತಿ ದಿಸಾ ಸಬ್ಬಾ, ಸತರಂಸೀವ ಉಗ್ಗತೋ.

೨೫. ಯಥಾ ಸುಫುಲ್ಲಂ ಪವನಂ, ನಾನಾಗನ್ಧೇಹಿ ಧೂಪಿತಂ;

ತಥೇವ ತಸ್ಸ ಪಾವಚನಂ, ಸೀಲಗನ್ಧೇಹಿ ಧೂಪಿತಂ.

೨೬. ಯಥಾಪಿ ಸಾಗರೋ ನಾಮ, ದಸ್ಸನೇನ ಅತಪ್ಪಿಯೋ;

ತಥೇವ ತಸ್ಸ ಪಾವಚನಂ, ಸವಣೇನ ಅತಪ್ಪಿಯಂ.

೨೭. ನವುತಿವಸ್ಸಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೨೮. ಓವಾದಂ ಅನುಸಿಟ್ಠಿಞ್ಚ, ದತ್ವಾನ ಸೇಸಕೇ ಜನೇ;

ಹುತಾಸನೋವ ತಾಪೇತ್ವಾ, ನಿಬ್ಬುತೋ ಸೋ ಸಸಾವಕೋ.

೨೯. ಸೋ ಚ ಬುದ್ಧೋ ಅಸಮಸಮೋ, ತೇಪಿ ಸಾವಕಾ ಬಲಪ್ಪತ್ತಾ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೩೦. ಸೋಭಿತೋ ವರಸಮ್ಬುದ್ಧೋ, ಸೀಹಾರಾಮಮ್ಹಿ ನಿಬ್ಬುತೋ;

ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ.

ಸೋಭಿತಸ್ಸ ಭಗವತೋ ವಂಸೋ ಛಟ್ಠೋ.