೨೬. ಕಸ್ಸಪಬುದ್ಧವಂಸೋ

೧. ಕೋಣಾಗಮನಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ;

ಕಸ್ಸಪೋ ನಾಮ ಗೋತ್ತೇನ, ಧಮ್ಮರಾಜಾ ಪಭಙ್ಕರೋ.

೨. ಸಞ್ಛಡ್ಡಿತಂ ಕುಲಮೂಲಂ, ಬಹ್ವನ್ನಪಾನಭೋಜನಂ;

ದತ್ವಾನ ಯಾಚಕೇ ದಾನಂ, ಪೂರಯಿತ್ವಾನ ಮಾನಸಂ;

ಉಸಭೋವ ಆಳಕಂ ಭೇತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

೩. ಧಮ್ಮಚಕ್ಕಂ ಪವತ್ತೇನ್ತೇ, ಕಸ್ಸಪೇ ಲೋಕನಾಯಕೇ;

ವೀಸಕೋಟಿಸಹಸ್ಸಾನಂ, ಪಠಮಾಭಿಸಮಯೋ ಅಹು.

೪. ಚತುಮಾಸಂ ಯದಾ ಬುದ್ಧೋ, ಲೋಕೇ ಚರತಿ ಚಾರಿಕಂ;

ದಸಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೫. ಯಮಕಂ ವಿಕುಬ್ಬನಂ ಕತ್ವಾ, ಞಾಣಧಾತುಂ ಪಕಿತ್ತಯಿ;

ಪಞ್ಚಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು.

೬. ಸುಧಮ್ಮಾ ದೇವಪುರೇ ರಮ್ಮೇ, ತತ್ಥ ಧಮ್ಮಂ ಪಕಿತ್ತಯಿ;

ತೀಣಿಕೋಟಿಸಹಸ್ಸಾನಂ, ದೇವಾನಂ ಬೋಧಯೀ ಜಿನೋ.

೭. ನರದೇವಸ್ಸ ಯಕ್ಖಸ್ಸ, ಅಪರೇ ಧಮ್ಮದೇಸನೇ;

ಏತೇಸಾನಂ ಅಭಿಸಮಯಾ, ಗಣನಾತೋ ಅಸಙ್ಖಿಯಾ.

೮. ತಸ್ಸಾಪಿ ದೇವದೇವಸ್ಸ, ಏಕೋ ಆಸಿ ಸಮಾಗಮೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೯. ವೀಸಭಿಕ್ಖುಸಹಸ್ಸಾನಂ, ತದಾ ಆಸಿ ಸಮಾಗಮೋ;

ಅತಿಕ್ಕನ್ತಭವನ್ತಾನಂ, ಹಿರಿಸೀಲೇನ ತಾದಿನಂ.

೧೦. ಅಹಂ ತದಾ ಮಾಣವಕೋ, ಜೋತಿಪಾಲೋತಿ ವಿಸ್ಸುತೋ;

ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ.

೧೧. ಲಕ್ಖಣೇ ಇತಿಹಾಸೇ ಚ, ಸಧಮ್ಮೇ ಪಾರಮಿಂ ಗತೋ;

ಭೂಮನ್ತಲಿಕ್ಖಕುಸಲೋ, ಕತವಿಜ್ಜೋ ಅನಾವಯೋ.

೧೨. ಕಸ್ಸಪಸ್ಸ ಭಗವತೋ, ಘಟಿಕಾರೋ ನಾಮುಪಟ್ಠಾಕೋ;

ಸಗಾರವೋ ಸಪ್ಪತಿಸ್ಸೋ, ನಿಬ್ಬುತೋ ತತಿಯೇ ಫಲೇ.

೧೩. ಆದಾಯ ಮಂ ಘಟೀಕಾರೋ, ಉಪಗಞ್ಛಿ ಕಸ್ಸಪಂ ಜಿನಂ;

ತಸ್ಸ ಧಮ್ಮಂ ಸುಣಿತ್ವಾನ, ಪಬ್ಬಜಿಂ ತಸ್ಸ ಸನ್ತಿಕೇ.

೧೪. ಆರದ್ಧವೀರಿಯೋ ಹುತ್ವಾ, ವತ್ತಾವತ್ತೇಸು ಕೋವಿದೋ;

ನ ಕ್ವಚಿ ಪರಿಹಾಯಾಮಿ, ಪೂರೇಸಿಂ ಜಿನಸಾಸನಂ.

೧೫. ಯಾವತಾ ಬುದ್ಧಭಣಿತಂ, ನವಙ್ಗಂ ಜಿನಸಾಸನಂ;

ಸಬ್ಬಂ ಪರಿಯಾಪುಣಿತ್ವಾನ, ಸೋಭಯಿಂ ಜಿನಸಾಸನಂ.

೧೬. ಮಮ ಅಚ್ಛರಿಯಂ ದಿಸ್ವಾ, ಸೋಪಿ ಬುದ್ಧೋ ವಿಯಾಕರಿ;

‘‘ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೭. ‘‘ಅಹು ಕಪಿಲವ್ಹಯಾ ರಮ್ಮಾ, ನಿಕ್ಖಮಿತ್ವಾ ತಥಾಗತೋ;

ಪಧಾನಂ ಪದಹಿತ್ವಾನ, ಕತ್ವಾ ದುಕ್ಕರಕಾರಿಕಂ.

೧೮. ‘‘ಅಜಪಾಲರುಕ್ಖಮೂಲೇ, ನಿಸೀದಿತ್ವಾ ತಥಾಗತೋ;

ತತ್ಥ ಪಾಯಾಸಂ ಪಗ್ಗಯ್ಹ, ನೇರಞ್ಜರಮುಪೇಹಿತಿ.

೧೯. ‘‘ನೇರಞ್ಜರಾಯ ತೀರಮ್ಹಿ, ಪಾಯಾಸಂ ಪರಿಭುಞ್ಜಿಯ;

ಪಟಿಯತ್ತವರಮಗ್ಗೇನ, ಬೋಧಿಮೂಲಮುಪೇಹಿತಿ.

೨೦. ‘‘ತತೋ ಪದಕ್ಖಿಣಂ ಕತ್ವಾ, ಬೋಧಿಮಣ್ಡಂ ಅನುತ್ತರೋ;

ಅಪರಾಜಿತಟ್ಠಾನಮ್ಹಿ [ಅಪರಾಜಿತನಿಸಭಟ್ಠಾನೇ (ಕ.)], ಬೋಧಿಪಲ್ಲಙ್ಕಮುತ್ತಮೇ;

ಪಲ್ಲಙ್ಕೇನ ನಿಸೀದಿತ್ವಾ, ಬುಜ್ಝಿಸ್ಸತಿ ಮಹಾಯಸೋ.

೨೧. ‘‘ಇಮಸ್ಸ ಜನಿಕಾ ಮಾತಾ, ಮಾಯಾ ನಾಮ ಭವಿಸ್ಸತಿ;

ಪಿತಾ ಸುದ್ಧೋದನೋ ನಾಮ, ಅಯಂ ಹೇಸ್ಸತಿ ಗೋತಮೋ.

೨೨. ‘‘ಅನಾಸವಾ ವೀತರಾಗಾ, ಸನ್ತಚಿತ್ತಾ ಸಮಾಹಿತಾ;

ಕೋಲಿತೋ ಉಪತಿಸ್ಸೋ ಚ, ಅಗ್ಗಾ ಹೇಸ್ಸನ್ತಿ ಸಾವಕಾ;

ಆನನ್ದೋ ನಾಮುಪಟ್ಠಾಕೋ, ಉಪಟ್ಠಿಸ್ಸತಿಮಂ ಜಿನಂ.

೨೩. ‘‘ಖೇಮಾ ಉಪ್ಪಲವಣ್ಣಾ ಚ, ಅಗ್ಗಾ ಹೇಸ್ಸನ್ತಿ ಸಾವಿಕಾ;

ಅನಾಸವಾ ಸನ್ತಚಿತ್ತಾ, ವೀತರಾಗಾ ಸಮಾಹಿತಾ;

ಬೋಧಿ ತಸ್ಸ ಭಗವತೋ, ಅಸ್ಸತ್ಥೋತಿ ಪವುಚ್ಚತಿ.

೨೪. ‘‘ಚಿತ್ತೋ ಹತ್ಥಾಳವಕೋ ಚ, ಅಗ್ಗಾ ಹೇಸ್ಸನ್ತುಪಟ್ಠಕಾ;

ನನ್ದಮಾತಾ ಚ ಉತ್ತರಾ, ಅಗ್ಗಾ ಹೇಸ್ಸನ್ತುಪಟ್ಠಿಕಾ’’.

೨೫. ಇದಂ ಸುತ್ವಾನ ವಚನಂ, ಅಸ್ಸಮಸ್ಸ ಮಹೇಸಿನೋ;

ಆಮೋದಿತಾ ನರಮರೂ, ಬುದ್ಧಬೀಜಂ ಕಿರ ಅಯಂ.

೨೬. ಉಕ್ಕುಟ್ಠಿಸದ್ದಾ ಪವತ್ತನ್ತಿ, ಅಪ್ಫೋಟೇನ್ತಿ ಹಸನ್ತಿ ಚ;

ಕತಞ್ಜಲೀ ನಮಸ್ಸನ್ತಿ, ದಸಸಹಸ್ಸೀ ಸದೇವಕಾ.

೨೭. ‘‘ಯದಿಮಸ್ಸ ಲೋಕನಾಥಸ್ಸ, ವಿರಜ್ಝಿಸ್ಸಾಮ ಸಾಸನಂ;

ಅನಾಗತಮ್ಹಿ ಅದ್ಧಾನೇ, ಹೇಸ್ಸಾಮ ಸಮ್ಮುಖಾ ಇಮಂ.

೨೮. ‘‘ಯಥಾ ಮನುಸ್ಸಾ ನದಿಂ ತರನ್ತಾ, ಪಟಿತಿತ್ಥಂ ವಿರಜ್ಝಿಯ;

ಹೇಟ್ಠಾ ತಿತ್ಥೇ ಗಹೇತ್ವಾನ, ಉತ್ತರನ್ತಿ ಮಹಾನದಿಂ.

೨೯. ‘‘ಏವಮೇವ ಮಯಂ ಸಬ್ಬೇ, ಯದಿ ಮುಞ್ಚಾಮಿಮಂ ಜಿನಂ;

ಅನಾಗತಮ್ಹಿ ಅದ್ಧಾನೇ, ಹೇಸ್ಸಾಮ ಸಮ್ಮುಖಾ ಇಮಂ’’.

೩೦. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೩೧. ಏವಮಹಂ ಸಂಸರಿತ್ವಾ, ಪರಿವಜ್ಜೇನ್ತೋ ಅನಾಚರಂ;

ದುಕ್ಕರಞ್ಚ ಕತಂ ಮಯ್ಹಂ, ಬೋಧಿಯಾಯೇವ ಕಾರಣಾ.

೩೨. ನಗರಂ ಬಾರಾಣಸೀ ನಾಮ, ಕಿಕೀ ನಾಮಾಸಿ ಖತ್ತಿಯೋ;

ವಸತೇ ತತ್ಥ ನಗರೇ, ಸಮ್ಬುದ್ಧಸ್ಸ ಮಹಾಕುಲಂ.

೩೩. ಬ್ರಾಹ್ಮಣೋ ಬ್ರಹ್ಮದತ್ತೋವ, ಆಸಿ ಬುದ್ಧಸ್ಸ ಸೋ ಪಿತಾ;

ಧನವತೀ ನಾಮ ಜನಿಕಾ, ಕಸ್ಸಪಸ್ಸ ಮಹೇಸಿನೋ.

೩೪. ದುವೇ ವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ಹಂಸೋ ಯಸೋ ಸಿರಿನನ್ದೋ, ತಯೋ ಪಾಸಾದಮುತ್ತಮಾ.

೩೫. ತಿಸೋಳಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಸುನನ್ದಾ ನಾಮ ಸಾ ನಾರೀ, ವಿಜಿತಸೇನೋ ನಾಮ ಅತ್ರಜೋ.

೩೬. ನಿಮಿತ್ತೇ ಚತುರೋ ದಿಸ್ವಾ, ಪಾಸಾದೇನಾಭಿನಿಕ್ಖಮಿ;

ಸತ್ತಾಹಂ ಪಧಾನಚಾರಂ, ಅಚರೀ ಪುರಿಸುತ್ತಮೋ.

೩೭. ಬ್ರಹ್ಮುನಾ ಯಾಚಿತೋ ಸನ್ತೋ, ಕಸ್ಸಪೋ ಲೋಕನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ.

೩೮. ತಿಸ್ಸೋ ಚ ಭಾರದ್ವಾಜೋ ಚ, ಅಹೇಸುಂ ಅಗ್ಗಸಾವಕಾ;

ಸಬ್ಬಮಿತ್ತೋ ನಾಮುಪಟ್ಠಾಕೋ, ಕಸ್ಸಪಸ್ಸ ಮಹೇಸಿನೋ.

೩೯. ಅನುಳಾ ಉರುವೇಳಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ನಿಗ್ರೋಧೋತಿ ಪವುಚ್ಚತಿ.

೪೦. ಸುಮಙ್ಗಲೋ ಘಟಿಕಾರೋ ಚ, ಅಹೇಸುಂ ಅಗ್ಗುಪಟ್ಠಕಾ;

ವಿಚಿತಸೇನಾ ಭದ್ದಾ [ಭದ್ರಾ (ಕ.)] ಚ, ಅಹೇಸುಂ ಅಗ್ಗುಪಟ್ಠಿಕಾ.

೪೧. ಉಚ್ಚತ್ತನೇನ ಸೋ ಬುದ್ಧೋ, ವೀಸತಿರತನುಗ್ಗತೋ;

ವಿಜ್ಜುಲಟ್ಠೀವ ಆಕಾಸೇ, ಚನ್ದೋವ ಗಹಪೂರಿತೋ.

೪೨. ವೀಸತಿವಸ್ಸಸಹಸ್ಸಾನಿ, ಆಯು ತಸ್ಸ ಮಹೇಸಿನೋ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೪೩. ಧಮ್ಮತಳಾಕಂ ಮಾಪಯಿತ್ವಾ, ಸೀಲಂ ದತ್ವಾ ವಿಲೇಪನಂ;

ಧಮ್ಮದುಸ್ಸಂ ನಿವಾಸೇತ್ವಾ, ಧಮ್ಮಮಾಲಂ ವಿಭಜ್ಜಿಯ.

೪೪. ಧಮ್ಮವಿಮಲಮಾದಾಸಂ, ಠಪಯಿತ್ವಾ ಮಹಾಜನೇ;

ಕೇಚಿ ನಿಬ್ಬಾನಂ ಪತ್ಥೇನ್ತಾ, ಪಸ್ಸನ್ತು ಮೇ ಅಲಙ್ಕರಂ.

೪೫. ಸೀಲಕಞ್ಚುಕಂ ದತ್ವಾನ, ಝಾನಕವಚವಮ್ಮಿತಂ;

ಧಮ್ಮಚಮ್ಮಂ ಪಾರುಪಿತ್ವಾ, ದತ್ವಾ ಸನ್ನಾಹಮುತ್ತಮಂ.

೪೬. ಸತಿಫಲಕಂ ದತ್ವಾನ, ತಿಖಿಣಞಾಣಕುನ್ತಿಮಂ;

ಧಮ್ಮಖಗ್ಗವರಂ ದತ್ವಾ, ಸೀಲಸಂಸಗ್ಗಮದ್ದನಂ.

೪೭. ತೇವಿಜ್ಜಾಭೂಸನಂ ದತ್ವಾನ, ಆವೇಳಂ ಚತುರೋ ಫಲೇ;

ಛಳಭಿಞ್ಞಾಭರಣಂ ದತ್ವಾ, ಧಮ್ಮಪುಪ್ಫಪಿಳನ್ಧನಂ.

೪೮. ಸದ್ಧಮ್ಮಪಣ್ಡರಚ್ಛತ್ತಂ, ದತ್ವಾ ಪಾಪನಿವಾರಣಂ;

ಮಾಪಯಿತ್ವಾಭಯಂ ಪುಪ್ಫಂ, ನಿಬ್ಬುತೋ ಸೋ ಸಸಾವಕೋ.

೪೯. ಏಸೋ ಹಿ ಸಮ್ಮಾಸಮ್ಬುದ್ಧೋ, ಅಪ್ಪಮೇಯ್ಯೋ ದುರಾಸದೋ;

ಏಸೋ ಹಿ ಧಮ್ಮರತನೋ, ಸ್ವಾಕ್ಖಾತೋ ಏಹಿಪಸ್ಸಿಕೋ.

೫೦. ಏಸೋ ಹಿ ಸಙ್ಘರತನೋ, ಸುಪ್ಪಟಿಪನ್ನೋ ಅನುತ್ತರೋ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೫೧. ಮಹಾಕಸ್ಸಪೋ ಜಿನೋ ಸತ್ಥಾ, ಸೇತಬ್ಯಾರಾಮಮ್ಹಿ ನಿಬ್ಬುತೋ;

ತತ್ಥೇವಸ್ಸ ಜಿನಥೂಪೋ, ಯೋಜನುಬ್ಬೇಧಮುಗ್ಗತೋತಿ.

ಕಸ್ಸಪಸ್ಸ ಭಗವತೋ ವಂಸೋ ಚತುವೀಸತಿಮೋ.