೨೭. ಗೋತಮಬುದ್ಧವಂಸೋ

೧. ಅಹಮೇತರಹಿ ಸಮ್ಬುದ್ಧೋ [ಬುದ್ಧೋ (ಸೀ.)], ಗೋತಮೋ ಸಕ್ಯವಡ್ಢನೋ;

ಪಧಾನಂ ಪದಹಿತ್ವಾನ, ಪತ್ತೋ ಸಮ್ಬೋಧಿಮುತ್ತಮಂ.

೨. ಬ್ರಹ್ಮುನಾ ಯಾಚಿತೋ ಸನ್ತೋ, ಧಮ್ಮಚಕ್ಕಂ ಪವತ್ತಯಿಂ;

ಅಟ್ಠಾರಸನ್ನಂ ಕೋಟೀನಂ, ಪಠಮಾಭಿಸಮಯೋ ಅಹು.

೩. ತತೋ ಪರಞ್ಚ ದೇಸೇನ್ತೇ, ನರದೇವಸಮಾಗಮೇ;

ಗಣನಾಯ ನ ವತ್ತಬ್ಬೋ, ದುತಿಯಾಭಿಸಮಯೋ ಅಹು.

೪. ಇಧೇವಾಹಂ ಏತರಹಿ, ಓವದಿಂ ಮಮ ಅತ್ರಜಂ;

ಗಣನಾಯ ನ ವತ್ತಬ್ಬೋ, ತತಿಯಾಭಿಸಮಯೋ ಅಹು.

೫. ಏಕೋಸಿ ಸನ್ನಿಪಾತೋ ಮೇ, ಸಾವಕಾನಂ ಮಹೇಸಿನಂ;

ಅಡ್ಢತೇಳಸಸತಾನಂ, ಭಿಕ್ಖೂನಾಸಿ ಸಮಾಗಮೋ.

೬. ವಿರೋಚಮಾನೋ ವಿಮಲೋ, ಭಿಕ್ಖುಸಙ್ಘಸ್ಸ ಮಜ್ಝಗೋ;

ದದಾಮಿ ಪತ್ಥಿತಂ ಸಬ್ಬಂ, ಮಣೀವ ಸಬ್ಬಕಾಮದೋ.

೭. ಫಲಮಾಕಙ್ಖಮಾನಾನಂ, ಭವಚ್ಛನ್ದಜಹೇಸಿನಂ;

ಚತುಸಚ್ಚಂ ಪಕಾಸೇಮಿ, ಅನುಕಮ್ಪಾಯ ಪಾಣಿನಂ.

೮. ದಸವೀಸಸಹಸ್ಸಾನಂ, ಧಮ್ಮಾಭಿಸಮಯೋ ಅಹು;

ಏಕದ್ವಿನ್ನಂ ಅಭಿಸಮಯೋ, ಗಣನಾತೋ ಅಸಙ್ಖಿಯೋ.

೯. ವಿತ್ಥಾರಿಕಂ ಬಾಹುಜಞ್ಞಂ, ಇದ್ಧಂ ಫೀತಂ ಸುಫುಲ್ಲಿತಂ;

ಇಧ ಮಯ್ಹಂ ಸಕ್ಯಮುನಿನೋ, ಸಾಸನಂ ಸುವಿಸೋಧಿತಂ.

೧೦. ಅನಾಸವಾ ವೀತರಾಗಾ, ಸನ್ತಚಿತ್ತಾ ಸಮಾಹಿತಾ;

ಭಿಕ್ಖೂನೇಕಸತಾ ಸಬ್ಬೇ, ಪರಿವಾರೇನ್ತಿ ಮಂ ಸದಾ.

೧೧. ಇದಾನಿ ಯೇ ಏತರಹಿ, ಜಹನ್ತಿ ಮಾನುಸಂ ಭವಂ;

ಅಪ್ಪತ್ತಮಾನಸಾ ಸೇಖಾ, ತೇ ಭಿಕ್ಖೂ ವಿಞ್ಞುಗರಹಿತಾ.

೧೨. ಅರಿಯಞ್ಚ ಸಂಥೋಮಯನ್ತಾ, ಸದಾ ಧಮ್ಮರತಾ ಜನಾ;

ಬುಜ್ಝಿಸ್ಸನ್ತಿ ಸತಿಮನ್ತೋ, ಸಂಸಾರಸರಿತಂ ಗತಾ.

೧೩. ನಗರಂ ಕಪಿಲವತ್ಥು ಮೇ, ರಾಜಾ ಸುದ್ಧೋದನೋ ಪಿತಾ;

ಮಯ್ಹಂ ಜನೇತ್ತಿಕಾ ಮಾತಾ, ಮಾಯಾದೇವೀತಿ ವುಚ್ಚತಿ.

೧೪. ಏಕೂನತಿಂಸವಸ್ಸಾನಿ, ಅಗಾರಂ ಅಜ್ಝಹಂ ವಸಿಂ;

ರಮ್ಮೋ ಸುರಮ್ಮೋ ಸುಭಕೋ, ತಯೋ ಪಾಸಾದಮುತ್ತಮಾ.

೧೫. ಚತ್ತಾರೀಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಭದ್ದಕಞ್ಚನಾ ನಾಮ ನಾರೀ, ರಾಹುಲೋ ನಾಮ ಅತ್ರಜೋ.

೧೬. ನಿಮಿತ್ತೇ ಚತುರೋ ದಿಸ್ವಾ, ಅಸ್ಸಯಾನೇನ ನಿಕ್ಖಮಿಂ;

ಛಬ್ಬಸ್ಸಂ ಪಧಾನಚಾರಂ, ಅಚರಿಂ ದುಕ್ಕರಂ ಅಹಂ.

೧೭. ಬಾರಾಣಸಿಯಂ ಇಸಿಪತನೇ, ಚಕ್ಕಂ ಪವತ್ತಿತಂ ಮಯಾ;

ಅಹಂ ಗೋತಮಸಮ್ಬುದ್ಧೋ, ಸರಣಂ ಸಬ್ಬಪಾಣಿನಂ.

೧೮. ಕೋಲಿತೋ ಉಪತಿಸ್ಸೋ ಚ, ದ್ವೇ ಭಿಕ್ಖೂ ಅಗ್ಗಸಾವಕಾ;

ಆನನ್ದೋ ನಾಮುಪಟ್ಠಾಕೋ, ಸನ್ತಿಕಾವಚರೋ ಮಮ;

ಖೇಮಾ ಉಪ್ಪಲವಣ್ಣಾ ಚ, ಭಿಕ್ಖುನೀ ಅಗ್ಗಸಾವಿಕಾ.

೧೯. ಚಿತ್ತೋ ಹತ್ಥಾಳವಕೋ ಚ, ಅಗ್ಗುಪಟ್ಠಾಕುಪಾಸಕಾ;

ನನ್ದಮಾತಾ ಚ ಉತ್ತರಾ, ಅಗ್ಗುಪಟ್ಠಿಕುಪಾಸಿಕಾ.

೨೦. ಅಹಂ ಅಸ್ಸತ್ಥಮೂಲಮ್ಹಿ, ಪತ್ತೋ ಸಮ್ಬೋಧಿಮುತ್ತಮಂ;

ಬ್ಯಾಮಪ್ಪಭಾ ಸದಾ ಮಯ್ಹಂ, ಸೋಳಸಹತ್ಥಮುಗ್ಗತಾ.

೨೧. ಅಪ್ಪಂ ವಸ್ಸಸತಂ ಆಯು, ಇದಾನೇತರಹಿ ವಿಜ್ಜತಿ;

ತಾವತಾ ತಿಟ್ಠಮಾನೋಹಂ, ತಾರೇಮಿ ಜನತಂ ಬಹುಂ.

೨೨. ಠಪಯಿತ್ವಾನ ಧಮ್ಮುಕ್ಕಂ, ಪಚ್ಛಿಮಂ ಜನಬೋಧನಂ;

ಅಹಮ್ಪಿ ನಚಿರಸ್ಸೇವ, ಸದ್ಧಿಂ ಸಾವಕಸಙ್ಘತೋ;

ಇಧೇವ ಪರಿನಿಬ್ಬಿಸ್ಸಂ, ಅಗ್ಗೀ ವಾಹಾರಸಙ್ಖಯಾ.

೨೩. ತಾನಿ ಚ ಅತುಲತೇಜಾನಿ, ಇಮಾನಿ ಚ ದಸಬಲಾನಿ [ಯಸಬಲಾನಿ (ಅಟ್ಠ.)];

ಅಯಞ್ಚ ಗುಣಧಾರಣೋ ದೇಹೋ, ದ್ವತ್ತಿಂಸವರಲಕ್ಖಣವಿಚಿತ್ತೋ.

೨೪. ದಸ ದಿಸಾ ಪಭಾಸೇತ್ವಾ, ಸತರಂಸೀವ ಛಪ್ಪಭಾ;

ಸಬ್ಬಂ ತಮನ್ತರಹಿಸ್ಸನ್ತಿ, ನನು ರಿತ್ತಾ ಸಬ್ಬಸಙ್ಖಾರಾತಿ.

ಗೋತಮಸ್ಸ ಭಗವತೋ ವಂಸೋ ಪಞ್ಚವೀಸತಿಮೋ.