೨೫. ಕೋಣಾಗಮನಬುದ್ಧವಂಸೋ

೧. ಕಕುಸನ್ಧಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ;

ಕೋಣಾಗಮನೋ ನಾಮ ಜಿನೋ, ಲೋಕಜೇಟ್ಠೋ ನರಾಸಭೋ.

೨. ದಸಧಮ್ಮೇ ಪೂರಯಿತ್ವಾನ, ಕನ್ತಾರಂ ಸಮತಿಕ್ಕಮಿ;

ಪವಾಹಿಯ ಮಲಂ ಸಬ್ಬಂ, ಪತ್ತೋ ಸಮ್ಬೋಧಿಮುತ್ತಮಂ.

೩. ಧಮ್ಮಚಕ್ಕಂ ಪವತ್ತೇನ್ತೇ, ಕೋಣಾಗಮನನಾಯಕೇ;

ತಿಂಸಕೋಟಿಸಹಸ್ಸಾನಂ, ಪಠಮಾಭಿಸಮಯೋ ಅಹು.

೪. ಪಾಟಿಹೀರಂ ಕರೋನ್ತೇ ಚ, ಪರವಾದಪ್ಪಮದ್ದನೇ;

ವೀಸತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೫. ತತೋ ವಿಕುಬ್ಬನಂ ಕತ್ವಾ, ಜಿನೋ ದೇವಪುರಂ ಗತೋ;

ವಸತೇ ತತ್ಥ ಸಮ್ಬುದ್ಧೋ, ಸಿಲಾಯ ಪಣ್ಡುಕಮ್ಬಲೇ.

೬. ಪಕರಣೇ ಸತ್ತ ದೇಸೇನ್ತೋ, ವಸ್ಸಂ ವಸತಿ ಸೋ ಮುನಿ;

ದಸಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು.

೭. ತಸ್ಸಾಪಿ ದೇವದೇವಸ್ಸ, ಏಕೋ ಆಸಿ ಸಮಾಗಮೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೮. ತಿಂಸಭಿಕ್ಖುಸಹಸ್ಸಾನಂ, ತದಾ ಆಸಿ ಸಮಾಗಮೋ;

ಓಘಾನಮತಿಕ್ಕನ್ತಾನಂ, ಭಿಜ್ಜಿತಾನಞ್ಚ ಮಚ್ಚುಯಾ.

೯. ಅಹಂ ತೇನ ಸಮಯೇನ, ಪಬ್ಬತೋ ನಾಮ ಖತ್ತಿಯೋ;

ಮಿತ್ತಾಮಚ್ಚೇಹಿ ಸಮ್ಪನ್ನೋ, ಅನನ್ತಬಲವಾಹನೋ.

೧೦. ಸಮ್ಬುದ್ಧದಸ್ಸನಂ ಗನ್ತ್ವಾ, ಸುತ್ವಾ ಧಮ್ಮಮನುತ್ತರಂ;

ನಿಮನ್ತೇತ್ವಾ ಸಜಿನಸಙ್ಘಂ, ದಾನಂ ದತ್ವಾ ಯದಿಚ್ಛಕಂ.

೧೧. ಪಟ್ಟುಣ್ಣಂ ಚೀನಪಟ್ಟಞ್ಚ, ಕೋಸೇಯ್ಯಂ ಕಮ್ಬಲಮ್ಪಿ ಚ;

ಸೋವಣ್ಣಪಾದುಕಞ್ಚೇವ, ಅದಾಸಿಂ ಸತ್ಥುಸಾವಕೇ.

೧೨. ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಙ್ಘಮಜ್ಝೇ ನಿಸೀದಿಯ;

‘‘ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೩. ‘‘ಅಹು ಕಪಿಲವ್ಹಯಾ ರಮ್ಮಾ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೪. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೧೫. ಸಬ್ಬಞ್ಞುತಂ ಗವೇಸನ್ತೋ, ದಾನಂ ದತ್ವಾ ನರುತ್ತಮೇ;

ಓಹಾಯಾಹಂ ಮಹಾರಜ್ಜಂ, ಪಬ್ಬಜಿಂ ಜಿನಸನ್ತಿಕೇ [ತಸ್ಸ ಸನ್ತಿಕೇ (ಸೀ.)].

೧೬. ನಗರಂ ಸೋಭವತೀ ನಾಮ, ಸೋಭೋ ನಾಮಾಸಿ ಖತ್ತಿಯೋ;

ವಸತೇ ತತ್ಥ ನಗರೇ, ಸಮ್ಬುದ್ಧಸ್ಸ ಮಹಾಕುಲಂ.

೧೭. ಬ್ರಾಹ್ಮಣೋ ಯಞ್ಞದತ್ತೋ ಚ, ಆಸಿ ಬುದ್ಧಸ್ಸ ಸೋ ಪಿತಾ;

ಉತ್ತರಾ ನಾಮ ಜನಿಕಾ, ಕೋಣಾಗಮನಸ್ಸ ಸತ್ಥುನೋ.

೧೮. ತೀಣಿ ವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ತುಸಿತಸನ್ತುಸಿತಸನ್ತುಟ್ಠಾ, ತಯೋ ಪಾಸಾದಮುತ್ತಮಾ.

೧೯. ಅನೂನಸೋಳಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ರುಚಿಗತ್ತಾ ನಾಮ ನಾರೀ, ಸತ್ಥವಾಹೋ ನಾಮ ಅತ್ರಜೋ.

೨೦. ನಿಮಿತ್ತೇ ಚತುರೋ ದಿಸ್ವಾ, ಹತ್ಥಿಯಾನೇನ ನಿಕ್ಖಮಿ;

ಛಮಾಸಂ ಪಧಾನಚಾರಂ, ಅಚರೀ ಪುರಿಸುತ್ತಮೋ.

೨೧. ಬ್ರಹ್ಮುನಾ ಯಾಚಿತೋ ಸನ್ತೋ, ಕೋಣಾಗಮನನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ.

೨೨. ಭಿಯ್ಯಸೋ ಉತ್ತರೋ ನಾಮ, ಅಹೇಸುಂ ಅಗ್ಗಸಾವಕಾ;

ಸೋತ್ಥಿಜೋ ನಾಮುಪಟ್ಠಾಕೋ, ಕೋಣಾಗಮನಸ್ಸ ಸತ್ಥುನೋ.

೨೩. ಸಮುದ್ದಾ ಉತ್ತರಾ ಚೇವ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ಉದುಮ್ಬರೋತಿ ಪವುಚ್ಚತಿ.

೨೪. ಉಗ್ಗೋ ಚ ಸೋಮದೇವೋ ಚ, ಅಹೇಸುಂ ಅಗ್ಗುಪಟ್ಠಕಾ;

ಸೀವಲಾ ಚೇವ ಸಾಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೨೫. ಉಚ್ಚತ್ತನೇನ ಸೋ ಬುದ್ಧೋ, ತಿಂಸಹತ್ಥಸಮುಗ್ಗತೋ;

ಉಕ್ಕಾಮುಖೇ ಯಥಾ ಕಮ್ಬು, ಏವಂ ರಂಸೀಹಿ ಮಣ್ಡಿತೋ.

೨೬. ತಿಂಸವಸ್ಸಸಹಸ್ಸಾನಿ, ಆಯು ಬುದ್ಧಸ್ಸ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೨೭. ಧಮ್ಮಚೇತಿಂ ಸಮುಸ್ಸೇತ್ವಾ, ಧಮ್ಮದುಸ್ಸವಿಭೂಸಿತಂ;

ಧಮ್ಮಪುಪ್ಫಗುಳಂ ಕತ್ವಾ, ನಿಬ್ಬುತೋ ಸೋ ಸಸಾವಕೋ.

೨೮. ಮಹಾವಿಲಾಸೋ ತಸ್ಸ ಜನೋ, ಸಿರಿಧಮ್ಮಪ್ಪಕಾಸನೋ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೨೯. ಕೋಣಾಗಮನೋ ಸಮ್ಬುದ್ಧೋ, ಪಬ್ಬತಾರಾಮಮ್ಹಿ ನಿಬ್ಬುತೋ;

ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ.

ಕೋಣಾಗಮನಸ್ಸ ಭಗವತೋ ವಂಸೋ ತೇವೀಸತಿಮೋ.