೨೪. ಕಕುಸನ್ಧಬುದ್ಧವಂಸೋ

೧. ವೇಸ್ಸಭುಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ;

ಕಕುಸನ್ಧೋ ನಾಮ ನಾಮೇನ, ಅಪ್ಪಮೇಯ್ಯೋ ದುರಾಸದೋ.

೨. ಉಗ್ಘಾಟೇತ್ವಾ ಸಬ್ಬಭವಂ, ಚರಿಯಾಯ ಪಾರಮಿಂ ಗತೋ;

ಸೀಹೋವ ಪಞ್ಜರಂ ಭೇತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

೩. ಧಮ್ಮಚಕ್ಕಂ ಪವತ್ತೇನ್ತೇ, ಕಕುಸನ್ಧೇ ಲೋಕನಾಯಕೇ;

ಚತ್ತಾರೀಸಕೋಟಿಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.

೪. ಅನ್ತಲಿಕ್ಖಮ್ಹಿ ಆಕಾಸೇ, ಯಮಕಂ ಕತ್ವಾ ವಿಕುಬ್ಬನಂ;

ತಿಂಸಕೋಟಿಸಹಸ್ಸಾನಂ, ಬೋಧೇಸಿ ದೇವಮಾನುಸೇ.

೫. ನರದೇವಸ್ಸ ಯಕ್ಖಸ್ಸ, ಚತುಸಚ್ಚಪ್ಪಕಾಸನೇ;

ಧಮ್ಮಾಭಿಸಮಯೋ ತಸ್ಸ, ಗಣನಾತೋ ಅಸಙ್ಖಿಯೋ.

೬. ಕಕುಸನ್ಧಸ್ಸ ಭಗವತೋ, ಏಕೋ ಆಸಿ ಸಮಾಗಮೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೭. ಚತ್ತಾಲೀಸಸಹಸ್ಸಾನಂ, ತದಾ ಆಸಿ ಸಮಾಗಮೋ;

ದನ್ತಭೂಮಿಮನುಪ್ಪತ್ತಾನಂ, ಆಸವಾರಿಗಣಕ್ಖಯಾ.

೮. ಅಹಂ ತೇನ ಸಮಯೇನ, ಖೇಮೋ ನಾಮಾಸಿ ಖತ್ತಿಯೋ;

ತಥಾಗತೇ ಜಿನಪುತ್ತೇ, ದಾನಂ ದತ್ವಾ ಅನಪ್ಪಕಂ.

೯. ಪತ್ತಞ್ಚ ಚೀವರಂ ದತ್ವಾ, ಅಞ್ಜನಂ ಮಧುಲಟ್ಠಿಕಂ;

ಇಮೇತಂ ಪತ್ಥಿತಂ ಸಬ್ಬಂ, ಪಟಿಯಾದೇಮಿ ವರಂ ವರಂ.

೧೦. ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಕಕುಸನ್ಧೋ ವಿನಾಯಕೋ;

‘‘ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೧. ‘‘ಅಹು ಕಪಿಲವ್ಹಯಾ ರಮ್ಮಾ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೨. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೧೩. ನಗರಂ ಖೇಮಾವತೀ ನಾಮ, ಖೇಮೋ ನಾಮಾಸಹಂ ತದಾ;

ಸಬ್ಬಞ್ಞುತಂ ಗವೇಸನ್ತೋ, ಪಬ್ಬಜಿಂ ತಸ್ಸ ಸನ್ತಿಕೇ.

೧೪. ಬ್ರಾಹ್ಮಣೋ ಅಗ್ಗಿದತ್ತೋ ಚ, ಆಸಿ ಬುದ್ಧಸ್ಸ ಸೋ ಪಿತಾ;

ವಿಸಾಖಾ ನಾಮ ಜನಿಕಾ, ಕಕುಸನ್ಧಸ್ಸ ಸತ್ಥುನೋ.

೧೫. ವಸತೇ ತತ್ಥ ಖೇಮೇ ಪುರೇ, ಸಮ್ಬುದ್ಧಸ್ಸ ಮಹಾಕುಲಂ;

ನರಾನಂ ಪವರಂ ಸೇಟ್ಠಂ, ಜಾತಿಮನ್ತಂ ಮಹಾಯಸಂ.

೧೬. ಚತುವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ಕಾಮ -ಕಾಮವಣ್ಣ-ಕಾಮಸುದ್ಧಿನಾಮಾ [ಸುಚಿ ಸುರುಚಿ ರತಿವದ್ಧನನಾಮಕಾ (ಸೀ.)], ತಯೋ ಪಾಸಾದಮುತ್ತಮಾ.

೧೭. ಸಮತಿಂಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ರೋಚಿನೀ ನಾಮ ಸಾ ನಾರೀ, ಉತ್ತರೋ ನಾಮ ಅತ್ರಜೋ.

೧೮. ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ;

ಅನೂನಅಟ್ಠಮಾಸಾನಿ, ಪಧಾನಂ ಪದಹೀ ಜಿನೋ.

೧೯. ಬ್ರಹ್ಮುನಾ ಯಾಚಿತೋ ಸನ್ತೋ, ಕಕುಸನ್ಧೋ ವಿನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ.

೨೦. ವಿಧುರೋ ಚ ಸಞ್ಜೀವೋ ಚ, ಅಹೇಸುಂ ಅಗ್ಗಸಾವಕಾ;

ಬುದ್ಧಿಜೋ ನಾಮುಪಟ್ಠಾಕೋ, ಕಕುಸನ್ಧಸ್ಸ ಸತ್ಥುನೋ.

೨೧. ಸಾಮಾ ಚ ಚಮ್ಪಾನಾಮಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ಸಿರೀಸೋತಿ ಪವುಚ್ಚತಿ.

೨೨. ಅಚ್ಚುತೋ ಚ ಸುಮನೋ ಚ, ಅಹೇಸುಂ ಅಗ್ಗುಪಟ್ಠಕಾ;

ನನ್ದಾ ಚೇವ ಸುನನ್ದಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೨೩. ಚತ್ತಾಲೀಸರತನಾನಿ, ಅಚ್ಚುಗ್ಗತೋ ಮಹಾಮುನಿ;

ಕನಕಪ್ಪಭಾ ನಿಚ್ಛರತಿ, ಸಮನ್ತಾ ದಸಯೋಜನಂ.

೨೪. ಚತ್ತಾಲೀಸವಸ್ಸಸಹಸ್ಸಾನಿ, ಆಯು ತಸ್ಸ ಮಹೇಸಿನೋ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೨೫. ಧಮ್ಮಾಪಣಂ ಪಸಾರೇತ್ವಾ, ನರನಾರೀನಂ ಸದೇವಕೇ;

ನದಿತ್ವಾ ಸೀಹನಾದಂವ, ನಿಬ್ಬುತೋ ಸೋ ಸಸಾವಕೋ.

೨೬. ಅಟ್ಠಙ್ಗವಚನಸಮ್ಪನ್ನೋ, ಅಚ್ಛಿದ್ದಾನಿ ನಿರನ್ತರಂ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೨೭. ಕಕುಸನ್ಧೋ ಜಿನವರೋ, ಖೇಮಾರಾಮಮ್ಹಿ ನಿಬ್ಬುತೋ;

ತತ್ಥೇವಸ್ಸ ಥೂಪವರೋ, ಗಾವುತಂ ನಭಮುಗ್ಗತೋತಿ.

ಕಕುಸನ್ಧಸ್ಸ ಭಗವತೋ ವಂಸೋ ದ್ವಾವೀಸತಿಮೋ.