೩. ನಿಪನ್ನಞ್ಜಲಿಕತ್ಥೇರಅಪದಾನಂ

೧೬. ‘‘ರುಕ್ಖಮೂಲೇ ನಿಸಿನ್ನೋಹಂ, ಬ್ಯಾಧಿತೋ ಪರಮೇನ ಚ;

ಪರಮಕಾರುಞ್ಞಪತ್ತೋಮ್ಹಿ, ಅರಞ್ಞೇ ಕಾನನೇ ಅಹಂ.

೧೭. ‘‘ಅನುಕಮ್ಪಂ ಉಪಾದಾಯ, ತಿಸ್ಸೋ ಸತ್ಥಾ ಉಪೇಸಿ ಮಂ;

ಸೋಹಂ ನಿಪನ್ನಕೋ ಸನ್ತೋ, ಸಿರೇ ಕತ್ವಾನ ಅಞ್ಜಲಿಂ.

೧೮. ‘‘ಪಸನ್ನಚಿತ್ತೋ ಸುಮನೋ, ಸಬ್ಬಸತ್ತಾನಮುತ್ತಮಂ;

ಸಮ್ಬುದ್ಧಂ ಅಭಿವಾದೇತ್ವಾ, ತತ್ಥ ಕಾಲಙ್ಕತೋ ಅಹಂ.

೧೯. ‘‘ದ್ವೇನವುತೇ ಇತೋ ಕಪ್ಪೇ, ಯಂ ವನ್ದಿಂ ಪುರಿಸುತ್ತಮಂ;

ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.

೨೦. ‘‘ಇತೋ ಪಞ್ಚಮಕೇ ಕಪ್ಪೇ, ಪಞ್ಚೇವಾಸುಂ ಮಹಾಸಿಖಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಿಪನ್ನಞ್ಜಲಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಿಪನ್ನಞ್ಜಲಿಕತ್ಥೇರಸ್ಸಾಪದಾನಂ ತತಿಯಂ.