೯. ತಿಮಿರವಗ್ಗೋ

೧. ತಿಮಿರಪುಪ್ಫಿಯತ್ಥೇರಅಪದಾನಂ

೧. ‘‘ಚನ್ದಭಾಗಾನದೀತೀರೇ, ಅನುಸೋತಂ ವಜಾಮಹಂ;

ನಿಸಿನ್ನಂ ಸಮಣಂ ದಿಸ್ವಾ, ವಿಪ್ಪಸನ್ನಮನಾವಿಲಂ.

೨. ‘‘ತತ್ಥ ಚಿತ್ತಂ ಪಸಾದೇತ್ವಾ [ಪಸಾದೇಸಿಂ (ಸ್ಯಾ.)], ಏವಂ ಚಿನ್ತೇಸಹಂ ತದಾ;

ತಾರಯಿಸ್ಸತಿ ತಿಣ್ಣೋಯಂ, ದನ್ತೋಯಂ ದಮಯಿಸ್ಸತಿ.

೩. ‘‘ಅಸ್ಸಾಸಿಸ್ಸತಿ ಅಸ್ಸತ್ಥೋ, ಸನ್ತೋ ಚ ಸಮಯಿಸ್ಸತಿ;

ಮೋಚಯಿಸ್ಸತಿ ಮುತ್ತೋ ಚ, ನಿಬ್ಬಾಪೇಸ್ಸತಿ ನಿಬ್ಬುತೋ.

೪. ‘‘ಏವಾಹಂ ಚಿನ್ತಯಿತ್ವಾನ, ಸಿದ್ಧತ್ಥಸ್ಸ ಮಹೇಸಿನೋ;

ಗಹೇತ್ವಾ ತಿಮಿರಪುಪ್ಫಂ, ಮತ್ಥಕೇ ಓಕಿರಿಂ ಅಹಂ [ತದಾ (ಸ್ಯಾ.)].

೫. ‘‘ಅಞ್ಜಲಿಂ ಪಗ್ಗಹೇತ್ವಾನ, ಕತ್ವಾ ಚ ನಂ ಪದಕ್ಖಿಣಂ;

ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಅಪರಂ ದಿಸಂ.

೬. ‘‘ಅಚಿರಂ ಗತಮತ್ತಂ ಮಂ, ಮಿಗರಾಜಾ ವಿಹೇಠಯಿ;

ಪಪಾತಮನುಗಚ್ಛನ್ತೋ, ತತ್ಥೇವ ಪಪತಿಂ ಅಹಂ.

೭. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ [ಬುದ್ಧಪೂಜಾಯಿದಂ (ಸೀ. ಸ್ಯಾ.)] ಫಲಂ.

೮. ‘‘ಛಪ್ಪಞ್ಞಾಸಮ್ಹಿ ಕಪ್ಪಮ್ಹಿ, ಸತ್ತೇವಾಸುಂ ಮಹಾಯಸಾ [ಮಹಾರಹಾ (ಸ್ಯಾ. ಕ.)];

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೯. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಮಿರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಮಿರಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.

೨. ಗತಸಞ್ಞಕತ್ಥೇರಅಪದಾನಂ

೧೦. ‘‘ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ;

ಅವನ್ದಿಂ ಸತ್ಥುನೋ ಪಾದೇ, ವಿಪ್ಪಸನ್ನೇನ ಚೇತಸಾ.

೧೧. ‘‘ಸತ್ತನಙ್ಗಲಕೀಪುಪ್ಫೇ, ಆಕಾಸೇ ಉಕ್ಖಿಪಿಂ ಅಹಂ;

ತಿಸ್ಸಂ ಬುದ್ಧಂ ಸಮುದ್ದಿಸ್ಸ, ಅನನ್ತಗುಣಸಾಗರಂ.

೧೨. ‘‘ಸುಗತಾನುಗತಂ ಮಗ್ಗಂ, ಪೂಜೇತ್ವಾ ಹಟ್ಠಮಾನಸೋ;

ಅಞ್ಜಲಿಞ್ಚ [ಅಞ್ಜಲಿಸ್ಸ (ಕ.)] ತದಾಕಾಸಿಂ, ಪಸನ್ನೋ ಸೇಹಿ ಪಾಣಿಭಿ.

೧೩. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೪. ‘‘ಇತೋ ಅಟ್ಠಮಕೇ ಕಪ್ಪೇ, ತಯೋ ಅಗ್ಗಿಸಿಖಾ ಅಹು;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗತಸಞ್ಞಕತ್ಥೇರಸ್ಸಾಪದಾನಂ ದುತಿಯಂ.

೩. ನಿಪನ್ನಞ್ಜಲಿಕತ್ಥೇರಅಪದಾನಂ

೧೬. ‘‘ರುಕ್ಖಮೂಲೇ ನಿಸಿನ್ನೋಹಂ, ಬ್ಯಾಧಿತೋ ಪರಮೇನ ಚ;

ಪರಮಕಾರುಞ್ಞಪತ್ತೋಮ್ಹಿ, ಅರಞ್ಞೇ ಕಾನನೇ ಅಹಂ.

೧೭. ‘‘ಅನುಕಮ್ಪಂ ಉಪಾದಾಯ, ತಿಸ್ಸೋ ಸತ್ಥಾ ಉಪೇಸಿ ಮಂ;

ಸೋಹಂ ನಿಪನ್ನಕೋ ಸನ್ತೋ, ಸಿರೇ ಕತ್ವಾನ ಅಞ್ಜಲಿಂ.

೧೮. ‘‘ಪಸನ್ನಚಿತ್ತೋ ಸುಮನೋ, ಸಬ್ಬಸತ್ತಾನಮುತ್ತಮಂ;

ಸಮ್ಬುದ್ಧಂ ಅಭಿವಾದೇತ್ವಾ, ತತ್ಥ ಕಾಲಙ್ಕತೋ ಅಹಂ.

೧೯. ‘‘ದ್ವೇನವುತೇ ಇತೋ ಕಪ್ಪೇ, ಯಂ ವನ್ದಿಂ ಪುರಿಸುತ್ತಮಂ;

ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.

೨೦. ‘‘ಇತೋ ಪಞ್ಚಮಕೇ ಕಪ್ಪೇ, ಪಞ್ಚೇವಾಸುಂ ಮಹಾಸಿಖಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಿಪನ್ನಞ್ಜಲಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಿಪನ್ನಞ್ಜಲಿಕತ್ಥೇರಸ್ಸಾಪದಾನಂ ತತಿಯಂ.

೪. ಅಧೋಪುಪ್ಫಿಯತ್ಥೇರಅಪದಾನಂ

೨೨. ‘‘ಅಭಿಭೂ ನಾಮ ಸೋ ಭಿಕ್ಖು, ಸಿಖಿನೋ ಅಗ್ಗಸಾವಕೋ;

ಮಹಾನುಭಾವೋ ತೇವಿಜ್ಜೋ, ಹಿಮವನ್ತಂ ಉಪಾಗಮಿ.

೨೩. ‘‘ಅಹಮ್ಪಿ ಹಿಮವನ್ತಮ್ಹಿ, ರಮಣೀಯಸ್ಸಮೇ ಇಸಿ;

ವಸಾಮಿ ಅಪ್ಪಮಞ್ಞಾಸು, ಇದ್ಧೀಸು ಚ ತದಾ ವಸೀ.

೨೪. ‘‘ಪಕ್ಖಿಜಾತೋ ವಿಯಾಕಾಸೇ, ಪಬ್ಬತಂ ಅಧಿವತ್ತಯಿಂ [ಅಭಿಪತ್ಥಯಿಂ (ಸ್ಯಾ.), ಅಭಿಮತ್ಥಯಿಂ (ಕ.), ಅಧಿವತ್ಥಯಿನ್ತಿ ಪಬ್ಬತಸ್ಸ ಉಪರಿ ಗಚ್ಛಿನ್ತಿಅತ್ಥೋ];

ಅಧೋಪುಪ್ಫಂ ಗಹೇತ್ವಾನ, ಆಗಚ್ಛಿಂ [ಅಗಚ್ಛಿಂ (ಕ.)] ಪಬ್ಬತಂ ಅಹಂ.

೨೫. ‘‘ಸತ್ತ ಪುಪ್ಫಾನಿ ಗಣ್ಹಿತ್ವಾ, ಮತ್ಥಕೇ ಓಕಿರಿಂ ಅಹಂ;

ಆಲೋಕಿತೇ [ಆಲೋಕಿತೋ (ಸ್ಯಾ.)] ಚ ವೀರೇನ, ಪಕ್ಕಾಮಿಂ ಪಾಚಿನಾಮುಖೋ.

೨೬. ‘‘ಆವಾಸಂ ಅಭಿಸಮ್ಭೋಸಿಂ, ಪತ್ವಾನ ಅಸ್ಸಮಂ ಅಹಂ;

ಖಾರಿಭಾರಂ ಗಹೇತ್ವಾನ, ಪಾಯಾಸಿಂ [ಪಾವಿಸಿಂ (ಸೀ.)] ಪಬ್ಬತನ್ತರಂ.

೨೭. ‘‘ಅಜಗರೋ ಮಂ ಪೀಳೇಸಿ, ಘೋರರೂಪೋ ಮಹಬ್ಬಲೋ;

ಪುಬ್ಬಕಮ್ಮಂ ಸರಿತ್ವಾನ, ತತ್ಥ ಕಾಲಙ್ಕತೋ ಅಹಂ.

೨೮. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಧೋಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಧೋಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.

೫. ರಂಸಿಸಞ್ಞಕತ್ಥೇರಅಪದಾನಂ

೩೦. ‘‘ಪಬ್ಬತೇ ಹಿಮವನ್ತಮ್ಹಿ, ವಾಸಂ ಕಪ್ಪೇಸಹಂ ಪುರೇ;

ಅಜಿನುತ್ತರವಾಸೋಹಂ, ವಸಾಮಿ ಪಬ್ಬತನ್ತರೇ.

೩೧. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಸತರಂಸಿಂವ ಭಾಣುಮಂ;

ವನನ್ತರಗತಂ ದಿಸ್ವಾ, ಸಾಲರಾಜಂವ ಪುಪ್ಫಿತಂ.

೩೨. ‘‘ರಂಸ್ಯಾ [ರಂಸೇ (ಸ್ಯಾ. ಕ.)] ಚಿತ್ತಂ ಪಸಾದೇತ್ವಾ, ವಿಪಸ್ಸಿಸ್ಸ ಮಹೇಸಿನೋ;

ಪಗ್ಗಯ್ಹ ಅಞ್ಜಲಿಂ ವನ್ದಿಂ, ಸಿರಸಾ ಉಕ್ಕುಟೀ [ಸಿರಸಾ ಉಕ್ಕುಟಿಕೋ (ಸ್ಯಾ.), ಸಿರಸುಕ್ಕುಟಿಕೋ (ಕ.)] ಅಹಂ.

೩೩. ‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ರಂಸಿಸಞ್ಞಾಯಿದಂ ಫಲಂ.

೩೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ರಂಸಿಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ರಂಸಿಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ದುತಿಯರಂಸಿಸಞ್ಞಕತ್ಥೇರಅಪದಾನಂ

೩೫. ‘‘ಪಬ್ಬತೇ ಹಿಮವನ್ತಮ್ಹಿ, ವಾಕಚೀರಧರೋ ಅಹಂ;

ಚಙ್ಕಮಞ್ಚ ಸಮಾರೂಳ್ಹೋ, ನಿಸೀದಿಂ ಪಾಚಿನಾಮುಖೋ.

೩೬. ‘‘ಪಬ್ಬತೇ ಸುಗತಂ ದಿಸ್ವಾ, ಫುಸ್ಸಂ ಝಾನರತಂ ತದಾ;

ಅಞ್ಜಲಿಂ ಪಗ್ಗಹೇತ್ವಾನ, ರಂಸ್ಯಾ ಚಿತ್ತಂ ಪಸಾದಯಿಂ.

೩೭. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ರಂಸಿಸಞ್ಞಾಯಿದಂ ಫಲಂ.

೩೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ರಂಸಿಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ದುತಿಯರಂಸಿಸಞ್ಞಕತ್ಥೇರಸ್ಸಾಪದಾನಂ ಛಟ್ಠಂ.

೭. ಫಲದಾಯಕತ್ಥೇರಅಪದಾನಂ

೩೯. ‘‘ಪಬ್ಬತೇ ಹಿಮವನ್ತಮ್ಹಿ, ಖರಾಜಿನಧರೋ ಅಹಂ;

ಫುಸ್ಸಂ ಜಿನವರಂ ದಿಸ್ವಾ, ಫಲಹತ್ಥೋ ಫಲಂ ಅದಂ.

೪೦. ‘‘ಯಮಹಂ ಫಲಮದಾಸಿಂ, ವಿಪ್ಪಸನ್ನೇನ ಚೇತಸಾ;

ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತೇ ಮಮ.

೪೧. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಫಲಂ ಅದದಿಂ ಅಹಂ;

ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.

೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಫಲದಾಯಕತ್ಥೇರಸ್ಸಾಪದಾನಂ ಸತ್ತಮಂ.

೮. ಸದ್ದಸಞ್ಞಕತ್ಥೇರಅಪದಾನಂ

೪೩. ‘‘ಪಬ್ಬತೇ ಹಿಮವನ್ತಮ್ಹಿ, ವಸಾಮಿ ಪಣ್ಣಸನ್ಥರೇ;

ಫುಸ್ಸಸ್ಸ ಧಮ್ಮಂ ಭಣತೋ, ಸದ್ದೇ ಚಿತ್ತಂ ಪಸಾದಯಿಂ.

೪೪. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.

೪೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸದ್ದಸಞ್ಞಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಬೋಧಿಸಿಞ್ಚಕತ್ಥೇರಅಪದಾನಂ

೪೬. ‘‘ವಿಪಸ್ಸಿಸ್ಸ ಭಗವತೋ, ಮಹಾಬೋಧಿಮಹೋ ಅಹು;

ಪಬ್ಬಜ್ಜುಪಗತೋ ಸನ್ತೋ, ಉಪಗಚ್ಛಿಂ ಅಹಂ ತದಾ.

೪೭. ‘‘ಕುಸುಮೋದಕಮಾದಾಯ, ಬೋಧಿಯಾ ಓಕಿರಿಂ ಅಹಂ;

ಮೋಚಯಿಸ್ಸತಿ ನೋ ಮುತ್ತೋ, ನಿಬ್ಬಾಪೇಸ್ಸತಿ ನಿಬ್ಬುತೋ.

೪೮. ‘‘ಏಕನವುತಿತೋ ಕಪ್ಪೇ, ಯಂ ಬೋಧಿಮಭಿಸಿಞ್ಚಯಿಂ;

ದುಗ್ಗತಿಂ ನಾಭಿಜಾನಾಮಿ, ಬೋಧಿಸಿಞ್ಚಾಯಿದಂ ಫಲಂ.

೪೯. ‘‘ತೇತ್ತಿಂಸೇ ವತ್ತಮಾನಮ್ಹಿ, ಕಪ್ಪೇ ಆಸುಂ ಜನಾಧಿಪಾ;

ಉದಕಸೇಚನಾ ನಾಮ, ಅಟ್ಠೇತೇ ಚಕ್ಕವತ್ತಿನೋ.

೫೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬೋಧಿಸಿಞ್ಚಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬೋಧಿಸಿಞ್ಚಕತ್ಥೇರಸ್ಸಾಪದಾನಂ ನವಮಂ.

೧೦. ಪದುಮಪುಪ್ಫಿಯತ್ಥೇರಅಪದಾನಂ

೫೧. ‘‘ಪೋಕ್ಖರವನಂ ಪವಿಟ್ಠೋ, ಭಞ್ಜನ್ತೋ ಪದುಮಾನಿಹಂ;

ತತ್ಥದ್ದಸಂ ಫುಸ್ಸಂ ಬುದ್ಧಂ [ಅದ್ದಸಂ ಫುಸ್ಸಸಮ್ಬುದ್ಧಂ (ಸೀ. ಸ್ಯಾ.)], ಬಾತ್ತಿಂಸವರಲಕ್ಖಣಂ.

೫೨. ‘‘ಪದುಮಪುಪ್ಫಂ ಗಹೇತ್ವಾನ, ಆಕಾಸೇ ಉಕ್ಖಿಪಿಂ ಅಹಂ;

ಪಾಪಕಮ್ಮಂ ಸರಿತ್ವಾನ, ಪಬ್ಬಜಿಂ ಅನಗಾರಿಯಂ.

೫೩. ‘‘ಪಬ್ಬಜಿತ್ವಾನ ಕಾಯೇನ, ಮನಸಾ ಸಂವುತೇನ ಚ;

ವಚೀದುಚ್ಚರಿತಂ ಹಿತ್ವಾ, ಆಜೀವಂ ಪರಿಸೋಧಯಿಂ.

೫೪. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೫೫. ‘‘ಪದುಮಾಭಾಸನಾಮಾ ಚ, ಅಟ್ಠಾರಸ ಮಹೀಪತೀ;

ಅಟ್ಠಾರಸೇಸು ಕಪ್ಪೇಸು, ಅಟ್ಠತಾಲೀಸಮಾಸಿಸುಂ.

೫೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪದುಮಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಪದುಮಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.

ತಿಮಿರವಗ್ಗೋ ನವಮೋ.