೧೦. ಸುಧಾವಗ್ಗೋ

೧. ಸುಧಾಪಿಣ್ಡಿಯತ್ಥೇರಅಪದಾನಂ

೧. ‘‘ಪೂಜಾರಹೇ ಪೂಜಯತೋ, ಬುದ್ಧೇ ಯದಿ ವ ಸಾವಕೇ;

ಪಪಞ್ಚಸಮತಿಕ್ಕನ್ತೇ, ತಿಣ್ಣಸೋಕಪರಿದ್ದವೇ.

೨. ‘‘ತೇ ತಾದಿಸೇ ಪೂಜಯತೋ, ನಿಬ್ಬುತೇ ಅಕುತೋಭಯೇ;

ನ ಸಕ್ಕಾ ಪುಞ್ಞಂ ಸಙ್ಖಾತುಂ, ಇಮೇತ್ತಮಪಿ [ಇದಮ್ಮತ್ತನ್ತಿ (ಸೀ.), ಇಮೇತ್ಥಮಪಿ (ಕ.)] ಕೇನಚಿ.

೩. ‘‘ಚತುನ್ನಮಪಿ ದೀಪಾನಂ, ಇಸ್ಸರಂ ಯೋಧ ಕಾರಯೇ;

ಏಕಿಸ್ಸಾ ಪೂಜನಾಯೇತಂ, ಕಲಂ ನಾಗ್ಘತಿ ಸೋಳಸಿಂ.

೪. ‘‘ಸಿದ್ಧತ್ಥಸ್ಸ ನರಗ್ಗಸ್ಸ, ಚೇತಿಯೇ ಫಲಿತನ್ತರೇ;

ಸುಧಾಪಿಣ್ಡೋ ಮಯಾ ದಿನ್ನೋ, ವಿಪ್ಪಸನ್ನೇನ ಚೇತಸಾ.

೫. ‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಟಿಸಙ್ಖಾರಸ್ಸಿದಂ ಫಲಂ.

೬. ‘‘ಇತೋ ತಿಂಸತಿಕಪ್ಪಮ್ಹಿ, ಪಟಿಸಙ್ಖಾರಸವ್ಹಯಾ;

ಸತ್ತರತನಸಮ್ಪನ್ನಾ, ತೇರಸ ಚಕ್ಕವತ್ತಿನೋ.

೭. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಧಾಪಿಣ್ಡಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಧಾಪಿಣ್ಡಿಯತ್ಥೇರಸ್ಸಾಪದಾನಂ ಪಠಮಂ.

೨. ಸುಚಿನ್ತಿಕತ್ಥೇರಅಪದಾನಂ

೮. ‘‘ತಿಸ್ಸಸ್ಸ ಲೋಕನಾಥಸ್ಸ, ಸುದ್ಧಪೀಠಮದಾಸಹಂ;

ಹಟ್ಠೋ ಹಟ್ಠೇನ ಚಿತ್ತೇನ, ಬುದ್ಧಸ್ಸಾದಿಚ್ಚಬನ್ಧುನೋ.

೯. ‘‘ಅಟ್ಠಾರಸೇ [ಅಟ್ಠತಿಂಸೇ (ಸೀ. ಸ್ಯಾ.)] ಇತೋ ಕಪ್ಪೇ, ರಾಜಾ ಆಸಿಂ ಮಹಾರುಚಿ;

ಭೋಗೋ ಚ ವಿಪುಲೋ ಆಸಿ, ಸಯನಞ್ಚ ಅನಪ್ಪಕಂ.

೧೦. ‘‘ಪೀಠಂ ಬುದ್ಧಸ್ಸ ದತ್ವಾನ, ವಿಪ್ಪಸನ್ನೇನ ಚೇತಸಾ;

ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.

೧೧. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪೀಠಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪೀಠದಾನಸ್ಸಿದಂ ಫಲಂ.

೧೨. ‘‘ಅಟ್ಠತಿಂಸೇ ಇತೋ ಕಪ್ಪೇ, ತಯೋ ತೇ ಚಕ್ಕವತ್ತಿನೋ;

ರುಚಿ ಉಪರುಚಿ ಚೇವ, ಮಹಾರುಚಿ ತತಿಯಕೋ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಚಿನ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಚಿನ್ತಿಕತ್ಥೇರಸ್ಸಾಪದಾನಂ ದುತಿಯಂ.

೩. ಅಡ್ಢಚೇಳಕತ್ಥೇರಅಪದಾನಂ

೧೪. ‘‘ತಿಸ್ಸಸ್ಸಾಹಂ ಭಗವತೋ, ಉಪಡ್ಢದುಸ್ಸಮದಾಸಹಂ;

ಪರಮಕಾಪಞ್ಞಪತ್ತೋಮ್ಹಿ [ಪರಮಕಾರುಞ್ಞಪತ್ತೋಮ್ಹಿ (ಸ್ಯಾ. ಕ.)], ದುಗ್ಗತೇನ [ದುಗ್ಗನ್ಧೇನ (ಸೀ.)] ಸಮಪ್ಪಿತೋ.

೧೫. ‘‘ಉಪಡ್ಢದುಸ್ಸಂ ದತ್ವಾನ, ಕಪ್ಪಂ ಸಗ್ಗಮ್ಹಿ ಮೋದಹಂ;

ಅವಸೇಸೇಸು ಕಪ್ಪೇಸು, ಕುಸಲಂ ಕಾರಿತಂ ಮಯಾ.

೧೬. ‘‘ದ್ವೇನವುತೇ ಇತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದುಸ್ಸದಾನಸ್ಸಿದಂ ಫಲಂ.

೧೭. ‘‘ಏಕೂನಪಞ್ಞಾಸಕಪ್ಪಮ್ಹಿ [ಏಕಪಞ್ಞಾಸಕಪ್ಪಮ್ಹಿ (ಸ್ಯಾ.)], ರಾಜಾನೋ ಚಕ್ಕವತ್ತಿನೋ;

ಸಮನ್ತಚ್ಛದನಾ ನಾಮ, ಬಾತ್ತಿಂಸಾಸುಂ [ಖತ್ತಿಯಾಸುಂ (ಸ್ಯಾ. ಕ.)] ಜನಾಧಿಪಾ.

೧೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಡ್ಢಚೇಳಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಡ್ಢಚೇಳಕತ್ಥೇರಸ್ಸಾಪದಾನಂ ತತಿಯಂ.

೪. ಸೂಚಿದಾಯಕತ್ಥೇರಅಪದಾನಂ

೧೯. ‘‘ಕಮ್ಮಾರೋಹಂ ಪುರೇ ಆಸಿಂ, ಬನ್ಧುಮಾಯಂ ಪುರುತ್ತಮೇ;

ಸೂಚಿದಾನಂ ಮಯಾ ದಿನ್ನಂ, ವಿಪಸ್ಸಿಸ್ಸ ಮಹೇಸಿನೋ.

೨೦. ‘‘ವಜಿರಗ್ಗಸಮಂ ಞಾಣಂ, ಹೋತಿ ಕಮ್ಮೇನ ತಾದಿಸಂ;

ವಿರಾಗೋಮ್ಹಿ ವಿಮುತ್ತೋಮ್ಹಿ [ವಿಭವೋಮ್ಹಿ ವಿಭತ್ತೋಮ್ಹಿ (ಕ.)], ಪತ್ತೋಮ್ಹಿ ಆಸವಕ್ಖಯಂ.

೨೧. ‘‘ಅತೀತೇ ಚ ಭವೇ ಸಬ್ಬೇ, ವತ್ತಮಾನೇ ಚನಾಗತೇ [ಅತೀತಾ ಚ ಭವಾ ಸಬ್ಬೇ, ವತ್ತಮಾನಾ ಚ’ನಾಗತಾ (ಸ್ಯಾ. ಕ.)];

ಞಾಣೇನ ವಿಚಿನಿಂ ಸಬ್ಬಂ, ಸೂಚಿದಾನಸ್ಸಿದಂ ಫಲಂ.

೨೨. ‘‘ಏಕನವುತಿತೋ ಕಪ್ಪೇ, ಸತ್ತಾಸುಂ ವಜಿರವ್ಹಯಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೂಚಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸೂಚಿದಾಯಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಗನ್ಧಮಾಲಿಯತ್ಥೇರಅಪದಾನಂ

೨೪. ‘‘ಸಿದ್ಧತ್ಥಸ್ಸ ಭಗವತೋ, ಗನ್ಧಥೂಪಂ ಅಕಾಸಹಂ;

ಸುಮನೇಹಿ ಪಟಿಚ್ಛನ್ನಂ, ಬುದ್ಧಾನುಚ್ಛವಿಕಂ ಕತಂ.

೨೫. ‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;

ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.

೨೬. ‘‘ಬ್ಯಗ್ಘೂಸಭಂವ ಪವರಂ, ಅಭಿಜಾತಂವ ಕೇಸರಿಂ;

ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.

೨೭. ‘‘ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ;

ಚತುನ್ನವುತಿತೋ ಕಪ್ಪೇ, ಗನ್ಧಮಾಲಂ ಯತೋ ಅದಂ.

೨೮. ‘‘ಬುದ್ಧೇ ಕತಸ್ಸ ಕಾರಸ್ಸ, ಫಲೇನಾಹಂ ವಿಸೇಸತೋ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೯. ‘‘ಚತ್ತಾರೀಸಮ್ಹಿ ಏಕೂನೇ, ಕಪ್ಪೇ ಆಸಿಂಸು ಸೋಳಸ;

ದೇವಗನ್ಧಸನಾಮಾ ತೇ, ರಾಜಾನೋ ಚಕ್ಕವತ್ತಿನೋ.

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗನ್ಧಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗನ್ಧಮಾಲಿಯತ್ಥೇರಸ್ಸಾಪದಾನಂ ಪಞ್ಚಮಂ.

೬. ತಿಪುಪ್ಫಿಯತ್ಥೇರಅಪದಾನಂ

೩೧. ‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ [ಬ್ರಹಾ (ಸ್ಯಾ.)];

ಪಾಟಲಿಂ ಹರಿತಂ ದಿಸ್ವಾ, ತೀಣಿ ಪುಪ್ಫಾನಿ ಓಕಿರಿಂ.

೩೨. ‘‘ಪತಿತಪತ್ತಾನಿ [ಸತ್ತಪತ್ತಾನಿ (ಸೀ.), ಸತಪತ್ತಾನಿ (ಕ.), ಸುಕ್ಖಪಣ್ಣಾನಿ (ಸ್ಯಾ.)] ಗಣ್ಹಿತ್ವಾ, ಬಹಿ ಛಡ್ಡೇಸಹಂ ತದಾ;

ಅನ್ತೋಸುದ್ಧಂ ಬಹಿಸುದ್ಧಂ, ಸುವಿಮುತ್ತಂ ಅನಾಸವಂ.

೩೩. ‘‘ಸಮ್ಮುಖಾ ವಿಯ ಸಮ್ಬುದ್ಧಂ, ವಿಪಸ್ಸಿಂ ಲೋಕನಾಯಕಂ;

ಪಾಟಲಿಂ ಅಭಿವಾದೇತ್ವಾ, ತತ್ಥ ಕಾಲಙ್ಕತೋ ಅಹಂ.

೩೪. ‘‘ಏಕನವುತಿತೋ ಕಪ್ಪೇ, ಯಂ ಬೋಧಿಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.

೩೫. ‘‘ಸಮನ್ತಪಾಸಾದಿಕಾ ನಾಮ, ತೇರಸಾಸಿಂಸು ರಾಜಿನೋ;

ಇತೋ ತೇತ್ತಿಂಸಕಪ್ಪಮ್ಹಿ [ತಿಂಸತಿಕಪ್ಪಮ್ಹಿ (ಸ್ಯಾ.)], ಚಕ್ಕವತ್ತೀ ಮಹಬ್ಬಲಾ.

೩೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.

೭. ಮಧುಪಿಣ್ಡಿಕತ್ಥೇರಅಪದಾನಂ

೩೭. ‘‘ವಿಪಿನೇ [ವಿವನೇ (ಸ್ಯಾ. ಅಟ್ಠ.)] ಕಾನನೇ ದಿಸ್ವಾ, ಅಪ್ಪಸದ್ದೇ ನಿರಾಕುಲೇ;

ಸಿದ್ಧತ್ಥಂ ಇಸಿನಂ ಸೇಟ್ಠಂ, ಆಹುತೀನಂ ಪಟಿಗ್ಗಹಂ.

೩೮. ‘‘ನಿಬ್ಬುತತ್ತಂ [ನಿಬ್ಬುತಗ್ಗಂ (ಕ.), ನಿಬ್ಬೂತಿಕಂ (ಸ್ಯಾ.)] ಮಹಾನಾಗಂ, ನಿಸಭಾಜಾನಿಯಂ ಯಥಾ;

ಓಸಧಿಂವ ವಿರೋಚನ್ತಂ, ದೇವಸಙ್ಘನಮಸ್ಸಿತಂ.

೩೯. ‘‘ವಿತ್ತಿ ಮಮಾಹು ತಾವದೇ [ವಿತ್ತಿ ಮೇ ಪಾಹುನಾ ತಾವ (ಸೀ. ಸ್ಯಾ.)], ಞಾಣಂ ಉಪ್ಪಜ್ಜಿ ತಾವದೇ;

ವುಟ್ಠಿತಸ್ಸ ಸಮಾಧಿಮ್ಹಾ, ಮಧುಂ ದತ್ವಾನ ಸತ್ಥುನೋ.

೪೦. ‘‘ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಪಾಚಿನಾಮುಖೋ;

ಚತುತ್ತಿಂಸಮ್ಹಿ ಕಪ್ಪಮ್ಹಿ, ರಾಜಾ ಆಸಿಂ ಸುದಸ್ಸನೋ.

೪೧. ‘‘ಮಧು ಭಿಸೇಹಿ ಸವತಿ, ಭೋಜನಮ್ಹಿ ಚ ತಾವದೇ;

ಮಧುವಸ್ಸಂ ಪವಸ್ಸಿತ್ಥ, ಪುಬ್ಬಕಮ್ಮಸ್ಸಿದಂ ಫಲಂ.

೪೨. ‘‘ಚತುನ್ನವುತಿತೋ ಕಪ್ಪೇ, ಯಂ ಮಧುಂ ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಧುದಾನಸ್ಸಿದಂ ಫಲಂ.

೪೩. ‘‘ಚತುತ್ತಿಂಸೇ ಇತೋ ಕಪ್ಪೇ, ಚತ್ತಾರೋ ತೇ ಸುದಸ್ಸನಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೪೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಧುಪಿಣ್ಡಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮಧುಪಿಣ್ಡಿಕತ್ಥೇರಸ್ಸಾಪದಾನಂ ಸತ್ತಮಂ.

೮. ಸೇನಾಸನದಾಯಕತ್ಥೇರಅಪದಾನಂ

೪೫. ‘‘ಸಿದ್ಧತ್ಥಸ್ಸ ಭಗವತೋ, ಅದಾಸಿಂ ಪಣ್ಣಸನ್ಥರಂ;

ಸಮನ್ತಾ ಉಪಹಾರಞ್ಚ, ಕುಸುಮಂ ಓಕಿರಿಂ ಅಹಂ.

೪೬. ‘‘ಪಾಸಾದೇವಂ ಗುಣಂ ರಮ್ಮಂ [ಪಾಸಾದೇ ಚ ಗುಹಂ ರಮ್ಮಂ (ಸ್ಯಾ.)], ಅನುಭೋಮಿ ಮಹಾರಹಂ;

ಮಹಗ್ಘಾನಿ ಚ ಪುಪ್ಫಾನಿ, ಸಯನೇಭಿಸವನ್ತಿ ಮೇ.

೪೭. ‘‘ಸಯನೇಹಂ ತುವಟ್ಟಾಮಿ, ವಿಚಿತ್ತೇ ಪುಪ್ಫಸನ್ಥತೇ;

ಪುಪ್ಫವುಟ್ಠಿ ಚ ಸಯನೇ, ಅಭಿವಸ್ಸತಿ ತಾವದೇ.

೪೮. ‘‘ಚತುನ್ನವುತಿತೋ ಕಪ್ಪೇ, ಅದಾಸಿಂ ಪಣ್ಣಸನ್ಥರಂ;

ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.

೪೯. ‘‘ತಿಣಸನ್ಥರಕಾ ನಾಮ, ಸತ್ತೇತೇ ಚಕ್ಕವತ್ತಿನೋ;

ಇತೋ ತೇ ಪಞ್ಚಮೇ ಕಪ್ಪೇ, ಉಪ್ಪಜ್ಜಿಂಸು ಜನಾಧಿಪಾ.

೫೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೇನಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸೇನಾಸನದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ವೇಯ್ಯಾವಚ್ಚಕತ್ಥೇರಅಪದಾನಂ

೫೧. ‘‘ವಿಪಸ್ಸಿಸ್ಸ ಭಗವತೋ, ಮಹಾಪೂಗಗಣೋ ಅಹು;

ವೇಯ್ಯಾವಚ್ಚಕರೋ ಆಸಿಂ, ಸಬ್ಬಕಿಚ್ಚೇಸು ವಾವಟೋ [ಬ್ಯಾವಟೋ (ಸೀ. ಸ್ಯಾ.)].

೫೨. ‘‘ದೇಯ್ಯಧಮ್ಮೋ ಚ ಮೇ ನತ್ಥಿ, ಸುಗತಸ್ಸ ಮಹೇಸಿನೋ;

ಅವನ್ದಿಂ ಸತ್ಥುನೋ ಪಾದೇ, ವಿಪ್ಪಸನ್ನೇನ ಚೇತಸಾ.

೫೩. ‘‘ಏಕನವುತಿತೋ ಕಪ್ಪೇ, ವೇಯ್ಯಾವಚ್ಚಂ ಅಕಾಸಹಂ;

ದುಗ್ಗತಿಂ ನಾಭಿಜಾನಾಮಿ, ವೇಯ್ಯಾವಚ್ಚಸ್ಸಿದಂ ಫಲಂ.

೫೪. ‘‘ಇತೋ ಚ ಅಟ್ಠಮೇ ಕಪ್ಪೇ, ರಾಜಾ ಆಸಿಂ ಸುಚಿನ್ತಿತೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ವೇಯ್ಯಾವಚ್ಚಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ವೇಯ್ಯಾವಚ್ಚಕತ್ಥೇರಸ್ಸಾಪದಾನಂ ನವಮಂ.

೧೦. ಬುದ್ಧುಪಟ್ಠಾಕತ್ಥೇರಅಪದಾನಂ

೫೬. ‘‘ವಿಪಸ್ಸಿಸ್ಸ ಭಗವತೋ, ಅಹೋಸಿಂ ಸಙ್ಖಧಮ್ಮಕೋ;

ನಿಚ್ಚುಪಟ್ಠಾನಯುತ್ತೋಮ್ಹಿ, ಸುಗತಸ್ಸ ಮಹೇಸಿನೋ.

೫೭. ‘‘ಉಪಟ್ಠಾನಫಲಂ ಪಸ್ಸ, ಲೋಕನಾಥಸ್ಸ ತಾದಿನೋ;

ಸಟ್ಠಿತೂರಿಯಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.

೫೮. ‘‘ಏಕನವುತಿತೋ ಕಪ್ಪೇ, ಉಪಟ್ಠಹಿಂ ಮಹಾಇಸಿಂ;

ದುಗ್ಗತಿಂ ನಾಭಿಜಾನಾಮಿ, ಉಪಟ್ಠಾನಸ್ಸಿದಂ ಫಲಂ.

೫೯. ‘‘ಚತುವೀಸೇ [ಚತುನವುತೇ (ಸ್ಯಾ.)] ಇತೋ ಕಪ್ಪೇ, ಮಹಾನಿಗ್ಘೋಸನಾಮಕಾ;

ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.

೬೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬುದ್ಧುಪಟ್ಠಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬುದ್ಧುಪಟ್ಠಾಕತ್ಥೇರಸ್ಸಾಪದಾನಂ ದಸಮಂ.

ಸುಧಾವಗ್ಗೋ ದಸಮೋ.

ತಸ್ಸುದ್ದಾನಂ –

ಸುಧಾ ಸುಚಿನ್ತಿ ಚೇಳಞ್ಚ, ಸೂಚೀ ಚ ಗನ್ಧಮಾಲಿಯೋ;

ತಿಪುಪ್ಫಿಯೋ ಮಧುಸೇನಾ, ವೇಯ್ಯಾವಚ್ಚೋ ಚುಪಟ್ಠಕೋ;

ಸಮಸಟ್ಠಿ ಚ ಗಾಥಾಯೋ, ಅಸ್ಮಿಂ ವಗ್ಗೇ ಪಕಿತ್ತಿತಾ.

ಅಥ ವಗ್ಗುದ್ದಾನಂ –

ಬುದ್ಧವಗ್ಗೋ ಹಿ ಪಠಮೋ, ಸೀಹಾಸನಿ ಸುಭೂತಿ ಚ;

ಕುಣ್ಡಧಾನೋ ಉಪಾಲಿ ಚ, ಬೀಜನಿಸಕಚಿನ್ತಿ ಚ.