೧೦. ತಿಪದುಮಿಯತ್ಥೇರಅಪದಾನಂ

೪೮. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ದನ್ತೋ ದನ್ತಪರಿವುತೋ, ನಗರಾ ನಿಕ್ಖಮೀ ತದಾ.

೪೯. ‘‘ನಗರೇ ಹಂಸವತಿಯಂ, ಅಹೋಸಿಂ ಮಾಲಿಕೋ ತದಾ;

ಯಂ ತತ್ಥ ಉತ್ತಮಂ ತೋಣಿ, ಪದ್ಮಪುಪ್ಫಾನಿ [ಉತ್ತಮಂ ಪುಪ್ಫಂ, ತೀಣಿ ಪುಪ್ಫಾನಿ (ಸೀ.)] ಅಗ್ಗಹಿಂ.

೫೦. ‘‘ಅದ್ದಸಂ ವಿರಜಂ ಬುದ್ಧಂ, ಪಟಿಮಗ್ಗನ್ತರಾಪಣೇ;

ಸಹ [ಸೋಹಂ (ಸೀ.)] ದಿಸ್ವಾನ ಸಮ್ಬುದ್ಧಂ, ಏವಂ ಚಿನ್ತೇಸಹಂ ತದಾ.

೫೧. ‘‘ಕಿಂ ಮೇ ಇಮೇಹಿ ಪುಪ್ಫೇಹಿ, ರಞ್ಞೋ ಉಪನಿತೇಹಿ ಮೇ;

ಗಾಮಂ ವಾ ಗಾಮಖೇತ್ತಂ ವಾ, ಸಹಸ್ಸಂ ವಾ ಲಭೇಯ್ಯಹಂ.

೫೨. ‘‘ಅದನ್ತದಮನಂ ವೀರಂ, ಸಬ್ಬಸತ್ತಸುಖಾವಹಂ;

ಲೋಕನಾಥಂ ಪೂಜಯಿತ್ವಾ, ಲಚ್ಛಾಮಿ ಅಮತಂ ಧನಂ.

೫೩. ‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;

ತೀಣಿ ಲೋಹಿತಕೇ ಗಯ್ಹ, ಆಕಾಸೇ ಉಕ್ಖಿಪಿಂ ತದಾ.

೫೪. ‘‘ಮಯಾ ಉಕ್ಖಿತ್ತಮತ್ತಮ್ಹಿ, ಆಕಾಸೇ ಪತ್ಥರಿಂಸು ತೇ;

ಧಾರಿಂಸು ಮತ್ಥಕೇ ತತ್ಥ, ಉದ್ಧಂವಣ್ಟಾ ಅಧೋಮುಖಾ.

೫೫. ‘‘ಯೇ ಕೇಚಿ ಮನುಜಾ ದಿಸ್ವಾ, ಉಕ್ಕುಟ್ಠಿಂ ಸಮ್ಪವತ್ತಯುಂ;

ದೇವತಾ ಅನ್ತಲಿಕ್ಖಮ್ಹಿ, ಸಾಧುಕಾರಂ ಪವತ್ತಯುಂ.

೫೬. ‘‘ಅಚ್ಛೇರಂ ಲೋಕೇ ಉಪ್ಪನ್ನಂ, ಬುದ್ಧಸೇಟ್ಠಸ್ಸ ವಾಹಸಾ;

ಸಬ್ಬೇ ಧಮ್ಮಂ ಸುಣಿಸ್ಸಾಮ, ಪುಪ್ಫಾನಂ ವಾಹಸಾ ಮಯಂ.

೫೭. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ವೀಥಿಯಞ್ಹಿ ಠಿತೋ ಸನ್ತೋ, ಇಮಾ ಗಾಥಾ ಅಭಾಸಥ.

೫೮. ‘‘‘ಯೋ ಸೋ ಬುದ್ಧಂ ಅಪೂಜೇಸಿ, ರತ್ತಪದ್ಮೇಹಿ [ರತ್ತಪದುಮೇಹಿ (ಸೀ. ಸ್ಯಾ.)] ಮಾಣವೋ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೫೯. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ತಿಂಸಕಪ್ಪಾನಿ [ತಿಂಸಕ್ಖತ್ತುಞ್ಚ (ಸ್ಯಾ.)] ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.

೬೦. ‘‘‘ಮಹಾವಿತ್ಥಾರಿಕಂ ನಾಮ, ಬ್ಯಮ್ಹಂ ಹೇಸ್ಸತಿ ತಾವದೇ;

ತಿಯೋಜನಸತುಬ್ಬಿದ್ಧಂ, ದಿಯಡ್ಢಸತವಿತ್ಥತಂ.

೬೧. ‘‘‘ಚತ್ತಾರಿಸತಸಹಸ್ಸಾನಿ, ನಿಯ್ಯೂಹಾ ಚ ಸುಮಾಪಿತಾ;

ಕೂಟಾಗಾರವರೂಪೇತಾ, ಮಹಾಸಯನಮಣ್ಡಿತಾ.

೬೨. ‘‘‘ಕೋಟಿಸತಸಹಸ್ಸಿಯೋ, ಪರಿವಾರೇಸ್ಸನ್ತಿ ಅಚ್ಛರಾ;

ಕುಸಲಾ ನಚ್ಚಗೀತಸ್ಸ, ವಾದಿತೇಪಿ ಪದಕ್ಖಿಣಾ.

೬೩. ‘‘‘ಏತಾದಿಸೇ ಬ್ಯಮ್ಹವರೇ, ನಾರೀಗಣಸಮಾಕುಲೇ;

ವಸ್ಸಿಸ್ಸತಿ ಪುಪ್ಫವಸ್ಸೋ, ದಿಬ್ಬೋ [ಪದ (ಕ.)] ಲೋಹಿತಕೋ ಸದಾ.

೬೪. ‘‘‘ಭಿತ್ತಿಖೀಲೇ ನಾಗದನ್ತೇ, ದ್ವಾರಬಾಹಾಯ ತೋರಣೇ;

ಚಕ್ಕಮತ್ತಾ ಲೋಹಿತಕಾ, ಓಲಮ್ಬಿಸ್ಸನ್ತಿ ತಾವದೇ.

೬೫. ‘‘‘ಪತ್ತೇನ ಪತ್ತಸಞ್ಛನ್ನೇ, ಅನ್ತೋಬ್ಯಮ್ಹವರೇ ಇಮಂ;

ಅತ್ಥರಿತ್ವಾ ಪಾರುಪಿತ್ವಾ, ತುವಟ್ಟಿಸ್ಸನ್ತಿ ತಾವದೇ.

೬೬. ‘‘‘ಭವನಂ ಪರಿವಾರೇತ್ವಾ, ಸಮನ್ತಾ ಸತಯೋಜನೇ;

ತೇಪಿ ಪದ್ಮಾ [ತೇ ವಿಸುದ್ಧಾ (ಸೀ. ಸ್ಯಾ.)] ಲೋಹಿತಕಾ, ದಿಬ್ಬಗನ್ಧಂ ಪವಾಯರೇ.

೬೭. ‘‘‘ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೬೮. ‘‘‘ಸಮ್ಪತ್ತಿಯೋ ದುವೇ ಭುತ್ವಾ, ಅನೀತಿ ಅನುಪದ್ದವೋ;

ಸಮ್ಪತ್ತೇ ಪರಿಯೋಸಾನೇ, ನಿಬ್ಬಾನಂ ಪಾಪುಣಿಸ್ಸತಿ’ [ಫಸ್ಸಯಿಸ್ಸತಿ (ಸೀ.), ಪಸ್ಸಯಿಸ್ಸತಿ (ಕ.)].

೬೯. ‘‘ಸುದಿಟ್ಠೋ ವತ ಮೇ ಬುದ್ಧೋ, ವಾಣಿಜ್ಜಂ ಸುಪಯೋಜಿತಂ;

ಪದ್ಮಾನಿ ತೀಣಿ ಪೂಜೇತ್ವಾ, ಅನುಭೋಸಿಂ ತಿಸಮ್ಪದಾ [ಅನುಭೂಯನ್ತಿ ಸಮ್ಪದಾ (ಕ.)].

೭೦. ‘‘ಅಜ್ಜ ಮೇ ಧಮ್ಮಪ್ಪತ್ತಸ್ಸ, ವಿಪ್ಪಮುತ್ತಸ್ಸ ಸಬ್ಬಸೋ;

ಸುಪುಪ್ಫಿತಂ ಲೋಹಿತಕಂ, ಧಾರಯಿಸ್ಸತಿ ಮತ್ಥಕೇ.

೭೧. ‘‘ಮಮ ಕಮ್ಮಂ ಕಥೇನ್ತಸ್ಸ, ಪದುಮುತ್ತರಸತ್ಥುನೋ;

ಸತಪಾಣಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.

೭೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ತಿಪದುಮಾನಿದಂ ಫಲಂ.

೭೩. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೭೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಪದುಮಿಯತ್ಥೇರಸ್ಸಾಪದಾನಂ ದಸಮಂ.

ನಾಗಸಮಾಲವಗ್ಗೋ ಅಟ್ಠಮೋ.