೬. ಸುಚಿನ್ತಿತತ್ಥೇರಅಪದಾನಂ

೩೬. ‘‘ಗಿರಿದುಗ್ಗಚರೋ ಆಸಿಂ, ಅಭಿಜಾತೋವ ಕೇಸರೀ;

ಮಿಗಸಙ್ಘಂ ವಧಿತ್ವಾನ, ಜೀವಾಮಿ ಪಬ್ಬತನ್ತರೇ.

೩೭. ‘‘ಅತ್ಥದಸ್ಸೀ ತು ಭಗವಾ, ಸಬ್ಬಞ್ಞೂ ವದತಂ ವರೋ;

ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಪಬ್ಬತುತ್ತಮಂ.

೩೮. ‘‘ಪಸದಞ್ಚ ಮಿಗಂ ಹನ್ತ್ವಾ, ಭಕ್ಖಿತುಂ ಸಮುಪಾಗಮಿಂ;

ಭಗವಾ ತಮ್ಹಿ ಸಮಯೇ, ಭಿಕ್ಖಮಾನೋ [ಸಿಕ್ಖಾಚಾರೋ (ಸ್ಯಾ.)] ಉಪಾಗಮಿ.

೩೯. ‘‘ವರಮಂಸಾನಿ ಪಗ್ಗಯ್ಹ, ಅದಾಸಿಂ ತಸ್ಸ ಸತ್ಥುನೋ;

ಅನುಮೋದಿ ಮಹಾವೀರೋ, ನಿಬ್ಬಾಪೇನ್ತೋ ಮಮಂ ತದಾ.

೪೦. ‘‘ತೇನ ಚಿತ್ತಪ್ಪಸಾದೇನ, ಗಿರಿದುಗ್ಗಂ ಪವಿಸಿಂ ಅಹಂ;

ಪೀತಿಂ ಉಪ್ಪಾದಯಿತ್ವಾನ, ತತ್ಥ ಕಾಲಙ್ಕತೋ ಅಹಂ.

೪೧. ‘‘ಏತೇನ ಮಂಸದಾನೇನ, ಚಿತ್ತಸ್ಸ ಪಣಿಧೀಹಿ ಚ;

ಪನ್ನರಸೇ ಕಪ್ಪಸತೇ, ದೇವಲೋಕೇ ರಮಿಂ ಅಹಂ.

೪೨. ‘‘ಅವಸೇಸೇಸು ಕಪ್ಪೇಸು, ಕುಸಲಂ ಚಿನ್ತಿತಂ [ನಿಚಿತಂ (ಸೀ.), ಕರಿತಂ (ಸ್ಯಾ.)] ಮಯಾ;

ತೇನೇವ ಮಂಸದಾನೇನ, ಬುದ್ಧಾನುಸ್ಸರಣೇನ ಚ.

೪೩. ‘‘ಅಟ್ಠತ್ತಿಂಸಮ್ಹಿ ಕಪ್ಪಮ್ಹಿ, ಅಟ್ಠ ದೀಘಾಯುನಾಮಕಾ;

ಸಟ್ಠಿಮ್ಹಿತೋ ಕಪ್ಪಸತೇ, ದುವೇ ವರುಣನಾಮಕಾ [ಸರಣನಾಮಕಾ (ಸ್ಯಾ.)].

೪೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಚಿನ್ತಿತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಚಿನ್ತಿತತ್ಥೇರಸ್ಸಾಪದಾನಂ ಛಟ್ಠಂ.