೫. ಭಿಸದಾಯಕತ್ಥೇರಅಪದಾನಂ

೨೯. ‘‘ವೇಸ್ಸಭೂ ನಾಮ ನಾಮೇನ, ಇಸೀನಂ ತತಿಯೋ ಅಹು;

ಕಾನನಂ ವನಮೋಗಯ್ಹ, ವಿಹಾಸಿ ಪುರಿಸುತ್ತಮೋ.

೩೦. ‘‘ಭಿಸಮುಳಾಲಂ ಗಣ್ಹಿತ್ವಾ, ಅಗಮಂ ಬುದ್ಧಸನ್ತಿಕಂ;

ತಞ್ಚ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.

೩೧. ‘‘ಕರೇನ ಚ ಪರಾಮಟ್ಠೋ, ವೇಸ್ಸಭೂವರಬುದ್ಧಿನಾ;

ಸುಖಾಹಂ ನಾಭಿಜಾನಾಮಿ, ಸಮಂ ತೇನ ಕುತೋತ್ತರಿಂ.

೩೨. ‘‘ಚರಿಮೋ ವತ್ತತೇ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಹತ್ಥಿನಾಗೇನ ಸನ್ತೇನ, ಕುಸಲಂ ರೋಪಿತಂ ಮಯಾ [ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ (ಸ್ಯಾ.)].

೩೩. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಭಿಸದಾನಸ್ಸಿದಂ ಫಲಂ.

೩೪. ‘‘ಸಮೋಧಾನಾ ಚ ರಾಜಾನೋ, ಸೋಳಸ ಮನುಜಾಧಿಪಾ;

ಕಪ್ಪಮ್ಹಿ ಚುದ್ದಸೇ [ತೇರಸೇ (ಸೀ. ಸ್ಯಾ.)] ಆಸುಂ, ಚಕ್ಕವತ್ತೀ ಮಹಬ್ಬಲಾ.

೩೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಭಿಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಭಿಸದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.