೪. ಪರಪ್ಪಸಾದಕತ್ಥೇರಅಪದಾನಂ

೨೦. ‘‘ಉಸಭಂ ಪವರಂ ವೀರಂ, ಮಹೇಸಿಂ ವಿಜಿತಾವಿನಂ;

ಸುವಣ್ಣವಣ್ಣಂ ಸಮ್ಬುದ್ಧಂ, ಕೋ ದಿಸ್ವಾ ನಪ್ಪಸೀದತಿ.

೨೧. ‘‘ಹಿಮವಾವಾಪರಿಮೇಯ್ಯೋ, ಸಾಗರೋವ ದುರುತ್ತರೋ;

ತಥೇವ ಝಾನಂ ಬುದ್ಧಸ್ಸ, ಕೋ ದಿಸ್ವಾ ನಪ್ಪಸೀದತಿ.

೨೨. ‘‘ವಸುಧಾ ಯಥಾಪ್ಪಮೇಯ್ಯಾ, ಚಿತ್ತಾ ವನವಟಂಸಕಾ;

ತಥೇವ ಸೀಲಂ ಬುದ್ಧಸ್ಸ, ಕೋ ದಿಸ್ವಾ ನಪ್ಪಸೀದತಿ.

೨೩. ‘‘ಅನಿಲಞ್ಜಸಾಸಙ್ಖುಬ್ಭೋ [ಅನಿಲಜೋವ ಅಸಙ್ಖೋಭೋ (ಸೀ.)], ಯಥಾಕಾಸೋ ಅಸಙ್ಖಿಯೋ;

ತಥೇವ ಞಾಣಂ ಬುದ್ಧಸ್ಸ, ಕೋ ದಿಸ್ವಾ ನಪ್ಪಸೀದತಿ.

೨೪. ‘‘ಇಮಾಹಿ ಚತುಗಾಥಾಹಿ, ಬ್ರಾಹ್ಮಣೋ ಸೇನಸವ್ಹಯೋ;

ಬುದ್ಧಸೇಟ್ಠಂ ಥವಿತ್ವಾನ, ಸಿದ್ಧತ್ಥಂ ಅಪರಾಜಿತಂ.

೨೫. ‘‘ಚತುನ್ನವುತಿಕಪ್ಪಾನಿ, ದುಗ್ಗತಿಂ ನುಪಪಜ್ಜಥ;

ಸುಗತಿಂ ಸುಖಸಮ್ಪತ್ತಿಂ [ಸುಗತೀಸು ಸುಸುಮ್ಪತ್ತಿಂ (ಸೀ. ಸ್ಯಾ.)], ಅನುಭೋಸಿಮನಪ್ಪಕಂ.

೨೬. ‘‘ಚತುನ್ನವುತಿತೋ ಕಪ್ಪೇ, ಥವಿತ್ವಾ ಲೋಕನಾಯಕಂ;

ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ [ಥೋಮನಸ್ಸ (ಸ್ಯಾ.)] ಇದಂ ಫಲಂ.

೨೭. ‘‘ಚಾತುದ್ದಸಮ್ಹಿ ಕಪ್ಪಮ್ಹಿ, ಚತುರೋ ಆಸುಮುಗ್ಗತಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪರಪ್ಪಸಾದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪರಪ್ಪಸಾದಕತ್ಥೇರಸ್ಸಾಪದಾನಂ ಚತುತ್ಥಂ.