೧೦. ಅಸನಬೋಧಿಯತ್ಥೇರಅಪದಾನಂ

೭೮. ‘‘ಜಾತಿಯಾ ಸತ್ತವಸ್ಸೋಹಂ, ಅದ್ದಸಂ ಲೋಕನಾಯಕಂ;

ಪಸನ್ನಚಿತ್ತೋ ಸುಮನೋ, ಉಪಗಚ್ಛಿಂ ನರುತ್ತಮಂ.

೭೯. ‘‘ತಿಸ್ಸಸ್ಸಾಹಂ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಹಟ್ಠೋ ಹಟ್ಠೇನ ಚಿತ್ತೇನ, ರೋಪಯಿಂ ಬೋಧಿಮುತ್ತಮಂ.

೮೦. ‘‘ಅಸನೋ ನಾಮಧೇಯ್ಯೇನ, ಧರಣೀರುಹಪಾದಪೋ;

ಪಞ್ಚವಸ್ಸೇ ಪರಿಚರಿಂ, ಅಸನಂ ಬೋಧಿಮುತ್ತಮಂ.

೮೧. ‘‘ಪುಪ್ಫಿತಂ ಪಾದಪಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;

ಸಕಂ ಕಮ್ಮಂ ಪಕಿತ್ತೇನ್ತೋ, ಬುದ್ಧಸೇಟ್ಠಂ ಉಪಾಗಮಿಂ.

೮೨. ‘‘ತಿಸ್ಸೋ ತದಾ ಸೋ ಸಮ್ಬುದ್ಧೋ, ಸಯಮ್ಭೂ ಅಗ್ಗಪುಗ್ಗಲೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೮೩. ‘‘‘ಯೇನಾಯಂ ರೋಪಿತಾ ಬೋಧಿ, ಬುದ್ಧಪೂಜಾ ಚ ಸಕ್ಕತಾ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೮೪. ‘‘‘ತಿಂಸಕಪ್ಪಾನಿ ದೇವೇಸು, ದೇವರಜ್ಜಂ ಕರಿಸ್ಸತಿ;

ಚತುಸಟ್ಠಿ ಚಕ್ಖತ್ತುಂ ಸೋ, ಚಕ್ಕವತ್ತೀ ಭವಿಸ್ಸತಿ.

೮೫. ‘‘‘ತುಸಿತಾ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ದ್ವೇ ಸಮ್ಪತ್ತೀ ಅನುಭೋತ್ವಾ, ಮನುಸ್ಸತ್ತೇ ರಮಿಸ್ಸತಿ.

೮೬. ‘‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.

೮೭. ‘‘ವಿವೇಕಮನುಯುತ್ತೋಹಂ, ಉಪಸನ್ತೋ ನಿರೂಪಧಿ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೮೮. ‘‘ದ್ವೇನವುತೇ ಇತೋ ಕಪ್ಪೇ, ಬೋಧಿಂ ರೋಪೇಸಹಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬೋಧಿರೋಪಸ್ಸಿದಂ ಫಲಂ.

೮೯. ‘‘ಚತುಸತ್ತತಿತೋ ಕಪ್ಪೇ, ದಣ್ಡಸೇನೋತಿ ವಿಸ್ಸುತೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ತದಾ ಅಹುಂ.

೯೦. ‘‘ತೇಸತ್ತತಿಮ್ಹಿತೋ ಕಪ್ಪೇ, ಸತ್ತಾಹೇಸುಂ ಮಹೀಪತೀ;

ಸಮನ್ತನೇಮಿನಾಮೇನ, ರಾಜಾನೋ ಚಕ್ಕವತ್ತಿನೋ.

೯೧. ‘‘ಪಣ್ಣವೀಸತಿತೋ ಕಪ್ಪೇ, ಪುಣ್ಣಕೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೯೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಸನಬೋಧಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಸನಬೋಧಿಯತ್ಥೇರಸ್ಸಾಪದಾನಂ ದಸಮಂ.

ಬೀಜನಿವಗ್ಗೋ ಛಟ್ಠೋ.