೭. ಅಭಯತ್ಥೇರಅಪದಾನಂ

೧೯೫. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೧೯೬. ‘‘ಸರಣಗಮನೇ ಕಿಞ್ಚಿ, ನಿವೇಸೇಸಿ ತಥಾಗತೋ;

ಕಿಞ್ಚಿ ಸೀಲೇ ನಿವೇಸೇಸಿ, ದಸಕಮ್ಮಪಥುತ್ತಮೇ.

೧೯೭. ‘‘ದೇತಿ ಕಸ್ಸಚಿ ಸೋ ವೀರೋ, ಸಾಮಞ್ಞಫಲಮುತ್ತಮಂ;

ಸಮಾಪತ್ತೀ ತಥಾ ಅಟ್ಠ, ತಿಸ್ಸೋ ವಿಜ್ಜಾ ಪವಚ್ಛತಿ.

೧೯೮. ‘‘ಛಳಭಿಞ್ಞಾಸು ಯೋಜೇಸಿ, ಕಿಞ್ಚಿ ಸತ್ತಂ ನರುತ್ತಮೋ;

ದೇತಿ ಕಸ್ಸಚಿ ನಾಥೋ ಸೋ, ಚತಸ್ಸೋ ಪಟಿಸಮ್ಭಿದಾ.

೧೯೯. ‘‘ಬೋಧನೇಯ್ಯಂ ಪಜಂ ದಿಸ್ವಾ, ಅಸಙ್ಖೇಯ್ಯಮ್ಪಿ ಯೋಜನಂ [ಅಸಙ್ಖೇಯ್ಯೇಪಿ ಯೋಜನೇ ಸೀ. ಸ್ಯಾ. ಪೀ.)];

ಖಣೇನ ಉಪಗನ್ತ್ವಾನ, ವಿನೇತಿ ನರಸಾರಥಿ.

೨೦೦. ‘‘ತದಾಹಂ ಹಂಸವತಿಯಂ, ಅಹೋಸಿಂ ಬ್ರಾಹ್ಮಣತ್ರಜೋ;

ಪಾರಗೂ ಸಬ್ಬವೇದಾನಂ, ವೇಯ್ಯಾಕರಣಸಮ್ಮತೋ.

೨೦೧. ‘‘ನಿರುತ್ತಿಯಾ ಚ ಕುಸಲೋ, ನಿಘಣ್ಡುಮ್ಹಿ ವಿಸಾರದೋ;

ಪದಕೋ ಕೇಟುಭವಿದೂ, ಛನ್ದೋವಿಚಿತಿಕೋವಿದೋ.

೨೦೨. ‘‘ಜಙ್ಘಾವಿಹಾರಂ ವಿಚರಂ, ಹಂಸಾರಾಮಮುಪೇಚ್ಚಹಂ;

ಅದ್ದಸಂ ವರದಂ [ವದತಂ (ಸೀ. ಪೀ.), ಪವರಂ (ಸ್ಯಾ.)] ಸೇಟ್ಠಂ, ಮಹಾಜನಪುರಕ್ಖತಂ.

೨೦೩. ‘‘ದೇಸೇನ್ತಂ ವಿರಜಂ ಧಮ್ಮಂ, ಪಚ್ಚನೀಕಮತೀ ಅಹಂ;

ಉಪೇತ್ವಾ ತಸ್ಸ ಕಲ್ಯಾಣಂ, ಸುತ್ವಾನ ವಿಮಲಂ ಅಹಂ [ವಾಕ್ಯಾನಿ, ಸುತ್ವಾನ ವಿಮಲಾನಹಂ (ಸೀ. ಸ್ಯಾ. ಪೀ.)].

೨೦೪. ‘‘ಬ್ಯಾಹತಂ ಪುನರುತ್ತಂ ವಾ, ಅಪತ್ಥಂ ವಾ ನಿರತ್ಥಕಂ;

ನಾದ್ದಸಂ ತಸ್ಸ ಮುನಿನೋ, ತತೋ ಪಬ್ಬಜಿತೋ ಅಹಂ.

೨೦೫. ‘‘ನಚಿರೇನೇವ ಕಾಲೇನ, ಸಬ್ಬಸತ್ತವಿಸಾರದೋ;

ನಿಪುಣೋ ಬುದ್ಧವಚನೇ, ಅಹೋಸಿಂ ಗುಣಿಸಮ್ಮತೋ.

೨೦೬. ‘‘ತದಾ ಚತಸ್ಸೋ ಗಾಥಾಯೋ, ಗನ್ಥಯಿತ್ವಾ ಸುಬ್ಯಞ್ಜನಾ;

ಸನ್ಥವಿತ್ವಾ ತಿಲೋಕಗ್ಗಂ, ದೇಸಯಿಸ್ಸಂ ದಿನೇ ದಿನೇ.

೨೦೭. ‘‘ವಿರತ್ತೋಸಿ ಮಹಾವೀರೋ, ಸಂಸಾರೇ ಸಭಯೇ ವಸಂ;

ಕರುಣಾಯ ನ ನಿಬ್ಬಾಯಿ, ತತೋ ಕಾರುಣಿಕೋ ಮುನಿ.

೨೦೮. ‘‘ಪುಥುಜ್ಜನೋ ವಯೋ ಸನ್ತೋ, ನ ಕಿಲೇಸವಸೋ ಅಹು;

ಸಮ್ಪಜಾನೋ ಸತಿಯುತ್ತೋ, ತಸ್ಮಾ ಏಸೋ ಅಚಿನ್ತಿಯೋ.

೨೦೯. ‘‘ದುಬ್ಬಲಾನಿ ಕಿಲೇಸಾನಿ, ಯಸ್ಸಾಸಯಗತಾನಿ ಮೇ;

ಞಾಣಗ್ಗಿಪರಿದಡ್ಢಾನಿ, ನ ಖೀಯಿಂಸು ತಮಬ್ಭುತಂ.

೨೧೦. ‘‘ಯೋ ಸಬ್ಬಲೋಕಸ್ಸ ಗರು, ಲೋಕೋ [ಲೋಕೇ (ಸ್ಯಾ. ಕ.)] ಯಸ್ಸ ತಥಾ ಗರು;

ತಥಾಪಿ ಲೋಕಾಚರಿಯೋ, ಲೋಕೋ ತಸ್ಸಾನುವತ್ತಕೋ.

೨೧೧. ‘‘ಏವಮಾದೀಹಿ ಸಮ್ಬುದ್ಧಂ, ಕಿತ್ತಯಂ ಧಮ್ಮದೇಸನಂ;

ಯಾವಜೀವಂ ಕರಿತ್ವಾನ, ಗತೋ ಸಗ್ಗಂ ತತೋ ಚುತೋ.

೨೧೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;

ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.

೨೧೩. ‘‘ದೇವಲೋಕೇ ಮಹಾರಜ್ಜಂ, ಪಾದೇಸಿಂ ಕಞ್ಚನಗ್ಘಿಯಂ [ದಿಬ್ಬಾನುಭೋಜಹಂ ತದಾ (ಸ್ಯಾ.), ರಜ್ಜಂ ಪಾದೇಸಿ ಕಂಚಯಂ (ಸೀ.)];

ಚಕ್ಕವತ್ತೀ ಮಹಾರಜ್ಜಂ, ಬಹುಸೋನುಭವಿಂ ಅಹಂ.

೨೧೪. ‘‘ದುವೇ ಭವೇ ಪಜಾಯಾಮಿ, ದೇವತ್ತೇ ಅಥ ಮಾನುಸೇ;

ಅಞ್ಞಂ ಗತಿಂ ನ ಜಾನಾಮಿ, ಕಿತ್ತನಾಯ ಇದಂ ಫಲಂ.

೨೧೫. ‘‘ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಅಥ ಬ್ರಾಹ್ಮಣೇ;

ನೀಚೇ ಕುಲೇ ನ ಜಾಯಾಮಿ, ಕಿತ್ತನಾಯ ಇದಂ ಫಲಂ.

೨೧೬. ‘‘ಪಚ್ಛಿಮೇ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;

ರಞ್ಞೋಹಂ ಬಿಮ್ಬಿಸಾರಸ್ಸ, ಪುತ್ತೋ ನಾಮೇನ ಚಾಭಯೋ.

೨೧೭. ‘‘ಪಾಪಮಿತ್ತವಸಂ ಗನ್ತ್ವಾ, ನಿಗಣ್ಠೇನ ವಿಮೋಹಿತೋ;

ಪೇಸಿತೋ ನಾಟಪುತ್ತೇನ, ಬುದ್ಧಸೇಟ್ಠಮುಪೇಚ್ಚಹಂ.

೨೧೮. ‘‘ಪುಚ್ಛಿತ್ವಾ ನಿಪುಣಂ ಪಞ್ಹಂ, ಸುತ್ವಾ ಬ್ಯಾಕರಣುತ್ತಮಂ;

ಪಬ್ಬಜಿತ್ವಾನ ನಚಿರಂ, ಅರಹತ್ತಮಪಾಪುಣಿಂ.

೨೧೯. ‘‘ಕಿತ್ತಯಿತ್ವಾ ಜಿನವರಂ, ಕಿತ್ತಿತೋ ಹೋಮಿ ಸಬ್ಬದಾ;

ಸುಗನ್ಧದೇಹವದನೋ, ಆಸಿಂ ಸುಖಸಮಪ್ಪಿತೋ.

೨೨೦. ‘‘ತಿಕ್ಖಹಾಸಲಹುಪಞ್ಞೋ, ಮಹಾಪಞ್ಞೋ ತಥೇವಹಂ;

ವಿಚಿತ್ತಪಟಿಭಾನೋ ಚ, ತಸ್ಸ ಕಮ್ಮಸ್ಸ ವಾಹಸಾ.

೨೨೧. ‘‘ಅಭಿತ್ಥವಿತ್ವಾ ಪದುಮುತ್ತರಾಹಂ, ಪಸನ್ನಚಿತ್ತೋ ಅಸಮಂ ಸಯಮ್ಭುಂ;

ನ ಗಚ್ಛಿ ಕಪ್ಪಾನಿ ಅಪಾಯಭೂಮಿಂ, ಸತಂ ಸಹಸ್ಸಾನಿ ಬಲೇನ ತಸ್ಸ.

೨೨೨. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೨೩. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೨೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಭಯೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಅಭಯತ್ಥೇರಸ್ಸಾಪದಾನಂ ಸತ್ತಮಂ.