೮. ಲೋಮಸಕಙ್ಗಿಯತ್ಥೇರಅಪದಾನಂ

೨೨೫. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೨೨೬. ‘‘ತದಾಹಂ ಚನ್ದನೋ ಚೇವ, ಪಬ್ಬಜಿತ್ವಾನ ಸಾಸನೇ;

ಆಪಾಣಕೋಟಿಕಂ ಧಮ್ಮಂ, ಪೂರಯಿತ್ವಾನ ಸಾಸನೇ.

೨೨೭. ‘‘ತತೋ ಚುತಾ ಸನ್ತುಸಿತಂ, ಉಪಪನ್ನಾ ಉಭೋ ಮಯಂ;

ತತ್ಥ ದಿಬ್ಬೇಹಿ ನಚ್ಚೇಹಿ, ಗೀತೇಹಿ ವಾದಿತೇಹಿ ಚ.

೨೨೮. ‘‘ರೂಪಾದಿದಸಹಙ್ಗೇಹಿ, ಅಭಿಭೋತ್ವಾನ ಸೇಸಕೇ;

ಯಾವತಾಯುಂ ವಸಿತ್ವಾನ, ಅನುಭೋತ್ವಾ ಮಹಾಸುಖಂ.

೨೨೯. ‘‘ತತೋ ಚವಿತ್ವಾ ತಿದಸಂ, ಚನ್ದನೋ ಉಪಪಜ್ಜಥ;

ಅಹಂ ಕಪಿಲವತ್ಥುಸ್ಮಿಂ, ಅಜಾಯಿಂ ಸಾಕಿಯತ್ರಜೋ.

೨೩೦. ‘‘ಯದಾ ಉದಾಯಿತ್ಥೇರೇನ, ಅಜ್ಝಿಟ್ಠೋ ಲೋಕನಾಯಕೋ;

ಅನುಕಮ್ಪಿಯ ಸಕ್ಯಾನಂ, ಉಪೇಸಿ ಕಪಿಲವ್ಹಯಂ.

೨೩೧. ‘‘ತದಾತಿಮಾನಿನೋ ಸಕ್ಯಾ, ನ ಬುದ್ಧಸ್ಸ ಗುಣಞ್ಞುನೋ;

ಪಣಮನ್ತಿ ನ ಸಮ್ಬುದ್ಧಂ, ಜಾತಿಥದ್ಧಾ ಅನಾದರಾ.

೨೩೨. ‘‘ತೇಸಂ ಸಙ್ಕಪ್ಪಮಞ್ಞಾಯ, ಆಕಾಸೇ ಚಙ್ಕಮೀ ಜಿನೋ;

ಪಜ್ಜುನ್ನೋ ವಿಯ ವಸ್ಸಿತ್ಥ, ಪಜ್ಜಲಿತ್ಥ ಯಥಾ ಸಿಖೀ.

೨೩೩. ‘‘ದಸ್ಸೇತ್ವಾ ರೂಪಮತುಲಂ, ಪುನ ಅನ್ತರಧಾಯಥ;

ಏಕೋಪಿ ಹುತ್ವಾ ಬಹುಧಾ, ಅಹೋಸಿ ಪುನರೇಕಕೋ.

೨೩೪. ‘‘ಅನ್ಧಕಾರಂ ಪಕಾಸಞ್ಚ, ದಸ್ಸಯಿತ್ವಾ ಅನೇಕಧಾ;

ಪಾಟಿಹೇರಂ ಕರಿತ್ವಾನ, ವಿನಯೀ ಞಾತಕೇ ಮುನಿ.

೨೩೫. ‘‘ಚಾತುದ್ದೀಪೋ ಮಹಾಮೇಘೋ, ತಾವದೇವ ಪವಸ್ಸಥ;

ತದಾ ಹಿ ಜಾತಕಂ ಬುದ್ಧೋ, ವೇಸ್ಸನ್ತರಮದೇಸಯಿ.

೨೩೬. ‘‘ತದಾ ತೇ ಖತ್ತಿಯಾ ಸಬ್ಬೇ, ನಿಹನ್ತ್ವಾ ಜಾತಿಜಂ ಮದಂ;

ಉಪೇಸುಂ ಸರಣಂ ಬುದ್ಧಂ, ಆಹ ಸುದ್ಧೋದನೋ ತದಾ.

೨೩೭. ‘‘‘ಇದಂ ತತಿಯಂ ತವ ಭೂರಿಪಞ್ಞ, ಪಾದಾನಿ ವನ್ದಾಮಿ ಸಮನ್ತಚಕ್ಖು;

ಯದಾಭಿಜಾತೋ ಪಥವೀ ಪಕಮ್ಪಯೀ, ಯದಾ ಚ ತಂ ನಜ್ಜಹಿ ಜಮ್ಬುಛಾಯಾ’.

೨೩೮. ‘‘ತದಾ ಬುದ್ಧಾನುಭಾವಂ ತಂ, ದಿಸ್ವಾ ವಿಮ್ಹಿತಮಾನಸೋ;

ಪಬ್ಬಜಿತ್ವಾನ ತತ್ಥೇವ, ನಿವಸಿಂ ಮಾತುಪೂಜಕೋ.

೨೩೯. ‘‘ಚನ್ದನೋ ದೇವಪುತ್ತೋ ಮಂ, ಉಪಗನ್ತ್ವಾನುಪುಚ್ಛಥ;

ಭದ್ದೇಕರತ್ತಸ್ಸ ತದಾ, ಸಙ್ಖೇಪವಿತ್ಥಾರಂ ನಯಂ.

೨೪೦. ‘‘ಚೋದಿತೋಹಂ ತದಾ ತೇನ, ಉಪೇಚ್ಚ ನರನಾಯಕಂ;

ಭದ್ದೇಕರತ್ತಂ ಸುತ್ವಾನ, ಸಂವಿಗ್ಗೋ ವನಮಾಮಕೋ.

೨೪೧. ‘‘ತದಾ ಮಾತರಮಪುಚ್ಛಿಂ, ವನೇ ವಚ್ಛಾಮಿ ಏಕಕೋ;

ಸುಖುಮಾಲೋತಿ ಮೇ ಮಾತಾ, ವಾರಯೀ ತಂ [ತೇ (ಸ್ಯಾ. ಪೀ. ಕ.)] ತದಾ ವಚಂ.

೨೪೨. ‘‘ಕಾಸಂ [ದಬ್ಬಂ (ಸೀ. ಸ್ಯಾ. ಪೀ.)] ಕುಸಂ ಪೋಟಕಿಲಂ, ಉಸೀರಂ ಮುಞ್ಜಪಬ್ಬಜಂ [ಮುಞ್ಜಬಬ್ಬಜಂ (ಸೀ. ಪೀ.)];

ಉರಸಾ ಪನುದಿಸ್ಸಾಮಿ, ವಿವೇಕಮನುಬ್ರೂಹಯಂ.

೨೪೩. ‘‘ತದಾ ವನಂ ಪವಿಟ್ಠೋಹಂ, ಸರಿತ್ವಾ ಜಿನಸಾಸನಂ;

ಭದ್ದೇಕರತ್ತಓವಾದಂ, ಅರಹತ್ತಮಪಾಪುಣಿಂ.

೨೪೪. ‘‘‘ಅತೀತಂ ನಾನ್ವಾಗಮೇಯ್ಯ, ನಪ್ಪಟಿಕಙ್ಖೇ ಅನಾಗತಂ;

ಯದತೀತಂ ಪಹೀನಂ ತಂ, ಅಪ್ಪತ್ತಞ್ಚ ಅನಾಗತಂ.

೨೪೫. ‘‘‘ಪಚ್ಚುಪ್ಪನ್ನಞ್ಚ ಯೋ ಧಮ್ಮಂ, ತತ್ಥ ತತ್ಥ ವಿಪಸ್ಸತಿ;

ಅಸಂಹೀರಂ ಅಸಂಕುಪ್ಪಂ, ತಂ ವಿದ್ವಾ ಮನುಬ್ರೂಹಯೇ.

೨೪೬. ‘‘‘ಅಜ್ಜೇವ ಕಿಚ್ಚಮಾತಪ್ಪಂ, ಕೋ ಜಞ್ಞಾ ಮರಣಂ ಸುವೇ;

ನ ಹಿ ನೋ ಸಙ್ಗರಂ [ಸಙ್ಕರಂ (ಕ.)] ತೇನ, ಮಹಾಸೇನೇನ ಮಚ್ಚುನಾ.

೨೪೭. ‘‘‘ಏವಂವಿಹಾರಿಂ ಆತಾಪಿಂ, ಅಹೋರತ್ತಮತನ್ದಿತಂ;

ತಂ ವೇ ಭದ್ದೇಕರತ್ತೋತಿ, ಸನ್ತೋ ಆಚಿಕ್ಖತೇ ಮುನಿ’.

೨೪೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೪೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೫೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಲೋಮಸಕಙ್ಗಿಯೋ [ಲೋಮಸಙ್ಖಿಯೋ (ಸ್ಯಾ. ಕ.)] ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಲೋಮಸಕಙ್ಗಿಯತ್ಥೇರಸ್ಸಾಪದಾನಂ ಅಟ್ಠಮಂ.