೬. ಕಾಳುದಾಯಿತ್ಥೇರಅಪದಾನಂ

೧೬೫. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೧೬೬. ‘‘ನಾಯಕಾನಂ ವರೋ ಸತ್ಥಾ, ಗುಣಾಗುಣವಿದೂ ಜಿನೋ;

ಕತಞ್ಞೂ ಕತವೇದೀ ಚ, ತಿತ್ಥೇ ಯೋಜೇತಿ ಪಾಣಿನೇ [ಪಾಣಿನೋ (ಸೀ. ಸ್ಯಾ ಪೀ.)].

೧೬೭. ‘‘ಸಬ್ಬಞ್ಞುತೇನ ಞಾಣೇನ, ತುಲಯಿತ್ವಾ ದಯಾಸಯೋ;

ದೇಸೇತಿ ಪವರಂ ಧಮ್ಮಂ, ಅನನ್ತಗುಣಸಞ್ಚಯೋ.

೧೬೮. ‘‘ಸ ಕದಾಚಿ ಮಹಾವೀರೋ, ಅನನ್ತಜಿನಸಂಸರಿ [ಅನನ್ತಜನಸಂಸದಿ (ಸೀ.), ಅನನ್ತಜನಸಂಸುಧಿ (ಸ್ಯಾ.), ಅನನ್ತಜನಸಂಸರೀ (ಪೀ.)];

ದೇಸೇತಿ ಮಧುರಂ ಧಮ್ಮಂ, ಚತುಸಚ್ಚೂಪಸಞ್ಹಿತಂ.

೧೬೯. ‘‘ಸುತ್ವಾನ ತಂ ಧಮ್ಮವರಂ, ಆದಿಮಜ್ಝನ್ತಸೋಭಣಂ;

ಪಾಣಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.

೧೭೦. ‘‘ನಿನ್ನಾದಿತಾ ತದಾ ಭೂಮಿ, ಗಜ್ಜಿಂಸು ಚ ಪಯೋಧರಾ;

ಸಾಧುಕಾರಂ ಪವತ್ತಿಂಸು, ದೇವಬ್ರಹ್ಮನರಾಸುರಾ.

೧೭೧. ‘‘‘ಅಹೋ ಕಾರುಣಿಕೋ ಸತ್ಥಾ, ಅಹೋ ಸದ್ಧಮ್ಮದೇಸನಾ;

ಅಹೋ ಭವಸಮುದ್ದಮ್ಹಿ, ನಿಮುಗ್ಗೇ ಉದ್ಧರೀ ಜಿನೋ’.

೧೭೨. ‘‘ಏವಂ ಪವೇದಜಾತೇಸು, ಸನರಾಮರಬ್ರಹ್ಮಸು;

ಕುಲಪ್ಪಸಾದಕಾನಗ್ಗಂ, ಸಾವಕಂ ವಣ್ಣಯೀ ಜಿನೋ.

೧೭೩. ‘‘ತದಾಹಂ ಹಂಸವತಿಯಂ, ಜಾತೋಮಚ್ಚಕುಲೇ ಅಹುಂ;

ಪಾಸಾದಿಕೋ ದಸ್ಸನಿಯೋ, ಪಹೂತಧನಧಞ್ಞವಾ.

೧೭೪. ‘‘ಹಂಸಾರಾಮಮುಪೇಚ್ಚಾಹಂ, ವನ್ದಿತ್ವಾ ತಂ ತಥಾಗತಂ;

ಸುಣಿತ್ವಾ ಮಧುರಂ ಧಮ್ಮಂ, ಕಾರಂ ಕತ್ವಾ ಚ ತಾದಿನೋ.

೧೭೫. ‘‘ನಿಪಚ್ಚ ಪಾದಮೂಲೇಹಂ, ಇಮಂ ವಚನಮಬ್ರವಿಂ;

‘ಕುಲಪ್ಪಸಾದಕಾನಗ್ಗೋ, ಯೋ ತಯಾ ಸನ್ಥುತೋ [ಯೋ ತವ ಸಾಸನೇ (ಸ್ಯಾ.)] ಮುನೇ.

೧೭೬. ‘‘‘ತಾದಿಸೋ ಹೋಮಹಂ ವೀರ [ತಾದಿಸೋಹಂ ಮಹಾವೀರ (ಸ್ಯಾ. ಕ.)], ಬುದ್ಧಸೇಟ್ಠಸ್ಸ ಸಾಸನೇ’;

ತದಾ ಮಹಾಕಾರುಣಿಕೋ, ಸಿಞ್ಚನ್ತೋ ವಾ ಮತೇನ ಮಂ.

೧೭೭. ‘‘ಆಹ ಮಂ ‘ಪುತ್ತ ಉತ್ತಿಟ್ಠ, ಲಚ್ಛಸೇ ತಂ ಮನೋರಥಂ;

ಕಥಂ ನಾಮ ಜಿನೇ ಕಾರಂ, ಕತ್ವಾನ ವಿಫಲೋ ಸಿಯಾ.

೧೭೮. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೭೯. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಉದಾಯಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೧೮೦. ‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತೋ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.

೧೮೧. ‘‘ತೇನ ಕಮ್ಮವಿಪಾಕೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೮೨. ‘‘ಪಚ್ಛಿಮೇ ಚ ಭವೇ ದಾನಿ, ರಮ್ಮೇ ಕಪಿಲವತ್ಥವೇ;

ಜಾತೋ ಮಹಾಮಚ್ಚಕುಲೇ, ಸುದ್ಧೋದನಮಹೀಪತೇ [ಸುದ್ಧೋದನೋ ಮಹೀಪತಿ (ಸ್ಯಾ.)].

೧೮೩. ‘‘ತದಾ ಅಜಾಯಿ ಸಿದ್ಧತ್ಥೋ, ರಮ್ಮೇ ಲುಮ್ಬಿನಿಕಾನನೇ;

ಹಿತಾಯ ಸಬ್ಬಲೋಕಸ್ಸ, ಸುಖಾಯ ಚ ನರಾಸಭೋ.

೧೮೪. ‘‘ತದಹೇವ ಅಹಂ ಜಾತೋ, ಸಹ ತೇನೇವ ವಡ್ಢಿತೋ;

ಪಿಯೋ ಸಹಾಯೋ ದಯಿತೋ, ವಿಯತ್ತೋ ನೀತಿಕೋವಿದೋ.

೧೮೫. ‘‘ಏಕೂನತಿಂಸೋ ವಯಸಾ, ನಿಕ್ಖಮಿತ್ವಾ ಅಗಾರತೋ [ನಿಕ್ಖನ್ತೋ ಪಬ್ಬಜಿತ್ಥಸೋ (ಸೀ. ಸ್ಯಾ.)];

ಛಬ್ಬಸ್ಸಂ ವೀತಿನಾಮೇತ್ವಾ, ಆಸಿ ಬುದ್ಧೋ ವಿನಾಯಕೋ.

೧೮೬. ‘‘ಜೇತ್ವಾ ಸಸೇನಕಂ ಮಾರಂ, ಖೇಪಯಿತ್ವಾನ ಆಸವೇ;

ಭವಣ್ಣವಂ ತರಿತ್ವಾನ, ಬುದ್ಧೋ ಆಸಿ ಸದೇವಕೇ.

೧೮೭. ‘‘ಇಸಿವ್ಹಯಂ ಗಮಿತ್ವಾನ [ಇಸಿವ್ಹಯಂ ಪತನಂ ಗನ್ತ್ವಾ (ಸ್ಯಾ.)], ವಿನೇತ್ವಾ ಪಞ್ಚವಗ್ಗಿಯೇ;

ತತೋ ವಿನೇಸಿ ಭಗವಾ, ಗನ್ತ್ವಾ ಗನ್ತ್ವಾ ತಹಿಂ ತಹಿಂ.

೧೮೮. ‘‘ವೇನೇಯ್ಯೇ ವಿನಯನ್ತೋ ಸೋ, ಸಙ್ಗಣ್ಹನ್ತೋ ಸದೇವಕಂ;

ಉಪೇಚ್ಚ ಮಗಧೇ ಗಿರಿಂ [ಮಾಗದಗಿರಿಂ (ಸೀ.), ಮಙ್ಗಲಾಗಿರಿಂ (ಪೀ.)], ವಿಹರಿತ್ಥ ತದಾ ಜಿನೋ.

೧೮೯. ‘‘ತದಾ ಸುದ್ಧೋದನೇನಾಹಂ, ಭೂಮಿಪಾಲೇನ ಪೇಸಿತೋ;

ಗನ್ತ್ವಾ ದಿಸ್ವಾ ದಸಬಲಂ, ಪಬ್ಬಜಿತ್ವಾರಹಾ ಅಹುಂ.

೧೯೦. ‘‘ತದಾ ಮಹೇಸಿಂ ಯಾಚಿತ್ವಾ, ಪಾಪಯಿಂ ಕಪಿಲವ್ಹಯಂ;

ತತೋ ಪುರಾಹಂ ಗನ್ತ್ವಾನ, ಪಸಾದೇಸಿಂ ಮಹಾಕುಲಂ.

೧೯೧. ‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಮಂ ಮಹಾಪರಿಸಾಯ ಸೋ [ಮಮಾಹ ಪುರಿಸಾಸಭೋ (ಸ್ಯಾ. ಪೀ.)];

ಕುಲಪ್ಪಸಾದಕಾನಗ್ಗಂ, ಪಞ್ಞಾಪೇಸಿ ವಿನಾಯಕೋ.

೧೯೨. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೯೩. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೯೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕಾಳುದಾಯಿಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಕಾಳುದಾಯಿತ್ಥೇರಸ್ಸಾಪದಾನಂ ಛಟ್ಠಂ.