೫. ನನ್ದಕತ್ಥೇರಅಪದಾನಂ

೧೪೩. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೧೪೪. ‘‘ಹಿತಾಯ ಸಬ್ಬಸತ್ತಾನಂ, ಸುಖಾಯ ವದತಂ ವರೋ;

ಅತ್ಥಾಯ ಪುರಿಸಾಜಞ್ಞೋ, ಪಟಿಪನ್ನೋ ಸದೇವಕೇ.

೧೪೫. ‘‘ಯಸಗ್ಗಪತ್ತೋ ಸಿರಿಮಾ, ಕಿತ್ತಿವಣ್ಣಭತೋ [ಕಿತ್ತಿವಣ್ಣ ಭಟೋ (ಸ್ಯಾ. ಕ.)] ಜಿನೋ;

ಪೂಜಿತೋ ಸಬ್ಬಲೋಕಸ್ಸ, ದಿಸಾ ಸಬ್ಬಾಸು ವಿಸ್ಸುತೋ.

೧೪೬. ‘‘ಉತ್ತಿಣ್ಣವಿಚಿಕಿಚ್ಛೋ ಸೋ, ವೀತಿವತ್ತಕಥಂಕಥೋ;

ಪರಿಪುಣ್ಣಮನಸಙ್ಕಪ್ಪೋ, ಪತ್ತೋ ಸಮ್ಬೋಧಿಮುತ್ತಮಂ.

೧೪೭. ‘‘ಅನುಪ್ಪನ್ನಸ್ಸ ಮಗ್ಗಸ್ಸ, ಉಪ್ಪಾದೇತಾ ನರುತ್ತಮೋ;

ಅನಕ್ಖಾತಞ್ಚ ಅಕ್ಖಾಸಿ, ಅಸಞ್ಜಾತಞ್ಚ ಸಞ್ಜನೀ.

೧೪೮. ‘‘ಮಗ್ಗಞ್ಞೂ ಮಗ್ಗವಿದೂ [ಸೋ ಮಗ್ಗವಿದೂ (ಸೀ. ಪೀ.)] ಚ, ಮಗ್ಗಕ್ಖಾಯೀ ನರಾಸಭೋ;

ಮಗ್ಗಸ್ಸ ಕುಸಲೋ ಸತ್ಥಾ, ಸಾರಥೀನಂ ವರುತ್ತಮೋ [ನರುತ್ತಮೋ (ಸ್ಯಾ.)].

೧೪೯. ‘‘ತದಾ ಮಹಾಕಾರುಣಿಕೋ, ಧಮ್ಮಂ ದೇಸೇಸಿ ನಾಯಕೋ;

ನಿಮುಗ್ಗೇ ಕಾಮಪಙ್ಕಮ್ಹಿ [ಮೋಹಪಙ್ಕಮ್ಹಿ (ಸೀ. ಸ್ಯಾ.), ಮೋಹಮಗ್ಗಮ್ಹಿ (ಪೀ.)], ಸಮುದ್ಧರತಿ ಪಾಣಿನೇ.

೧೫೦. ‘‘ಭಿಕ್ಖುನೀನಂ ಓವದನೇ, ಸಾವಕಂ ಸೇಟ್ಠಸಮ್ಮತಂ;

ವಣ್ಣಯಂ ಏತದಗ್ಗಮ್ಹಿ, ಪಞ್ಞಪೇಸಿ ಮಹಾಮುನಿ.

೧೫೧. ‘‘ತಂ ಸುತ್ವಾಹಂ ಪಮುದಿತೋ, ನಿಮನ್ತೇತ್ವಾ ತಥಾಗತಂ;

ಭೋಜಯಿತ್ವಾ ಸಸಙ್ಘಂ ತಂ, ಪತ್ಥಯಿಂ ಠಾನಮುತ್ತಮಂ.

೧೫೨. ‘‘ತದಾ ಪಮುದಿತೋ ನಾಥೋ, ಮಂ ಅವೋಚ ಮಹಾಇಸಿ;

‘ಸುಖೀ ಭವಸ್ಸು ದೀಘಾವು [ದೀಘಾಯು (ಸೀ. ಸ್ಯಾ.)], ಲಚ್ಛಸೇ ತಂ ಮನೋರಥಂ.

೧೫೩. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೫೪. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ನನ್ದಕೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೧೫೫. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.

೧೫೬. ‘‘ಪಚ್ಛಿಮೇ ಚ ಭವೇ ದಾನಿ, ಜಾತೋ ಸೇಟ್ಠಿಕುಲೇ ಅಹಂ;

ಸಾವತ್ಥಿಯಂ ಪುರೇ ವರೇ, ಇದ್ಧೇ ಫೀತೇ ಮಹದ್ಧನೇ.

೧೫೭. ‘‘ಪುರಪ್ಪವೇಸೇ ಸುಗತಂ, ದಿಸ್ವಾ ವಿಮ್ಹಿತಮಾನಸೋ;

ಜೇತಾರಾಮಪಟಿಗ್ಗಾಹೇ, ಪಬ್ಬಜಿಂ ಅನಗಾರಿಯಂ.

೧೫೮. ‘‘ನಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ;

ತತೋಹಂ ತಿಣ್ಣಸಂಸಾರೋ, ಸಾಸಿತೋ ಸಬ್ಬದಸ್ಸಿನಾ.

೧೫೯. ‘‘ಭಿಕ್ಖುನೀನಂ ಧಮ್ಮಕಥಂ, ಪಟಿಪುಚ್ಛಾಕರಿಂ ಅಹಂ;

ಸಾಸಿತಾ ತಾ ಮಯಾ ಸಬ್ಬಾ, ಅಭವಿಂಸು ಅನಾಸವಾ.

೧೬೦. ‘‘ಸತಾನಿ ಪಞ್ಚನೂನಾನಿ, ತದಾ ತುಟ್ಠೋ ಮಹಾಹಿತೋ;

ಭಿಕ್ಖುನೀನಂ ಓವದತಂ, ಅಗ್ಗಟ್ಠಾನೇ ಠಪೇಸಿ ಮಂ.

೧೬೧. ‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;

ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ ಮಮ.

೧೬೨. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೬೩. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೬೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನನ್ದಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ನನ್ದಕತ್ಥೇರಸ್ಸಾಪದಾನಂ ಪಞ್ಚಮಂ.