೪. ವಙ್ಗೀಸತ್ಥೇರಅಪದಾನಂ

೯೬. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೯೭. ‘‘ಯಥಾಪಿ ಸಾಗರೇ ಊಮಿ, ಗಗನೇ ವಿಯ ತಾರಕಾ;

ಏವಂ ಪಾವಚನಂ ತಸ್ಸ, ಅರಹನ್ತೇಹಿ ಚಿತ್ತಿತಂ.

೯೮. ‘‘ಸದೇವಾಸುರನಾಗೇಹಿ, ಮನುಜೇಹಿ ಪುರಕ್ಖತೋ;

ಸಮಣಬ್ರಾಹ್ಮಣಾಕಿಣ್ಣೇ, ಜನಮಜ್ಝೇ ಜಿನುತ್ತಮೋ.

೯೯. ‘‘ಪಭಾಹಿ ಅನುರಞ್ಜನ್ತೋ, ಲೋಕೇ [ಲೋಕಂ (ಸೀ.)] ಲೋಕನ್ತಗೂ ಜಿನೋ;

ವಚನೇನ ವಿಬೋಧೇನ್ತೋ, ವೇನೇಯ್ಯಪದುಮಾನಿ ಸೋ.

೧೦೦. ‘‘ವೇಸಾರಜ್ಜೇಹಿ ಸಮ್ಪನ್ನೋ, ಚತೂಹಿ ಪುರಿಸುತ್ತಮೋ;

ಪಹೀನಭಯಸಾರಜ್ಜೋ, ಖೇಮಪ್ಪತ್ತೋ ವಿಸಾರದೋ.

೧೦೧. ‘‘ಆಸಭಂ ಪವರಂ ಠಾನಂ, ಬುದ್ಧಭೂಮಿಞ್ಚ ಕೇವಲಂ;

ಪಟಿಜಾನಾತಿ ಲೋಕಗ್ಗೋ, ನತ್ಥಿ ಸಞ್ಚೋದಕೋ ಕ್ವಚಿ.

೧೦೨. ‘‘ಸೀಹನಾದಮಸಮ್ಭೀತಂ, ನದತೋ ತಸ್ಸ ತಾದಿನೋ;

ದೇವೋ ನರೋ ವಾ ಬ್ರಹ್ಮಾ ವಾ, ಪಟಿವತ್ತಾ ನ ವಿಜ್ಜತಿ.

೧೦೩. ‘‘ದೇಸೇನ್ತೋ ಪವರಂ ಧಮ್ಮಂ, ಸನ್ತಾರೇನ್ತೋ ಸದೇವಕಂ;

ಧಮ್ಮಚಕ್ಕಂ ಪವತ್ತೇತಿ, ಪರಿಸಾಸು ವಿಸಾರದೋ.

೧೦೪. ‘‘ಪಟಿಭಾನವತಂ ಅಗ್ಗಂ, ಸಾವಕಂ ಸಾಧುಸಮ್ಮತಂ;

ಗುಣಂ ಬಹುಂ ಪಕಿತ್ತೇತ್ವಾ, ಏತದಗ್ಗೇ ಠಪೇಸಿ ತಂ.

೧೦೫. ‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ಸಾಧುಸಮ್ಮತೋ;

ಸಬ್ಬವೇದವಿದೂ ಜಾತೋ, ವಾಗೀಸೋ ವಾದಿಸೂದನೋ.

೧೦೬. ‘‘ಉಪೇಚ್ಚ ತಂ ಮಹಾವೀರಂ, ಸುತ್ವಾಹಂ ಧಮ್ಮದೇಸನಂ;

ಪೀತಿವರಂ ಪಟಿಲಭಿಂ, ಸಾವಕಸ್ಸ ಗುಣೇ ರತೋ.

೧೦೭. ‘‘ನಿಮನ್ತೇತ್ವಾವ ಸುಗತಂ, ಸಸಙ್ಘಂ ಲೋಕನನ್ದನಂ;

ಸತ್ತಾಹಂ ಭೋಜಯಿತ್ವಾಹಂ, ದುಸ್ಸೇಹಚ್ಛಾದಯಿಂ ತದಾ.

೧೦೮. ‘‘ನಿಪಚ್ಚ ಸಿರಸಾ ಪಾದೇ, ಕತೋಕಾಸೋ ಕತಞ್ಜಲೀ;

ಏಕಮನ್ತಂ ಠಿತೋ ಹಟ್ಠೋ, ಸನ್ಥವಿಂ ಜಿನಮುತ್ತಮಂ.

೧೦೯. ‘‘‘ನಮೋ ತೇ ವಾದಿಮದ್ದನ [ವಾದಿಸದ್ದುಲ (ಸೀ. ಪೀ.), ವಾದಿಸೂದನ (ಸ್ಯಾ.)], ನಮೋ ತೇ ಇಸಿಸತ್ತಮ [ಪುರಿಸುತ್ತಮ (ಸೀ. ಪೀ.)];

ನಮೋ ತೇ ಸಬ್ಬಲೋಕಗ್ಗ, ನಮೋ ತೇ ಅಭಯಙ್ಕರ.

೧೧೦. ‘‘‘ನಮೋ ತೇ ಮಾರಮಥನ [ಮಾರಮಸನ (ಅಟ್ಠ.)], ನಮೋ ತೇ ದಿಟ್ಠಿಸೂದನ;

ನಮೋ ತೇ ಸನ್ತಿಸುಖದ, ನಮೋ ತೇ ಸರಣಙ್ಕರ.

೧೧೧. ‘‘‘ಅನಾಥಾನಂ ಭವಂ ನಾಥೋ, ಭೀತಾನಂ ಅಭಯಪ್ಪದೋ;

ವಿಸ್ಸಾಮಭೂಮಿ [ವಿಸ್ಸಾಸಂ ಭೂಮಿ (ಸ್ಯಾ.), ವಿಸ್ಸಾನಭೂಮಿ (ಪೀ.)] ಸನ್ತಾನಂ, ಸರಣಂ ಸರಣೇಸಿನಂ’.

೧೧೨. ‘‘ಏವಮಾದೀಹಿ ಸಮ್ಬುದ್ಧಂ, ಸನ್ಥವಿತ್ವಾ ಮಹಾಗುಣಂ;

ಅವೋಚಂ ವಾದಿಸೂದಸ್ಸ [ವಾದಿಸೂರಸ್ಸ (ಸೀ. ಸ್ಯಾ. ಪೀ.)], ಗತಿಂ ಪಪ್ಪೋಮಿ ಭಿಕ್ಖುನೋ.

೧೧೩. ‘‘ತದಾ ಅವೋಚ ಭಗವಾ, ಅನನ್ತಪಟಿಭಾನವಾ;

‘ಯೋ ಸೋ ಬುದ್ಧಂ ಅಭೋಜೇಸಿ, ಸತ್ತಾಹಂ ಸಹಸಾವಕಂ.

೧೧೪. ‘‘‘ಗುಣಞ್ಚ ಮೇ ಪಕಿತ್ತೇಸಿ, ಪಸನ್ನೋ ಸೇಹಿ ಪಾಣಿಭಿ;

ಏಸೋ ಪತ್ಥಯತೇ ಠಾನಂ, ವಾದಿಸೂದಸ್ಸ ಭಿಕ್ಖುನೋ.

೧೧೫. ‘‘‘ಅನಾಗತಮ್ಹಿ ಅದ್ಧಾನೇ, ಲಚ್ಛಸೇ ತಂ ಮನೋರಥಂ;

ದೇವಮಾನುಸಸಮ್ಪತ್ತಿಂ, ಅನುಭೋತ್ವಾ ಅನಪ್ಪಕಂ.

೧೧೬. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೧೭. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ವಙ್ಗೀಸೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೧೧೮. ‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;

ಪಚ್ಚಯೇಹಿ ಉಪಟ್ಠಾಸಿಂ, ಮೇತ್ತಚಿತ್ತೋ ತಥಾಗತಂ.

೧೧೯. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತುಸಿತಂ [ತಾವತಿಂಸಂ (ಸ್ಯಾ.)] ಅಗಮಾಸಹಂ.

೧೨೦. ‘‘ಪಚ್ಛಿಮೇ ಚ ಭವೇ ದಾನಿ, ಜಾತೋ ವಿಪ್ಪಕುಲೇ [ಪರಿಬ್ಬಾಜಕುಲೇ (ಸೀ. ಸ್ಯಾ. ಪೀ.)] ಅಹಂ;

ಪಚ್ಚಾಜಾತೋ [ಸಮ್ಪತ್ತೋ ಚ (ಕ.)] ಯದಾ ಆಸಿಂ, ಜಾತಿಯಾ ಸತ್ತವಸ್ಸಿಕೋ.

೧೨೧. ‘‘ಸಬ್ಬವೇದವಿದೂ ಜಾತೋ, ವಾದಸತ್ಥವಿಸಾರದೋ;

ವಾದಿಸ್ಸರೋ [ವಗ್ಗುಸ್ಸರೋ (ಸ್ಯಾ. ಪೀ.)] ಚಿತ್ತಕಥೀ, ಪರವಾದಪ್ಪಮದ್ದನೋ.

೧೨೨. ‘‘ವಙ್ಗೇ ಜಾತೋತಿ ವಙ್ಗೀಸೋ, ವಚನೇ ಇಸ್ಸರೋತಿ ವಾ;

ವಙ್ಗೀಸೋ ಇತಿ ಮೇ ನಾಮಂ, ಅಭವೀ ಲೋಕಸಮ್ಮತಂ.

೧೨೩. ‘‘ಯದಾಹಂ ವಿಞ್ಞುತಂ ಪತ್ತೋ, ಠಿತೋ ಪಠಮಯೋಬ್ಬನೇ;

ತದಾ ರಾಜಗಹೇ ರಮ್ಮೇ, ಸಾರಿಪುತ್ತಮಹದ್ದಸಂ [ಮಥದ್ದಸಂ (ಸೀ. ಪೀ.), ಚ ಅದ್ದಸಂ (ಸ್ಯಾ.)].

ಪಞ್ಚವೀಸತಿಮಂ ಭಾಣವಾರಂ.

೧೨೪. ‘‘ಪಿಣ್ಡಾಯ ವಿಚರನ್ತಂ ತಂ, ಪತ್ತಪಾಣಿಂ ಸುಸಂವುತಂ;

ಅಲೋಲಕ್ಖಿಂ ಮಿತಭಾಣಿಂ, ಯುಗಮತ್ತಂ ನಿದಕ್ಖಿತಂ [ನಿರಿಕ್ಖತಂ (ಸೀ. ಪೀ.), ಉದಿಕ್ಖತಂ (ಸ್ಯಾ.)].

೧೨೫. ‘‘ತಂ ದಿಸ್ವಾ ವಿಮ್ಹಿತೋ ಹುತ್ವಾ, ಅವೋಚಂ ಮಮನುಚ್ಛವಂ [ಮನನುಚ್ಛವಂ (ಸೀ. ಸ್ಯಾ.)];

ಕಣಿಕಾರಂವ ನಿಚಿತಂ [ಕಣಿಕಾರಪರಿಚಿತಂ (ಪೀ.), ಖಣಿಕಂ ಠಾನರಚಿತಂ (ಸೀ.)], ಚಿತ್ತಂ ಗಾಥಾಪದಂ ಅಹಂ.

೧೨೬. ‘‘ಆಚಿಕ್ಖಿ ಸೋ ಮೇ ಸತ್ಥಾರಂ, ಸಮ್ಬುದ್ಧಂ ಲೋಕನಾಯಕಂ;

ತದಾ ಸೋ ಪಣ್ಡಿತೋ ವೀರೋ, ಉತ್ತರಿಂ [ಉತ್ತರಂ (ಸೀ. ಪೀ.)] ಸಮವೋಚ ಮೇ.

೧೨೭. ‘‘ವಿರಾಗಸಂಹಿತಂ ವಾಕ್ಯಂ, ಕತ್ವಾ ದುದ್ದಸಮುತ್ತಮಂ;

ವಿಚಿತ್ತಪಟಿಭಾನೇಹಿ, ತೋಸಿತೋ ತೇನ ತಾದಿನಾ.

೧೨೮. ‘‘ನಿಪಚ್ಚ ಸಿರಸಾ ಪಾದೇ, ‘ಪಬ್ಬಾಜೇಹೀ’ತಿ ಮಂ ಬ್ರವಿ;

ತತೋ ಮಂ ಸ ಮಹಾಪಞ್ಞೋ, ಬುದ್ಧಸೇಟ್ಠಮುಪಾನಯಿ.

೧೨೯. ‘‘ನಿಪಚ್ಚ ಸಿರಸಾ ಪಾದೇ, ನಿಸೀದಿಂ ಸತ್ಥು ಸನ್ತಿಕೇ;

ಮಮಾಹ ವದತಂ ಸೇಟ್ಠೋ, ಕಚ್ಚಿ ವಙ್ಗೀಸ ಜಾನಾಸಿ [ಸಚ್ಚಂ ವಙ್ಗೀಸ ಕಚ್ಚಿ ತೇ (ಸ್ಯಾ.)].

೧೩೦. ‘‘ಕಿಞ್ಚಿ ಸಿಪ್ಪನ್ತಿ ತಸ್ಸಾಹಂ, ‘ಜಾನಾಮೀ’ತಿ ಚ ಅಬ್ರವಿಂ;

ಮತಸೀಸಂ ವನಚ್ಛುದ್ಧಂ, ಅಪಿ ಬಾರಸವಸ್ಸಿಕಂ;

ತವ ವಿಜ್ಜಾವಿಸೇಸೇನ, ಸಚೇ ಸಕ್ಕೋಸಿ ವಾಚಯ [ಭಾಸಯ (ಸೀ. ಪೀ.)].

೧೩೧. ‘‘ಆಮೋತಿ ಮೇ ಪಟಿಞ್ಞಾತೇ, ತೀಣಿ ಸೀಸಾನಿ ದಸ್ಸಯಿ;

ನಿರಯನರದೇವೇಸು, ಉಪಪನ್ನೇ ಅವಾಚಯಿಂ.

೧೩೨. ‘‘ತದಾ ಖೀಣಾಸವಸ್ಸೇವ [ಪಚ್ಚೇಕಬುದ್ಧಸ್ಸ (ಸೀ. ಪೀ.)], ಸೀಸಂ ದಸ್ಸೇಸಿ ನಾಯಕೋ;

ತತೋಹಂ ವಿಹತಾರಬ್ಭೋ, ಪಬ್ಬಜ್ಜಂ ಸಮಯಾಚಿಸಂ.

೧೩೩. ‘‘ಪಬ್ಬಜಿತ್ವಾನ ಸುಗತಂ, ಸನ್ಥವಾಮಿ ತಹಿಂ ತಹಿಂ;

ತತೋ ಮಂ ಕಬ್ಬವಿತ್ತೋಸಿ [ಕವಿಚಿತ್ತೋತಿ (ಸ್ಯಾ. ಪೀ.)], ಉಜ್ಝಾಯನ್ತಿಹ ಭಿಕ್ಖವೋ.

೧೩೪. ‘‘ತತೋ ವೀಮಂಸನತ್ಥಂ ಮೇ, ಆಹ ಬುದ್ಧೋ ವಿನಾಯಕೋ;

ತಕ್ಕಿಕಾ ಪನಿಮಾ ಗಾಥಾ, ಠಾನಸೋ ಪಟಿಭನ್ತಿ ತಂ.

೧೩೫. ‘‘ನ ಕಬ್ಬವಿತ್ತೋಹಂ ವೀರ, ಠಾನಸೋ ಪಟಿಭನ್ತಿ ಮಂ;

ತೇನ ಹಿ ದಾನಿ ವಙ್ಗೀಸ, ಠಾನಸೋ ಸನ್ಥವಾಹಿ ಮಂ.

೧೩೬. ‘‘ತದಾಹಂ ಸನ್ಥವಿಂ ವೀರಂ, ಗಾಥಾಹಿ ಇಸಿಸತ್ತಮಂ;

ಠಾನಸೋ ಮೇ ತದಾ ತುಟ್ಠೋ, ಜಿನೋ ಅಗ್ಗೇ ಠಪೇಸಿ ಮಂ.

೧೩೭. ‘‘ಪಟಿಭಾನೇನ ಚಿತ್ತೇನ, ಅಞ್ಞೇಸಮತಿಮಞ್ಞಹಂ;

ಪೇಸಲೇ ತೇನ ಸಂವಿಗ್ಗೋ, ಅರಹತ್ತಮಪಾಪುಣಿಂ.

೧೩೮. ‘‘‘ಪಟಿಭಾನವತಂ ಅಗ್ಗೋ, ಅಞ್ಞೋ ಕೋಚಿ ನ ವಿಜ್ಜತಿ;

ಯಥಾಯಂ ಭಿಕ್ಖು ವಙ್ಗೀಸೋ, ಏವಂ ಧಾರೇಥ ಭಿಕ್ಖವೋ’.

೧೩೯. ‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;

ಸುಮುತ್ತೋ ಸರವೇಗೋವ ಕಿಲೇಸೇ ಝಾಪಯಿಂ ಮಮ.

೧೪೦. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೪೧. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ವಙ್ಗೀಸೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ವಙ್ಗೀಸತ್ಥೇರಸ್ಸಾಪದಾನಂ ಚತುತ್ಥಂ.