೩. ಸೀವಲಿತ್ಥೇರಅಪದಾನಂ

೫೪. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೫೫. ‘‘ಸೀಲಂ ತಸ್ಸ ಅಸಙ್ಖೇಯ್ಯಂ, ಸಮಾಧಿ ವಜಿರೂಪಮೋ;

ಅಸಙ್ಖೇಯ್ಯಂ ಞಾಣವರಂ, ವಿಮುತ್ತಿ ಚ ಅನೋಪಮಾ.

೫೬. ‘‘ಮನುಜಾಮರನಾಗಾನಂ, ಬ್ರಹ್ಮಾನಞ್ಚ ಸಮಾಗಮೇ;

ಸಮಣಬ್ರಾಹ್ಮಣಾಕಿಣ್ಣೇ, ಧಮ್ಮಂ ದೇಸೇಸಿ ನಾಯಕೋ.

೫೭. ‘‘ಸಸಾವಕಂ ಮಹಾಲಾಭಿಂ, ಪುಞ್ಞವನ್ತಂ ಜುತಿನ್ಧರಂ;

ಠಪೇಸಿ ಏತದಗ್ಗಮ್ಹಿ, ಪರಿಸಾಸು ವಿಸಾರದೋ.

೫೮. ‘‘ತದಾಹಂ ಖತ್ತಿಯೋ ಆಸಿಂ, ನಗರೇ ಹಂಸಸವ್ಹಯೇ;

ಸುತ್ವಾ ಜಿನಸ್ಸ ತಂ ವಾಕ್ಯಂ, ಸಾವಕಸ್ಸ ಗುಣಂ ಬಹುಂ.

೫೯. ‘‘ನಿಮನ್ತಯಿತ್ವಾ ಸತ್ತಾಹಂ, ಭೋಜಯಿತ್ವಾ ಸಸಾವಕಂ;

ಮಹಾದಾನಂ ದದಿತ್ವಾನ, ತಂ ಠಾನಮಭಿಪತ್ಥಯಿಂ.

೬೦. ‘‘ತದಾ ಮಂ ವಿನತಂ ಪಾದೇ, ದಿಸ್ವಾನ ಪುರಿಸಾಸಭೋ;

ಸರೇನ ಮಹತಾ ವೀರೋ [ಸುಸ್ಸರೇನ ಮಹಾವೀರೋ (ಸೀ. ಪೀ.)], ಇದಂ ವಚನಮಬ್ರವಿ.

೬೧. ‘‘‘ತತೋ ಜಿನಸ್ಸ ವಚನಂ, ಸೋತುಕಾಮಾ ಮಹಾಜನಾ;

ದೇವದಾನವಗನ್ಧಬ್ಬಾ, ಬ್ರಹ್ಮಾನೋ ಚ ಮಹಿದ್ಧಿಕಾ’.

೬೨. ‘‘ಸಮಣಬ್ರಾಹ್ಮಣಾ ಚೇವ, ನಮಸ್ಸಿಂಸು ಕತಞ್ಜಲೀ;

‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ.

೬೩. ‘‘‘ಖತ್ತಿಯೇನ ಮಹಾದಾನಂ, ದಿನ್ನಂ ಸತ್ತಾಹಿಕಮ್ಪಿ ವೋ [ಸತ್ತಹಿಕಂ ಮಿ ವೋ (ಸೀ.), ಸತ್ತಹಿಕಾಧಿಕಂ (ಸ್ಯಾ.), ಸತ್ತಹಿಕಂ ವಿಭೋ (ಪೀ.)];

ಸೋತುಕಾಮಾ ಫಲಂ ತಸ್ಸ, ಬ್ಯಾಕರೋಹಿ ಮಹಾಮುನೇ’.

೬೪. ‘‘ತತೋ ಅವೋಚ ಭಗವಾ, ‘ಸುಣಾಥ ಮಮ ಭಾಸಿತಂ;

ಅಪ್ಪಮೇಯ್ಯಮ್ಹಿ ಬುದ್ಧಮ್ಹಿ, ಸಸಙ್ಘಮ್ಹಿ ಪತಿಟ್ಠಿತಾ [ಸಂಘಮ್ಹಿ ಸುಪ್ಪತಿಟ್ಠಿತಾ (ಸೀ. ಪೀ.)].

೬೫. ‘‘‘ದಕ್ಖಿಣಾ ತಾಯ [ದಕ್ಖಿಣಾದಾಯ (ಸ್ಯಾ. ಪೀ.)] ಕೋ ವತ್ತಾ, ಅಪ್ಪಮೇಯ್ಯಫಲಾ ಹಿ ಸಾ;

ಅಪಿ ಚೇ ಸ ಮಹಾಭೋಗೋ, ಠಾನಂ ಪತ್ಥೇತಿ ಉತ್ತಮಂ.

೬೬. ‘‘‘ಲಾಭೀ ವಿಪುಲಲಾಭಾನಂ, ಯಥಾ ಭಿಕ್ಖು ಸುದಸ್ಸನೋ;

ತಥಾಹಮ್ಪಿ ಭವೇಯ್ಯನ್ತಿ, ಲಚ್ಛಸೇ ತಂ ಅನಾಗತೇ.

೬೭. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೬೮. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸೀವಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೬೯. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.

೭೦. ‘‘ಏಕನವುತಿತೋ ಕಪ್ಪೇ, ವಿಪಸ್ಸೀ ಲೋಕನಾಯಕೋ;

ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮವಿಪಸ್ಸಕೋ.

೭೧. ‘‘ತದಾಹಂ ಬನ್ಧುಮತಿಯಂ, ಕುಲಸ್ಸಞ್ಞತರಸ್ಸ ಚ;

ದಯಿತೋ ಪಸ್ಸಿತೋ ಚೇವ, ಆಸಿಂ ಕಮ್ಮನ್ತವಾವಟೋ [ಕಮ್ಮನ್ತಬ್ಯಾವಟೋ (ಸೀ. ಸ್ಯಾ. ಕ.)].

೭೨. ‘‘ತದಾ ಅಞ್ಞತರೋ ಪೂಗೋ, ವಿಪಸ್ಸಿಸ್ಸ ಮಹೇಸಿನೋ;

ಪರಿವೇಸಂ ಅಕಾರಯಿ, ಮಹನ್ತಮತಿವಿಸ್ಸುತಂ.

೭೩. ‘‘ನಿಟ್ಠಿತೇ ಚ ಮಹಾದಾನೇ, ದದುಂ ಖಜ್ಜಕಸಞ್ಹಿತಂ;

ನವಂ ದಧಿಂ ಮಧುಞ್ಚೇವ, ವಿಚಿನಂ ನೇವ ಅದ್ದಸುಂ.

೭೪. ‘‘ತದಾಹಂ ತಂ ಗಹೇತ್ವಾನ, ನವಂ ದಧಿಂ ಮಧುಮ್ಪಿ ಚ;

ಕಮ್ಮಸ್ಸಾಮಿಘರಂ ಗಚ್ಛಿಂ, ತಮೇಸನ್ತಾ ಮಮದ್ದಸುಂ.

೭೫. ‘‘ಸಹಸ್ಸಮಪಿ ದತ್ವಾನ, ನಾಲಭಿಂಸು ಚ ತಂ ದ್ವಯಂ;

ತತೋಹಂ ಏವಂ ಚಿನ್ತೇಸಿಂ, ‘ನೇತಂ ಹೇಸ್ಸತಿ ಓರಕಂ.

೭೬. ‘‘‘ಯಥಾ ಇಮೇ ಜನಾ ಸಬ್ಬೇ, ಸಕ್ಕರೋನ್ತಿ ತಥಾಗತಂ;

ಅಹಮ್ಪಿ ಕಾರಂ ಕಸ್ಸಾಮಿ, ಸಸಙ್ಘೇ ಲೋಕನಾಯಕೇ’.

೭೭. ‘‘ತದಾಹಮೇವಂ ಚಿನ್ತೇತ್ವಾ, ದಧಿಂ ಮಧುಞ್ಚ ಏಕತೋ;

ಮದ್ದಿತ್ವಾ ಲೋಕನಾಥಸ್ಸ, ಸಸಙ್ಘಸ್ಸ ಅದಾಸಹಂ.

೭೮. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೭೯. ‘‘ಪುನಾಹಂ ಬಾರಾಣಸಿಯಂ, ರಾಜಾ ಹುತ್ವಾ ಮಹಾಯಸೋ;

ಸತ್ತುಕಸ್ಸ ತದಾ ದುಟ್ಠೋ, ದ್ವಾರರೋಧಮಕಾರಯಿಂ.

೮೦. ‘‘ತದಾ ತಪಸ್ಸಿನೋ ರುದ್ಧಾ, ಏಕಾಹಂ ರಕ್ಖಿತಾ ಅಹುಂ;

ತತೋ ತಸ್ಸ ವಿಪಾಕೇನ, ಪಾಪತಿಂ [ಪಾಪಿಟ್ಠಂ (ಸ್ಯಾ.) ಪಾಪತ್ತಂ (ಕ.)] ನಿರಯಂ ಭುಸಂ.

೮೧. ‘‘ಪಚ್ಛಿಮೇ ಚ ಭವೇ ದಾನಿ, ಜಾತೋಹಂ ಕೋಲಿಯೇ ಪುರೇ;

ಸುಪ್ಪವಾಸಾ ಚ ಮೇ ಮಾತಾ, ಮಹಾಲಿ ಲಿಚ್ಛವೀ ಪಿತಾ.

೮೨. ‘‘ಖತ್ತಿಯೇ ಪುಞ್ಞಕಮ್ಮೇನ, ದ್ವಾರರೋಧಸ್ಸ ವಾಹಸಾ;

ಸತ್ತ ವಸ್ಸಾನಿ ನಿವಸಿಂ, ಮಾತುಕುಚ್ಛಿಮ್ಹಿ ದುಕ್ಖಿತೋ.

೮೩. ‘‘ಸತ್ತಾಹಂ ದ್ವಾರಮೂಳ್ಹೋಹಂ, ಮಹಾದುಕ್ಖಸಮಪ್ಪಿತೋ;

ಮಾತಾ ಮೇ ಛನ್ದದಾನೇನ, ಏವಂ ಆಸಿ ಸುದುಕ್ಖಿತಾ.

೮೪. ‘‘ಸುವತ್ಥಿತೋಹಂ ನಿಕ್ಖನ್ತೋ, ಬುದ್ಧೇನ ಅನುಕಮ್ಪಿತೋ;

ನಿಕ್ಖನ್ತದಿವಸೇಯೇವ, ಪಬ್ಬಜಿಂ ಅನಗಾರಿಯಂ.

೮೫. ‘‘ಉಪಜ್ಝಾ ಸಾರಿಪುತ್ತೋ ಮೇ, ಮೋಗ್ಗಲ್ಲಾನೋ ಮಹಿದ್ಧಿಕೋ;

ಕೇಸೇ ಓರೋಪಯನ್ತೋ ಮೇ, ಅನುಸಾಸಿ ಮಹಾಮತಿ.

೮೬. ‘‘ಕೇಸೇಸು ಛಿಜ್ಜಮಾನೇಸು, ಅರಹತ್ತಮಪಾಪುಣಿಂ;

ದೇವಾ ನಾಗಾ ಮನುಸ್ಸಾ ಚ, ಪಚ್ಚಯೇ ಉಪನೇನ್ತಿ ಮೇ.

೮೭. ‘‘ಪದುಮುತ್ತರನಾಥಞ್ಚ, ವಿಪಸ್ಸಿಞ್ಚ ವಿನಾಯಕಂ;

ಯಂ ಪೂಜಯಿಂ ಪಮುದಿತೋ, ಪಚ್ಚಯೇಹಿ ವಿಸೇಸತೋ.

೮೮. ‘‘ತತೋ ತೇಸಂ ವಿಸೇಸೇನ, ಕಮ್ಮಾನಂ ವಿಪುಲುತ್ತಮಂ;

ಲಾಭಂ ಲಭಾಮಿ ಸಬ್ಬತ್ಥ, ವನೇ ಗಾಮೇ ಜಲೇ ಥಲೇ.

೮೯. ‘‘ರೇವತಂ ದಸ್ಸನತ್ಥಾಯ, ಯದಾ ಯಾತಿ ವಿನಾಯಕೋ;

ತಿಂಸಭಿಕ್ಖುಸಹಸ್ಸೇಹಿ, ಸಹ ಲೋಕಗ್ಗನಾಯಕೋ.

೯೦. ‘‘ತದಾ ದೇವೋಪಣೀತೇಹಿ, ಮಮತ್ಥಾಯ ಮಹಾಮತಿ;

ಪಚ್ಚಯೇಹಿ ಮಹಾವೀರೋ, ಸಸಙ್ಘೋ ಲೋಕನಾಯಕೋ.

೯೧. ‘‘ಉಪಟ್ಠಿತೋ ಮಯಾ ಬುದ್ಧೋ, ಗನ್ತ್ವಾ ರೇವತಮದ್ದಸ;

ತತೋ ಜೇತವನಂ ಗನ್ತ್ವಾ, ಏತದಗ್ಗೇ ಠಪೇಸಿ ಮಂ.

೯೨. ‘‘‘ಲಾಭೀನಂ ಸೀವಲಿ ಅಗ್ಗೋ, ಮಮ ಸಿಸ್ಸೇಸು ಭಿಕ್ಖವೋ’;

ಸಬ್ಬಲೋಕಹಿತೋ ಸತ್ಥಾ, ಕಿತ್ತಯೀ ಪರಿಸಾಸು ಮಂ.

೯೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೯೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೯೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೀವಲಿಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಸೀವಲಿತ್ಥೇರಸ್ಸಾಪದಾನಂ ತತಿಯಂ.