೯. ರಾಧತ್ಥೇರಅಪದಾನಂ

೨೯೬. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.

೨೯೭. ‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;

ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.

೨೯೮. ‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;

ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.

೨೯೯. ‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;

ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.

೩೦೦. ‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ;

ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.

೩೦೧. ‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೩೦೨. ‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ಮನ್ತಪಾರಗೂ;

ಉಪೇಚ್ಚ ತಂ ನರವರಂ, ಅಸ್ಸೋಸಿಂ ಧಮ್ಮದೇಸನಂ.

೩೦೩. ‘‘ಪಞ್ಞಪೇನ್ತಂ ಮಹಾವೀರಂ, ಪರಿಸಾಸು ವಿಸಾರದಂ;

ಪಟಿಭಾನೇಯ್ಯಕಂ ಭಿಕ್ಖುಂ, ಏತದಗ್ಗೇ ವಿನಾಯಕಂ.

೩೦೪. ‘‘ತದಾಹಂ ಕಾರಂ ಕತ್ವಾನ, ಸಸಙ್ಘೇ ಲೋಕನಾಯಕೇ;

ನಿಪಚ್ಚ ಸಿರಸಾ ಪಾದೇ, ತಂ ಠಾನಂ ಅಭಿಪತ್ಥಯಿಂ.

೩೦೫. ‘‘ತತೋ ಮಂ ಭಗವಾ ಆಹ, ಸಿಙ್ಗೀನಿಕ್ಖಸಮಪ್ಪಭೋ;

ಸರೇನ ರಜನೀಯೇನ, ಕಿಲೇಸಮಲಹಾರಿನಾ.

೩೦೬. ‘‘‘ಸುಖೀ ಭವಸ್ಸು ದೀಘಾಯು, ಸಿಜ್ಝತು ಪಣಿಧೀ ತವ;

ಸಸಙ್ಘೇ ಮೇ ಕತಂ ಕಾರಂ, ಅತೀವ ವಿಪುಲಂ ತಯಾ.

೩೦೭. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೩೦೮. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ರಾಧೋತಿ ನಾಮಧೇಯ್ಯೇನ, ಹೇಸ್ಸತಿ ಸತ್ಥು ಸಾವಕೋ.

೩೦೯. ‘‘‘ಸ ತೇ ಹೇತುಗುಣೇ ತುಟ್ಠೋ, ಸಕ್ಯಪುತ್ತೋ ನರಾಸಭೋ [ಇದಂ ಪಾದದ್ವಯಂ ಸ್ಯಾಮಮೂಲೇ ನತ್ಥೀ];

ಪಟಿಭಾನೇಯ್ಯಕಾನಗ್ಗಂ, ಪಞ್ಞಪೇಸ್ಸತಿ ನಾಯಕೋ’.

೩೧೦. ‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತೋ ಪರಿಚರಿಂ, ಸತೋ ಪಞ್ಞಾಸಮಾಹಿತೋ.

೩೧೧. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೩೧೨. ‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;

ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೩೧೩. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ಸಬ್ಬತ್ಥ ಸುಖಿತೋ ಆಸಿಂ, ತಸ್ಸ ಕಮ್ಮಸ್ಸ ವಾಹಸಾ.

೩೧೪. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಗಿರಿಬ್ಬಜಪುರುತ್ತಮೇ;

ಜಾತೋ ವಿಪ್ಪಕುಲೇ ನಿದ್ಧೇ, ವಿಕಲಚ್ಛಾದನಾಸನೇ.

೩೧೫. ‘‘ಕಟಚ್ಛುಭಿಕ್ಖಂ ಪಾದಾಸಿಂ, ಸಾರಿಪುತ್ತಸ್ಸ ತಾದಿನೋ;

ಯದಾ ಜಿಣ್ಣೋ ಚ ವುದ್ಧೋ ಚ, ತದಾರಾಮಮುಪಾಗಮಿಂ.

೩೧೬. ‘‘ಪಬ್ಬಜತಿ ನ ಮಂ ಕೋಚಿ [ಪಬ್ಬಾಜೇನ್ತಿ ನ ಮಂ ಕೇಚಿ (ಸೀ. ಸ್ಯಾ ಪೀ.)], ಜಿಣ್ಣದುಬ್ಬಲಥಾಮಕಂ;

ತೇನ ದೀನೋ ವಿವಣ್ಣಙ್ಗೋ [ವಿವಣ್ಣಕೋ (ಕ.)], ಸೋಕೋ ಚಾಸಿಂ ತದಾ ಅಹಂ.

೩೧೭. ‘‘ದಿಸ್ವಾ ಮಹಾಕಾರುಣಿಕೋ, ಮಮಮಾಹ [ಮಮಾಹ ಸೋ (ಸೀ.), ಮಮಾಹ ಚ (ಪೀ.)] ಮಹಾಮುನಿ;

‘ಕಿಮತ್ಥಂ ಪುತ್ತಸೋಕಟ್ಟೋ, ಬ್ರೂಹಿ ತೇ ಚಿತ್ತಜಂ ರುಜಂ’.

೩೧೮. ‘‘‘ಪಬ್ಬಜ್ಜಂ ನ ಲಭೇ ವೀರ, ಸ್ವಾಕ್ಖಾತೇ ತವ ಸಾಸನೇ;

ತೇನ ಸೋಕೇನ ದೀನೋಸ್ಮಿ, ಸರಣಂ ಹೋಹಿ ನಾಯಕ’.

೩೧೯. ‘‘ತದಾ ಭಿಕ್ಖೂ ಸಮಾನೇತ್ವಾ, ಅಪುಚ್ಛಿ ಮುನಿಸತ್ತಮೋ;

‘ಇಮಸ್ಸ ಅಧಿಕಾರಂ ಯೇ, ಸರನ್ತಿ ಬ್ಯಾಹರನ್ತು ತೇ’.

೩೨೦. ‘‘ಸಾರಿಪುತ್ತೋ ತದಾವೋಚ, ‘ಕಾರಮಸ್ಸ ಸರಾಮಹಂ;

ಕಟಚ್ಛುಭಿಕ್ಖಂ ದಾಪೇಸಿ, ಪಿಣ್ಡಾಯ ಚರತೋ ಮಮ’.

೩೨೧. ‘‘‘ಸಾಧು ಸಾಧು ಕತಞ್ಞೂಸಿ, ಸಾರಿಪುತ್ತ ಇಮಂ ತುವಂ;

ಪಬ್ಬಾಜೇಹಿ ದಿಜಂ ವುಡ್ಢಂ, ಹೇಸ್ಸತಾಜಾನಿಯೋ ಅಯಂ’.

೩೨೨. ‘‘ತತೋ ಅಲತ್ಥಂ ಪಬ್ಬಜ್ಜಂ, ಕಮ್ಮವಾಚೋಪಸಮ್ಪದಂ;

ನ ಚಿರೇನೇವ ಕಾಲೇನ, ಪಾಪುಣಿಂ ಆಸವಕ್ಖಯಂ.

೩೨೩. ‘‘ಸಕ್ಕಚ್ಚಂ ಮುನಿನೋ ವಾಕ್ಯಂ, ಸುಣಾಮಿ ಮುದಿತೋ ಯತೋ;

ಪಟಿಭಾನೇಯ್ಯಕಾನಗ್ಗಂ, ತತೋ ಮಂ ಠಪಯೀ ಜಿನೋ.

೩೨೪. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೩೨೫. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ರಾಧೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ರಾಧತ್ಥೇರಸ್ಸಾಪದಾನಂ ನವಮಂ.