೧೦. ಮೋಘರಾಜತ್ಥೇರಅಪದಾನಂ

೩೨೭. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.

೩೨೮. ‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;

ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.

೩೨೯. ‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;

ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.

೩೩೦. ‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;

ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.

೩೩೧. ‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ;

ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.

೩೩೨. ‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೩೩೩. ‘‘ತದಾಹಂ ಹಂಸವತಿಯಂ, ಕುಲೇ ಅಞ್ಞತರೇ ಅಹುಂ;

ಪರಕಮ್ಮಾಯನೇ ಯುತ್ತೋ, ನತ್ಥಿ ಮೇ ಕಿಞ್ಚಿ ಸಂಧನಂ.

೩೩೪. ‘‘ಪಟಿಕ್ಕಮನಸಾಲಾಯಂ, ವಸನ್ತೋ ಕತಭೂಮಿಯಂ;

ಅಗ್ಗಿಂ ಉಜ್ಜಾಲಯಿಂ ತತ್ಥ, ದಳ್ಹಂ ಕಣ್ಹಾಸಿ ಸಾ [ಕಣ್ಹಾ ಸಿಯಾ (ಸೀ. ಪೀ.), ಡಯ್ಹಕಣ್ಹಾ ಸಿಲಾ (ಸ್ಯಾ.)] ಹೀ.

೩೩೫. ‘‘ತದಾ ಪರಿಸತಿಂ ನಾಥೋ, ಚತುಸಚ್ಚಪಕಾಸಕೋ;

ಸಾವಕಂ ಸಮ್ಪಕಿತ್ತೇಸಿ, ಲೂಖಚೀವರಧಾರಕಂ.

೩೩೬. ‘‘ತಸ್ಸ ತಮ್ಹಿ ಗುಣೇ ತುಟ್ಠೋ, ಪಣಿಪಚ್ಚ [ಪತಿಪಜ್ಜ (ಸ್ಯಾ.)] ತಥಾಗತಂ;

ಲೂಖಚೀವರಧಾರಗ್ಗಂ, ಪತ್ಥಯಿಂ ಠಾನಮುತ್ತಮಂ.

೩೩೭. ‘‘ತದಾ ಅವೋಚ ಭಗವಾ, ಸಾವಕೇ ಪದುಮುತ್ತರೋ;

‘ಪಸ್ಸಥೇತಂ ಪುರಿಸಕಂ, ಕುಚೇಲಂ ತನುದೇಹಕಂ.

೩೩೮. ‘‘‘ಪೀತಿಪ್ಪಸನ್ನವದನಂ, ಸದ್ಧಾಧನಸಮನ್ವಿತಂ [ಸದ್ಧಾಸ್ನೇಹಸಮನ್ವತಂ (ಕ.)];

ಉದಗ್ಗತನುಜಂ ಹಟ್ಠಂ, ಅಚಲಂ ಸಾಲಪಿಣ್ಡಿತಂ.

೩೩೯. ‘‘‘ಏಸೋ ಪತ್ಥೇತಿ ತಂ ಠಾನಂ, ಸಚ್ಚಸೇನಸ್ಸ ಭಿಕ್ಖುನೋ;

ಲೂಖಚೀವರಧಾರಿಸ್ಸ, ತಸ್ಸ ವಣ್ಣಸಿತಾಸಯೋ [ವಣ್ಣಗತಾಸಯೋ (ಸೀ. ಸ್ಯಾ. ಪೀ.)].

೩೪೦. ‘‘ತಂ ಸುತ್ವಾ ಮುದಿತೋ ಹುತ್ವಾ, ನಿಪಚ್ಚ ಸಿರಸಾ ಜಿನಂ;

ಯಾವಜೀವಂ ಸುಭಂ ಕಮ್ಮಂ, ಕರಿತ್ವಾ ಜಿನಸಾಸನೇ.

೩೪೧. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.

೩೪೨. ‘‘ಪಟಿಕ್ಕಮನಸಾಲಾಯಂ, ಭೂಮಿದಾಹಕಕಮ್ಮುನಾ;

ಸಮಸಹಸ್ಸಂ ನಿರಯೇ, ಅದಯ್ಹಿಂ ವೇದನಾಟ್ಟಿತೋ.

೩೪೩. ‘‘ತೇನ ಕಮ್ಮಾವಸೇಸೇನ, ಪಞ್ಚ ಜಾತಿಸತಾನಿಹಂ;

ಮನುಸ್ಸೋ ಕುಲಜೋ ಹುತ್ವಾ, ಜಾತಿಯಾ ಲಕ್ಖಣಙ್ಕಿತೋ.

೩೪೪. ‘‘ಪಞ್ಚ ಜಾತಿಸತಾನೇವ, ಕುಟ್ಠರೋಗಸಮಪ್ಪಿತೋ;

ಮಹಾದುಕ್ಖಂ ಅನುಭವಿಂ, ತಸ್ಸ ಕಮ್ಮಸ್ಸ ವಾಹಸಾ.

೩೪೫. ‘‘ಇಮಸ್ಮಿಂ ಭದ್ದಕೇ ಕಪ್ಪೇ, ಉಪರಿಟ್ಠಂ ಯಸಸ್ಸಿನಂ;

ಪಿಣ್ಡಪಾತೇನ ತಪ್ಪೇಸಿಂ, ಪಸನ್ನಮಾನಸೋ ಅಹಂ.

೩೪೬. ‘‘ತೇನ ಕಮ್ಮವಿಸೇಸೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೩೪೭. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಖತ್ತಿಯೇ ಕುಲೇ;

ಪಿತುನೋ ಅಚ್ಚಯೇನಾಹಂ, ಮಹಾರಜ್ಜಸಮಪ್ಪಿತೋ.

೩೪೮. ‘‘ಕುಟ್ಠರೋಗಾಧಿಭೂತೋಹಂ, ನ ರತಿಂ ನ ಸುಖಂ ಲಭೇ;

ಮೋಘಂ ರಜ್ಜಂ ಸುಖಂ ಯಸ್ಮಾ, ಮೋಘರಾಜಾ ತತೋ ಅಹಂ.

೩೪೯. ‘‘ಕಾಯಸ್ಸ ದೋಸಂ ದಿಸ್ವಾನ, ಪಬ್ಬಜಿಂ ಅನಗಾರಿಯಂ;

ಬಾವರಿಸ್ಸ ದಿಜಗ್ಗಸ್ಸ, ಸಿಸ್ಸತ್ತಂ ಅಜ್ಝುಪಾಗಮಿಂ.

೩೫೦. ‘‘ಮಹತಾ ಪರಿವಾರೇನ, ಉಪೇಚ್ಚ ನರನಾಯಕಂ;

ಅಪುಚ್ಛಿಂ ನಿಪುಣಂ ಪಞ್ಹಂ, ತಂ ವೀರಂ ವಾದಿಸೂದನಂ.

೩೫೧. ‘‘‘ಅಯಂ ಲೋಕೋ ಪರೋ ಲೋಕೋ, ಬ್ರಹ್ಮಲೋಕೋ ಸದೇವಕೋ;

ದಿಟ್ಠಿಂ ನೋ [ದಿಟ್ಠಾ ನೋ (ಸೀ.), ದಿಟ್ಠಂ ನೋ (ಪೀ.), ದಿಟ್ಠಿಂ ತೇ (ಸ್ಯಾ.)] ನಾಭಿಜಾನಾಮಿ, ಗೋತಮಸ್ಸ ಯಸಸ್ಸಿನೋ.

೩೫೨. ‘‘‘ಏವಾಭಿಕ್ಕನ್ತದಸ್ಸಾವಿಂ, ಅತ್ಥಿ ಪಞ್ಹೇನ ಆಗಮಂ;

ಕಥಂ ಲೋಕಂ ಅವೇಕ್ಖನ್ತಂ, ಮಚ್ಚುರಾಜಾ ನ ಪಸ್ಸತಿ’.

೩೫೩. ‘‘‘ಸುಞ್ಞತೋ ಲೋಕಂ ಅವೇಕ್ಖಸ್ಸು, ಮೋಘರಾಜ ಸದಾ ಸತೋ;

ಅತ್ತಾನುದಿಟ್ಠಿಂ ಉಹಚ್ಚ, ಏವಂ ಮಚ್ಚುತರೋ ಸಿಯಾ.

೩೫೪. ‘‘‘ಏವಂ ಲೋಕಂ ಅವೇಕ್ಖನ್ತಂ, ಮಚ್ಚುರಾಜಾ ನ ಪಸ್ಸತಿ’;

ಇತಿ ಮಂ ಅಭಣಿ ಬುದ್ಧೋ, ಸಬ್ಬರೋಗತಿಕಿಚ್ಛಕೋ.

೩೫೫. ‘‘ಸಹ ಗಾಥಾವಸಾನೇನ, ಕೇಸಮಸ್ಸುವಿವಜ್ಜಿತೋ;

ಕಾಸಾವವತ್ಥವಸನೋ, ಆಸಿಂ ಭಿಕ್ಖು ತಥಾರಹಾ.

೩೫೬. ‘‘ಸಙ್ಘಿಕೇಸು ವಿಹಾರೇಸು, ನ ವಸಿಂ ರೋಗಪೀಳಿತೋ;

ಮಾ ವಿಹಾರೋ ಪದುಸ್ಸೀತಿ, ವಾತರೋಗೇಹಿ ಪೀಳಿತೋ [ವಾಚಾಯಾಭಿಸುಪೀಳಿತೋ (ಸ್ಯಾ. ಪೀ.), ವಾತರೋಗೀ ಸುಪೀಳಿತೋ (ಕ.)].

೩೫೭. ‘‘ಸಙ್ಕಾರಕೂಟಾ ಆಹಿತ್ವಾ, ಸುಸಾನಾ ರಥಿಕಾಹಿ ಚ;

ತತೋ ಸಙ್ಘಾಟಿಂ ಕರಿತ್ವಾ, ಧಾರಯಿಂ ಲೂಖಚೀವರಂ.

೩೫೮. ‘‘ಮಹಾಭಿಸಕ್ಕೋ ತಸ್ಮಿಂ ಮೇ, ಗುಣೇ ತುಟ್ಠೋ ವಿನಾಯಕೋ;

ಲೂಖಚೀವರಧಾರೀನಂ, ಏತದಗ್ಗೇ ಠಪೇಸಿ ಮಂ.

೩೫೯. ‘‘ಪುಞ್ಞಪಾಪಪರಿಕ್ಖೀಣೋ, ಸಬ್ಬರೋಗವಿವಜ್ಜಿತೋ;

ಸಿಖೀವ ಅನುಪಾದಾನೋ, ನಿಬ್ಬಾಯಿಸ್ಸಮನಾಸವೋ.

೩೬೦. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೩೬೧. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೬೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮೋಘರಾಜಾ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಮೋಘರಾಜತ್ಥೇರಸ್ಸಾಪದಾನಂ ದಸಮಂ.

ಕಚ್ಚಾಯನವಗ್ಗೋ ಚತುಪಞ್ಞಾಸಮೋ.