೫. ಕುಮಾರಕಸ್ಸಪತ್ಥೇರಅಪದಾನಂ

೧೫೦. ‘‘ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ;

ಸಬ್ಬಲೋಕಹಿತೋ ವೀರೋ, ಪದುಮುತ್ತರನಾಮಕೋ.

೧೫೧. ‘‘ತದಾಹಂ ಬ್ರಾಹ್ಮಣೋ ಹುತ್ವಾ, ವಿಸ್ಸುತೋ ವೇದಪಾರಗೂ;

ದಿವಾವಿಹಾರಂ ವಿಚರಂ, ಅದ್ದಸಂ ಲೋಕನಾಯಕಂ.

೧೫೨. ‘‘ಚತುಸಚ್ಚಂ ಪಕಾಸೇನ್ತಂ, ಬೋಧಯನ್ತಂ ಸದೇವಕಂ;

ವಿಚಿತ್ತಕಥಿಕಾನಗ್ಗಂ, ವಣ್ಣಯನ್ತಂ ಮಹಾಜನೇ.

೧೫೩. ‘‘ತದಾ ಮುದಿತಚಿತ್ತೋಹಂ, ನಿಮನ್ತೇತ್ವಾ ತಥಾಗತಂ;

ನಾನಾರತ್ತೇಹಿ ವತ್ಥೇಹಿ, ಅಲಙ್ಕರಿತ್ವಾನ ಮಣ್ಡಪಂ.

೧೫೪. ‘‘ನಾನಾರತನಪಜ್ಜೋತಂ, ಸಸಙ್ಘಂ ಭೋಜಯಿಂ ತಹಿಂ;

ಭೋಜಯಿತ್ವಾನ ಸತ್ತಾಹಂ, ನಾನಗ್ಗರಸಭೋಜನಂ.

೧೫೫. ‘‘ನಾನಾಚಿತ್ತೇಹಿ [ನಾನಾವಣ್ಣೇಹಿ (ಸೀ.)] ಪುಪ್ಫೇಹಿ, ಪೂಜಯಿತ್ವಾ ಸಸಾವಕಂ [ಮಹಾವೀರಂ (ಕ.)];

ನಿಪಚ್ಚ ಪಾದಮೂಲಮ್ಹಿ, ತಂ ಠಾನಂ ಪತ್ಥಯಿಂ ಅಹಂ.

೧೫೬. ‘‘ತದಾ ಮುನಿವರೋ ಆಹ, ಕರುಣೇಕರಸಾಸಯೋ [ಕರುಣೋ ಕರುಣಾಲಯೋ (ಸ್ಯಾ.)];

‘ಪಸ್ಸಥೇತಂ ದಿಜವರಂ, ಪದುಮಾನನಲೋಚನಂ.

೧೫೭. ‘‘‘ಪೀತಿಪಾಮೋಜ್ಜಬಹುಲಂ, ಸಮುಗ್ಗತತನೂರುಹಂ;

ಹಾಸಮ್ಹಿತವಿಸಾಲಕ್ಖಂ, ಮಮ ಸಾಸನಲಾಲಸಂ.

೧೫೮. ‘‘‘ಪತಿತಂ ಪಾದಮೂಲೇ ಮೇ, ಏಕಾವತ್ಥಸುಮಾನಸಂ [ಏಕವತ್ಥಂ ಸುಮಾನಸಂ (ಸ್ಯಾ. ಕ.)];

ಏಸ ಪತ್ಥೇತಿ ತಂ ಠಾನಂ, ವಿಚಿತ್ತಕಥಿಕತ್ತನಂ [ವಿಚಿತ್ತಕಥಿಕತ್ತದಂ (ಸೀ. ಪೀ.)].

೧೫೯. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೬೦. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಕುಮಾರಕಸ್ಸಪೋ ನಾಮ, ಹೇಸ್ಸತಿ ಸತ್ಥು ಸಾವಕೋ.

೧೬೧. ‘‘‘ವಿಚಿತ್ತಪುಪ್ಫದುಸ್ಸಾನಂ, ರತನಾನಞ್ಚ ವಾಹಸಾ;

ವಿಚಿತ್ತಕಥಿಕಾನಂ ಸೋ, ಅಗ್ಗತಂ ಪಾಪುಣಿಸ್ಸತಿ’.

೧೬೨. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೬೩. ‘‘ಪರಿಬ್ಭಮಂ ಭವಾಭವೇ [ಭವಾಕಾಸೇ (ಸೀ. ಪೀ.)], ರಙ್ಗಮಜ್ಝೇ ಯಥಾ ನಟೋ;

ಸಾಖಮಿಗತ್ರಜೋ ಹುತ್ವಾ, ಮಿಗಿಯಾ ಕುಚ್ಛಿಮೋಕ್ಕಮಿಂ.

೧೬೪. ‘‘ತದಾ ಮಯಿ ಕುಚ್ಛಿಗತೇ, ವಜ್ಝವಾರೋ ಉಪಟ್ಠಿತೋ;

ಸಾಖೇನ ಚತ್ತಾ ಮೇ ಮಾತಾ, ನಿಗ್ರೋಧಂ ಸರಣಂ ಗತಾ.

೧೬೫. ‘‘ತೇನ ಸಾ ಮಿಗರಾಜೇನ, ಮರಣಾ ಪರಿಮೋಚಿತಾ;

ಪರಿಚ್ಚಜಿತ್ವಾ ಸಪಾಣಂ [ಸಂಪಾಣಂ (ಸೀ. ಪೀ.)], ಮಮೇವಂ ಓವದೀ ತದಾ.

೧೬೬. ‘‘‘ನಿಗ್ರೋಧಮೇವ ಸೇವೇಯ್ಯ, ನ ಸಾಖಮುಪಸಂವಸೇ;

ನಿಗ್ರೋಧಸ್ಮಿಂ ಮತಂ ಸೇಯ್ಯೋ, ಯಞ್ಚೇ ಸಾಖಮ್ಹಿ ಜೀವಿತಂ’.

೧೬೭. ‘‘ತೇನಾನುಸಿಟ್ಠಾ ಮಿಗಯೂಥಪೇನ, ಅಹಞ್ಚ ಮಾತಾ ಚ ತಥೇತರೇ ಚ [ಚಿತರೇ ಚ (ಸ್ಯಾ.), ತಸ್ಸೋವಾದೇನ (ಪೀ.), ಚಿತರೇ ಚ ತಸ್ಸೋವಾದಂ (ಕ.)];

ಆಗಮ್ಮ ರಮ್ಮಂ ತುಸಿತಾಧಿವಾಸಂ, ಗತಾ ಪವಾಸಂ ಸಘರಂ ಯಥೇವ.

೧೬೮. ‘‘ಪುನೋ ಕಸ್ಸಪವೀರಸ್ಸ, ಅತ್ಥಮೇನ್ತಮ್ಹಿ ಸಾಸನೇ;

ಆರುಯ್ಹ ಸೇಲಸಿಖರಂ, ಯುಞ್ಜಿತ್ವಾ ಜಿನಸಾಸನಂ.

೧೬೯. ‘‘ಇದಾನಾಹಂ ರಾಜಗಹೇ, ಜಾತೋ ಸೇಟ್ಠಿಕುಲೇ ಅಹುಂ;

ಆಪನ್ನಸತ್ತಾ ಮೇ ಮಾತಾ, ಪಬ್ಬಜಿ ಅನಗಾರಿಯಂ.

೧೭೦. ‘‘ಸಗಬ್ಭಂ ತಂ ವಿದಿತ್ವಾನ, ದೇವದತ್ತಮುಪಾನಯುಂ;

ಸೋ ಅವೋಚ ‘ವಿನಾಸೇಥ, ಪಾಪಿಕಂ ಭಿಕ್ಖುನಿಂ ಇಮಂ’.

೧೭೧. ‘‘ಇದಾನಿಪಿ ಮುನಿನ್ದೇನ, ಜಿನೇನ ಅನುಕಮ್ಪಿತಾ;

ಸುಖಿನೀ ಅಜನೀ ಮಯ್ಹಂ, ಮಾತಾ ಭಿಕ್ಖುನುಪಸ್ಸಯೇ.

೧೭೨. ‘‘ತಂ ವಿದಿತ್ವಾ ಮಹೀಪಾಲೋ, ಕೋಸಲೋ ಮಂ ಅಪೋಸಯಿ;

ಕುಮಾರಪರಿಹಾರೇನ, ನಾಮೇನಾಹಞ್ಚ ಕಸ್ಸಪೋ.

೧೭೩. ‘‘ಮಹಾಕಸ್ಸಪಮಾಗಮ್ಮ, ಅಹಂ ಕುಮಾರಕಸ್ಸಪೋ;

ವಮ್ಮಿಕಸದಿಸಂ ಕಾಯಂ, ಸುತ್ವಾ ಬುದ್ಧೇನ ದೇಸಿತಂ.

೧೭೪. ‘‘ತತೋ ಚಿತ್ತಂ ವಿಮುಚ್ಚಿ ಮೇ, ಅನುಪಾದಾಯ ಸಬ್ಬಸೋ;

ಪಾಯಾಸಿಂ ದಮಯಿತ್ವಾಹಂ, ಏತದಗ್ಗಮಪಾಪುಣಿಂ.

೧೭೫. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೭೬. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೭೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಮಾರಕಸ್ಸಪೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಕುಮಾರಕಸ್ಸಪತ್ಥೇರಸ್ಸಾಪದಾನಂ ಪಞ್ಚಮಂ.

ಚತುವೀಸತಿಮಂ ಭಾಣವಾರಂ.