೬. ಬಾಹಿಯತ್ಥೇರಅಪದಾನಂ

೧೭೮. ‘‘ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ;

ಮಹಪ್ಪಭೋ ತಿಲೋಕಗ್ಗೋ, ನಾಮೇನ ಪದುಮುತ್ತರೋ.

೧೭೯. ‘‘ಖಿಪ್ಪಾಭಿಞ್ಞಸ್ಸ ಭಿಕ್ಖುಸ್ಸ, ಗುಣಂ ಕಿತ್ತಯತೋ ಮುನೇ;

ಸುತ್ವಾ ಉದಗ್ಗಚಿತ್ತೋಹಂ, ಕಾರಂ ಕತ್ವಾ ಮಹೇಸಿನೋ.

೧೮೦. ‘‘ದತ್ವಾ ಸತ್ತಾಹಿಕಂ ದಾನಂ, ಸಸಿಸ್ಸಸ್ಸ ಮುನೇ ಅಹಂ;

ಅಭಿವಾದಿಯ ಸಮ್ಬುದ್ಧಂ, ತಂ ಠಾನಂ ಪತ್ಥಯಿಂ ತದಾ.

೧೮೧. ‘‘ತತೋ ಮಂ ಬ್ಯಾಕರಿ ಬುದ್ಧೋ, ‘ಏತಂ ಪಸ್ಸಥ ಬ್ರಾಹ್ಮಣಂ;

ಪತಿತಂ ಪಾದಮೂಲೇ ಮೇ, ಚರಿಯಂ ಪಚ್ಚವೇಕ್ಖಣಂ [ಪಸನ್ನನಯನಾನನಂ (ಸೀ.), ಪೀನಸಮ್ಪನ್ನವೇಕ್ಖಣಂ (ಸ್ಯಾ.), ಪೀಣಂಸಂ ಪಚ್ಚವೇಕ್ಖಣಂ (ಪೀ.)].

೧೮೨. ‘‘‘ಹೇಮಯಞ್ಞೋಪಚಿತಙ್ಗಂ, ಅವದಾತತನುತ್ತಚಂ;

ಪಲಮ್ಬಬಿಮ್ಬತಮ್ಬೋಟ್ಠಂ, ಸೇತತಿಣ್ಹಸಮಂ ದಿಜಂ.

೧೮೩. ‘‘‘ಗುಣಥಾಮಬಹುತರಂ, ಸಮುಗ್ಗತತನೂರುಹಂ;

ಗುಣೋಘಾಯತನೀಭೂತಂ, ಪೀತಿಸಮ್ಫುಲ್ಲಿತಾನನಂ.

೧೮೪. ‘‘‘ಏಸೋ ಪತ್ಥಯತೇ ಠಾನಂ, ಖಿಪ್ಪಾಭಿಞ್ಞಸ್ಸ ಭಿಕ್ಖುನೋ;

ಅನಾಗತೇ ಮಹಾವೀರೋ, ಗೋತಮೋ ನಾಮ ಹೇಸ್ಸತಿ.

೧೮೫. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಬಾಹಿಯೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೧೮೬. ‘‘ತದಾ ಹಿ ತುಟ್ಠೋ ವುಟ್ಠಾಯ, ಯಾವಜೀವಂ ಮಹಾಮುನೇ;

ಕಾರಂ ಕತ್ವಾ ಚುತೋ ಸಗ್ಗಂ, ಅಗಂ ಸಭವನಂ ಯಥಾ.

೧೮೭. ‘‘ದೇವಭೂತೋ ಮನುಸ್ಸೋ ವಾ, ಸುಖಿತೋ ತಸ್ಸ ಕಮ್ಮುನೋ;

ವಾಹಸಾ ಸಂಸರಿತ್ವಾನ, ಸಮ್ಪತ್ತಿಮನುಭೋಮಹಂ.

೧೮೮. ‘‘ಪುನ ಕಸ್ಸಪವೀರಸ್ಸ, ಅತ್ಥಮೇನ್ತಮ್ಹಿ [ಅತ್ಥಙ್ಗತಮ್ಹಿ (ಸ್ಯಾ.)] ಸಾಸನೇ;

ಆರುಯ್ಹ ಸೇಲಸಿಖರಂ, ಯುಞ್ಜಿತ್ವಾ ಜಿನಸಾಸನಂ.

೧೮೯. ‘‘ವಿಸುದ್ಧಸೀಲೋ ಸಪ್ಪಞ್ಞೋ, ಜಿನಸಾಸನಕಾರಕೋ;

ತತೋ ಚುತಾ ಪಞ್ಚ ಜನಾ, ದೇವಲೋಕಂ ಅಗಮ್ಹಸೇ.

೧೯೦. ‘‘ತತೋಹಂ ಬಾಹಿಯೋ ಜಾತೋ, ಭಾರುಕಚ್ಛೇ ಪುರುತ್ತಮೇ;

ತತೋ ನಾವಾಯ ಪಕ್ಖನ್ದೋ [ಪಕ್ಖನ್ತೋ (ಸೀ.), ಪಕ್ಕನ್ತೋ (ಪೀ.)], ಸಾಗರಂ ಅಪ್ಪಸಿದ್ಧಿಯಂ [ಅತ್ಥಸಿದ್ಧಿಯಂ (ಕ.)].

೧೯೧. ‘‘ತತೋ ನಾವಾ ಅಭಿಜ್ಜಿತ್ಥ, ಗನ್ತ್ವಾನ ಕತಿಪಾಹಕಂ;

ತದಾ ಭೀಸನಕೇ ಘೋರೇ, ಪತಿತೋ ಮಕರಾಕರೇ.

೧೯೨. ‘‘ತದಾಹಂ ವಾಯಮಿತ್ವಾನ, ಸನ್ತರಿತ್ವಾ ಮಹೋದಧಿಂ;

ಸುಪ್ಪಾದಪಟ್ಟನವರಂ [ಸುಪ್ಪಾರಪಟ್ಟನವರಂ (ಸೀ. ಪೀ.)], ಸಮ್ಪತ್ತೋ ಮನ್ದವೇಧಿತೋ [ಮನ್ದಮೇಧಿಕೋ (ಸೀ.), ಮನ್ದವೇದಿತೋ (ಸ್ಯಾ.), ಮದ್ದವೇರತಂ (ಕ.)].

೧೯೩. ‘‘ದಾರುಚೀರಂ ನಿವಾಸೇತ್ವಾ, ಗಾಮಂ ಪಿಣ್ಡಾಯ ಪಾವಿಸಿಂ;

ತದಾಹ ಸೋ ಜನೋ ತುಟ್ಠೋ, ಅರಹಾಯಮಿಧಾಗತೋ.

೧೯೪. ‘‘ಇಮಂ ಅನ್ನೇನ ಪಾನೇನ, ವತ್ಥೇನ ಸಯನೇನ ಚ;

ಭೇಸಜ್ಜೇನ ಚ ಸಕ್ಕತ್ವಾ, ಹೇಸ್ಸಾಮ ಸುಖಿತಾ ಮಯಂ.

೧೯೫. ‘‘ಪಚ್ಚಯಾನಂ ತದಾ ಲಾಭೀ, ತೇಹಿ ಸಕ್ಕತಪೂಜಿತೋ;

ಅರಹಾಹನ್ತಿ ಸಙ್ಕಪ್ಪಂ, ಉಪ್ಪಾದೇಸಿಂ ಅಯೋನಿಸೋ.

೧೯೬. ‘‘ತತೋ ಮೇ ಚಿತ್ತಮಞ್ಞಾಯ, ಚೋದಯೀ ಪುಬ್ಬದೇವತಾ;

‘ನ ತ್ವಂ ಉಪಾಯಮಗ್ಗಞ್ಞೂ, ಕುತೋ ತ್ವಂ ಅರಹಾ ಭವೇ’.

೧೯೭. ‘‘ಚೋದಿತೋ ತಾಯ ಸಂವಿಗ್ಗೋ, ತದಾಹಂ ಪರಿಪುಚ್ಛಿ ತಂ;

‘ಕೇ ವಾ ಏತೇ ಕುಹಿಂ ಲೋಕೇ, ಅರಹನ್ತೋ ನರುತ್ತಮಾ.

೧೯೮. ‘‘‘ಸಾವತ್ಥಿಯಂ ಕೋಸಲಮನ್ದಿರೇ ಜಿನೋ, ಪಹೂತಪಞ್ಞೋ ವರಭೂರಿಮೇಧಸೋ;

ಸೋ ಸಕ್ಯಪುತ್ತೋ ಅರಹಾ ಅನಾಸವೋ, ದೇಸೇತಿ ಧಮ್ಮಂ ಅರಹತ್ತಪತ್ತಿಯಾ.

೧೯೯. ‘‘‘ತದಸ್ಸ ಸುತ್ವಾ ವಚನಂ ಸುಪೀಣಿತೋ [ಪೀಣಿತ್ವಾ (ಕ.)], ನಿಧಿಂವ ಲದ್ಧಾ ಕಪಣೋತಿ ವಿಮ್ಹಿತೋ;

ಉದಗ್ಗಚಿತ್ತೋ ಅರಹತ್ತಮುತ್ತಮಂ, ಸುದಸ್ಸನಂ ದಟ್ಠುಮನನ್ತಗೋಚರಂ.

೨೦೦. ‘‘‘ತದಾ ತತೋ ನಿಕ್ಖಮಿತ್ವಾನ ಸತ್ಥುನೋ [ನಿಕ್ಖಮಿತುನ ಸತ್ಥುವರಂ (ಸೀ.)], ಸದಾ ಜಿನಂ ಪಸ್ಸಾಮಿ ವಿಮಲಾನನಂ [ಪರಾಜಿನಂ ಪಸ್ಸಾಮಿ ಕಮಲಾನನಂ (ಕ.)];

ಉಪೇಚ್ಚ ರಮ್ಮಂ ವಿಜಿತವ್ಹಯಂ ವನಂ, ದಿಜೇ ಅಪುಚ್ಛಿಂ ಕುಹಿಂ ಲೋಕನನ್ದನೋ.

೨೦೧. ‘‘‘ತತೋ ಅವೋಚುಂ ನರದೇವವನ್ದಿತೋ, ಪುರಂ ಪವಿಟ್ಠೋ ಅಸನೇಸನಾಯ ಸೋ;

ಸಸೋವ [ಪಚ್ಚೇಹಿ (ಸೀ. ಸ್ಯಾ.)] ಖಿಪ್ಪಂ ಮುನಿದಸ್ಸನುಸ್ಸುಕೋ, ಉಪೇಚ್ಚ ವನ್ದಾಹಿ ತಮಗ್ಗಪುಗ್ಗಲಂ’.

೨೦೨. ‘‘ತತೋಹಂ ತುವಟಂ ಗನ್ತ್ವಾ, ಸಾವತ್ಥಿಂ ಪುರಮುತ್ತಮಂ;

ವಿಚರನ್ತಂ ತಮದ್ದಕ್ಖಿಂ, ಪಿಣ್ಡತ್ಥಂ ಅಪಿಹಾಗಿಧಂ.

೨೦೩. ‘‘ಪತ್ತಪಾಣಿಂ ಅಲೋಲಕ್ಖಂ, ಪಾಚಯನ್ತಂ ಪೀತಾಕರಂ [ಭಾಜಯನ್ತಂ ವಿಯಾಮತಂ (ಸೀ.), ಜೋತಯನ್ತಂ ಇಧಾಮತಂ (ಸ್ಯಾ.), ಭಾಜಯನ್ತಂ ಇದಂಮತಂ (ಪೀ.)];

ಸಿರೀನಿಲಯಸಙ್ಕಾಸಂ, ರವಿದಿತ್ತಿಹರಾನನಂ.

೨೦೪. ‘‘ತಂ ಸಮೇಚ್ಚ ನಿಪಚ್ಚಾಹಂ, ಇದಂ ವಚನಮಬ್ರವಿಂ;

‘ಕುಪಥೇ ವಿಪ್ಪನಟ್ಠಸ್ಸ, ಸರಣಂ ಹೋಹಿ ಗೋತಮ.

೨೦೫. ‘‘‘ಪಾಣಸನ್ತಾರಣತ್ಥಾಯ, ಪಿಣ್ಡಾಯ ವಿಚರಾಮಹಂ;

ನ ತೇ ಧಮ್ಮಕಥಾಕಾಲೋ, ಇಚ್ಚಾಹ ಮುನಿಸತ್ತಮೋ’.

೨೦೬. ‘‘ತದಾ ಪುನಪ್ಪುನಂ ಬುದ್ಧಂ, ಆಯಾಚಿಂ ಧಮ್ಮಲಾಲಸೋ;

ಯೋ ಮೇ ಧಮ್ಮಮದೇಸೇಸಿ, ಗಮ್ಭೀರಂ ಸುಞ್ಞತಂ ಪದಂ.

೨೦೭. ‘‘ತಸ್ಸ ಧಮ್ಮಂ ಸುಣಿತ್ವಾನ, ಪಾಪುಣಿಂ ಆಸವಕ್ಖಯಂ;

ಪರಿಕ್ಖೀಣಾಯುಕೋ ಸನ್ತೋ, ಅಹೋ ಸತ್ಥಾನುಕಮ್ಪಕೋ.

೨೦೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೦೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೧೧. ‘‘ಏವಂ ಥೇರೋ ವಿಯಾಕಾಸಿ, ಬಾಹಿಯೋ ದಾರುಚೀರಿಯೋ;

ಸಙ್ಕಾರಕೂಟೇ ಪತಿತೋ, ಭೂತಾವಿಟ್ಠಾಯ ಗಾವಿಯಾ.

೨೧೨. ‘‘ಅತ್ತನೋ ಪುಬ್ಬಚರಿಯಂ, ಕಿತ್ತಯಿತ್ವಾ ಮಹಾಮತಿ;

ಪರಿನಿಬ್ಬಾಯಿ ಸೋ ಥೇರೋ [ವೀರೋ (ಸೀ.), ಧೀರೋ (ಸ್ಯಾ.)], ಸಾವತ್ಥಿಯಂ ಪುರುತ್ತಮೇ.

೨೧೩. ‘‘ನಗರಾ ನಿಕ್ಖಮನ್ತೋ ತಂ, ದಿಸ್ವಾನ ಇಸಿಸತ್ತಮೋ;

ದಾರುಚೀರಧರಂ ಧೀರಂ, ಬಾಹಿಯಂ ಬಾಹಿತಾಗಮಂ.

೨೧೪. ‘‘ಭೂಮಿಯಂ ಪತಿತಂ ದನ್ತಂ, ಇನ್ದಕೇತೂವ ಪಾತಿತಂ;

ಗತಾಯುಂ ಸುಕ್ಖಕಿಲೇಸಂ [ಗತಾಯು ಸಂಗತಕ್ಲೇಸಂ (ಸೀ. ಪೀ.), ತದಾಯು ಸಙ್ಕತಾಲೇಸಂ (ಕ.)], ಜಿನಸಾಸನಕಾರಕಂ.

೨೧೫. ‘‘ತತೋ ಆಮನ್ತಯೀ ಸತ್ಥಾ, ಸಾವಕೇ ಸಾಸನೇ ರತೇ;

‘ಗಣ್ಹಥ ನೇತ್ವಾ [ಹುತ್ವಾ (ಸ್ಯಾ. ಪೀ. ಕ.)] ಝಾಪೇಥ, ತನುಂ ಸಬ್ರಹ್ಮಚಾರಿನೋ.

೨೧೬. ‘‘‘ಥೂಪಂ ಕರೋಥ ಪೂಜೇಥ, ನಿಬ್ಬುತೋ ಸೋ ಮಹಾಮತಿ;

ಖಿಪ್ಪಾಭಿಞ್ಞಾನಮೇಸಗ್ಗೋ, ಸಾವಕೋ ಮೇ ವಚೋಕರೋ.

೨೧೭. ‘‘‘ಸಹಸ್ಸಮಪಿ ಚೇ ಗಾಥಾ, ಅನತ್ಥಪದಸಞ್ಹಿತಾ;

ಏಕಂ ಗಾಥಾಪದಂ ಸೇಯ್ಯೋ, ಯಂ ಸುತ್ವಾ ಉಪಸಮ್ಮತಿ.

೨೧೮. ‘‘‘ಯತ್ಥ ಆಪೋ ಚ ಪಥವೀ, ತೇಜೋ ವಾಯೋ ನ ಗಾಧತಿ;

ನ ತತ್ಥ ಸುಕ್ಕಾ ಜೋತನ್ತಿ, ಆದಿಚ್ಚೋ ನ ಪಕಾಸತಿ.

೨೧೯. ‘‘‘ನ ತತ್ಥ ಚನ್ದಿಮಾ ಭಾತಿ, ತಮೋ ತತ್ಥ ನ ವಿಜ್ಜತಿ;

ಯದಾ ಚ ಅತ್ತನಾ ವೇದಿ, ಮುನಿಮೋನೇನ ಬ್ರಾಹ್ಮಣೋ.

೨೨೦. ‘‘‘ಅಥ ರೂಪಾ ಅರೂಪಾ ಚ, ಸುಖದುಕ್ಖಾ ವಿಮುಚ್ಚತಿ’;

ಇಚ್ಚೇವಂ ಅಭಣೀ ನಾಥೋ, ತಿಲೋಕಸರಣೋ ಮುನಿ’’.

ಇತ್ಥಂ ಸುದಂ ಆಯಸ್ಮಾ ಬಾಹಿಯೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಬಾಹಿಯತ್ಥೇರಸ್ಸಾಪದಾನಂ ಛಟ್ಠಂ.